Psom 144
144
Lerwa dir twa mersi
Enn Psom David.
1Mo loue LESEGNER, mo protekter!
Limem ki prepar mwa pou bann batay,
antrenn mwa pou gagn lager.
2Limem mo protekter ek mo boukliye,
mo sitadel ek mo liberater,
mo boukliye, mo abrit mwa deryer li.
Limem ki soumet bann pep sou mo kontrol.
3SEGNER, kifer to pran kont bann imin?
Kifer to donn dimounn ordiner enn plas inportan?
4Enn dimounn ordiner li kouma enn ti labriz;
bann zour so lavi nek enn lonbraz ki pase.
5O SEGNER, desir kannva lesiel e vinn kot nou;
tous bann montagn e fer zot larg lafime.
6Avoy zekler partou e dispers to lennmi;
avoy to bann fles e fer zot al kasiet.
7Depi lao avoy to lame pou sekour mwa,
delivre mwa dan toran ki bwi ar koler,
tir mwa dan grif bann anvaiser,
8ki zame pa koz laverite,
ki lev lame fer serman, me koz manti mem.
9Mo pou sant enn nouvo sante pou twa, O Bondie;
mo pou akonpagn mo sante ar sitar pou zwe pou twa,
10twa ki donn laviktwar bann lerwa,
twa ki sov David, to serviter.
11Protez mwa kont mo bann lennmi san pitie;
tir mwa dan grif bann pep etranze,
ki zame pa koz laverite,
ki lev lame fer serman, me koz manti mem.
12Fer nou bann garson dan zot zenes
grandi kouma bann pie solid;
fer nou bann tifi vinn bann kolonn
ki ar elegans tini nou sato.
13Ranpli nou grenie
ar tou sort kalite manze;
fer nou zanimo dan patiraz
peple par milie.
14Fer nou vas met ba san problem,
san pert, san foskous.
Fer lape ek trankilite regne dan nou lavil.
15Bienere pep ki gagn sa kalite benediksion-la;
bienere pep ki ena LESEGNER pou Bondie.
Currently Selected:
Psom 144: KMNT
Highlight
Copy
Compare
Share
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
