Psom 145
145
Nou sant kantik louanz
Enn Psom David. Enn kantik louanz.
1Mo pou proklam to grander O Bondie, mo Lerwa;
mo pou loue twa aster, pli divan, touletan.
2Toulezour mo pou dir twa mersi;
mo pou sant to louanz aster, pli divan, touletan.
3LESEGNER li gran, li merit tou louanz;
nou pa kapav konpran ni mezir so grander.
4Zenerasion apre zenerasion limanite pou loue to bann aksion;
partou zot pou koz lor to bann explwa,
5lor splander to laglwar ek to mazeste.
Mo pou medit lor bann gran mervey ki to fer.
6Dimounn pou koz lor to pwisans redoutab,
e mwa mo pou proklam to bann explwa.
7Zot pou selebre grander to bonte;
ar lazwa zot pou sant to lazistis.
8Leker LESEGNER li ranpli ar tandres ek konpasion;
difisil pou li fer koler parski so lamour infini deborde partou.
9LESEGNER ena labonte pou tou dimounn,
li ena konpasion pou tou kreatir ki li finn kree.
10SEGNER, tou seki to finn kree pou dir twa mersi,
e tou bann fidel pou loue twa.
11Zot pou koz lor laglwar to rwayom,
e zot pou rakont tou bann mirak ki to finn fer.
12Koumsa lemond antie pou konn to explwa
ek laglwar manifik ki to regn ena.
13To regn pou enn regn eternel
e to pouvwar rwayal pou dire pou touzour.
LESEGNER fidel dan tou so parol,
dan tou so aksion li montre so bonte.
14LESEGNER soutenir bann ki pe tonbe
e li relev bann ki kourbe.
15Zot tou lev zot lizie ver twa
pou gagn zot nouritir kan zot bizin.
16To ouver to lame
e tou kreatir rasazie e satisfe.
17LESEGNER, li zis dan tou seki li fer;
li zenere dan tou so aksion.
18LESEGNER pre pou ed dimounn ki apel li
e ki dimann so led ar sinserite.
19Bann ki onor li gagn seki zot bizin;
li tann zot soufrans e li sov zot.
20Li vey lor bann ki kontan li
me li detrir bann azan lemal.
21Mo pou touletan loue LESEGNER;
tou kreatir ki li finn kree pou loue so sin nom
aster, taler, pli divan ek touletan.
Currently Selected:
Psom 145: KMNT
Highlight
Copy
Compare
Share
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
