Psom 141
141
Lapriyer Tanto
Enn Psom David.
1Mo sipliy twa, SEGNER; mo bien bizin to led.
Pran mwa kont ler mo rod to led.
2Aksepte mo lapriyer kouma lafime lansan;
aksepte mo lame ki leve ver twa parey lofrand aswar.
3SEGNER, met enn gard kot mo labous,
enn santinel ant mo de lalev.
4Ed mwa pou reziste tantasion lemal,
pou pa pran par dan move pratik
ansam ar move dimounn;
alor mo pa pou partisip dan zot fet.
5Enn bon dimounn kapav pini mwa,
fer mwa repros pou mo prop dibien
me mo refiz aksepte faver ar move dimounn
parski gramatin-tanto mo fer lapriyer kont zot pese.
6Kan zot bann dirizan pe tom piktet dan presipis,
dimounn pou rapel laverite ki mo ti pe dir.
7Parey kouma bisron koup dibwa, fann li, tay-tay li;
koumsa mem zot lezo pou fane bout par bout
toutotour zot tom vid.#141:5-7 Tex Ebre pa kler ditou lor sa group verse la.
8Me mwa mo lizie fixe lor twa, SEGNER.
Donn mwa to proteksion e pa les mwa san defans.
9Protez mwa kont bann latrap zot finn poz lor mo sime;
anpes mwa rant dan piez bann ki pratik lemal.
10Fer zot rant dan zot prop latrap
letan ki mwa mo travers an liberte.
Currently Selected:
Psom 141: KMNT
Highlight
Copy
Compare
Share
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
