Psom 143
143
Ekout mo lapriyer, Segner
Enn Psom David.
1SEGNER, ekout mo lapriyer!
Dan to fidelite ekout mo siplikasion;
dan to drwatir reponn mwa.
2Pa fer enn prose kont mwa, to serviter,
parski okenn dimounn lor later san repros devan twa.
3Mo lennmi finn pourswiv mwa,
finn zet mwa anba, finn kraz mwa.
Mo lennmi finn anfons mwa dan lobskirite
parey dimounn ki finn mor lontan.
4Mo pe bes lebra;
dezespwar pe touf mwa net.
5Mo rapel bien lepase;
mo rapel bien to bann explwa extraordiner;
mo medit lor louvraz to lame.
6Mo lev lame lao ver twa, dan lapriyer,
mo lekor ek mo lespri swaf to prezans
parey kouma later desese swaf dilo lapli.
7Exos mo lapriyer, SEGNER!
Mo finn perdi lespwar.
Pa get lot kote, SEGNER;
si to pa pran mwa kont,
mo pou fini dan trou lamor.
8Toule gramatin fer mwa konn to lamour infini
parski mo finn met mo konfians dan twa.
Montre mwa sime ki mo bizin swiv
parski mo finn tourn mwa ver twa.
9SEGNER, mo vinn ver twa pou gagn to proteksion;
protez mwa kont mo lennmi.
10Montre mwa sime to volonte
parski tomem mo Bondie.
Ki to lespri gid mwa avek bonte
lor sime ki pena obstak.
11Prezerv mo lavi, SEGNER, pou loner to nom;
par to lazistis tir mwa dan mo tourman.
12Parski to kontan mwa, detrir mo lennmi
e detrir mo bann adverser,
akoz mo to serviter.
Currently Selected:
Psom 143: KMNT
Highlight
Copy
Compare
Share
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
