Proverb 15
15
1Enn repons dou tengn lakoler;
enn koze brit anflam laraz.
2Parol enn saz fer gagn konesans;
kan bann bet ouver labous, zis betiz ki sorti.
3Lizie LESEGNER trouv partou;
li obzerv seki bon ek seki move.
4Bann zoli parol amenn lavi;
koze gra fer leker fermal.
5Enn inbesil pa pran kont konsey so paran;
zanfan saz aksepte kan so paran met li dan bon sime.
6Kan nou viv dan drwatir nou rises ogmante;
kan nou viv dan pese, maler pou rwinn nou dibien.
7Labous bann dimoun saz repann konesans;
me bann dimoun bet ena lespri kokom.
8Lapriyer bon dimoun fer LESEGNER plezir;
me li deteste lofrand bann malonet.
9 LESEGNER deteste konportman bann move dimoun;
me li kontan bann ki azir bien.
10Si to swiv enn move sime, to pinision pou sever;
si to deteste repros, to pou zwenn lamor.
11LESEGNER okouran tou seki pase dan lemond bann mor;
eski li pa pou kone ki pase dan nou leker?
12Bann insolan pa kontan kan kritik zot;
zame zot pa pou dimann konsey enn saz.
13Kan ena lazwa dan leker, pou ena sourir lor lalev;
me kan leker fermal, lespri abat.
14Dimoun saz gagn swaf konesans;
dimoun bet manz zis so foli.
15Lavi enn pov li pa fasil
me kan ena lazwa dan leker, lavi kouma enn fet.
16Preferab gagn tigit, me ena respe pou LESEGNER;
ki gagn boukou avek enn ta traka.
17Prefer manz enn ti repa sinp kot lamour regne;
ki enn gran festin ar bann ipokrit.
18Kan dimoun sof vit, dispit pran pouvwar;
kan dimoun res kalm, lape gagn viktwar.
19Sime bann pares ranpli ar pikan;
me lor sime bann ki onet pena obstak.
20Zanfan saz fer zot paran kontan;
move zanfan fer zot paran plore.
21Dimoun bet gagn plezir dan lafoli;
dimoun rezonab mars dan enn sime drwat.
22San bon konsey, to proze kapote;
boukou bon konseye fer to proze avanse.
23Ala nou kontan kan nou reysi donn enn bon repons;
sa fer plezir kan nou koz enn bon parol zis kan bizin.
24Dimoun saz pran sime ki donn lavi,
pa sime ki donn lamor.
25 LESEGNER detrir lakaz bann orgeye,
me li protez propriete bann vev.
26 LESEGNER deteste bann move lintansion;
me li kontan bann parol amikal.
27Si to galoup deryer larzan mal-gagne, to amenn problem lor to fami;
si to pa pran gous, to pou viv lontan.
28Bon dimoun reflesi avan reponn;
me labous move dimoun koz zis parol lemal.
29 LESEGNER res lwin ar bann move dimoun;
me li ekzos lapriyer bann bon dimoun.
30Enn regar amikal fer leker kontan;
enn bon nouvel fer nou repran kouraz.
31Dimoun ki ekout bon konsey dan lavi,
li ena so plas parmi bann saz.
32Si to ignor bon konsey, to fer tomem ditor;
me si to aksepte zot to vinn pli saz.
33Respe pou LESEGNER fer gagn lasazes;
limilite ouver laport loner.
Currently Selected:
Proverb 15: KMOTPOR
Highlight
Share
Copy
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.