Psom 139
139
Segner Bondie Toupwisan
Pou sef koral. Enn Psom David.
1Segner, to finn examinn mwa net
e to kone ki mo ete.
2To okouran kan mo asize, kan mo diboute;
depi lwin laba to kone ki pase dan mo latet.
3To kone sipa mo pe travay ou si mo pe kas poz;
to ena tou konesans lor seki mo pe fer.
4Avan mem mo ouver mo labous,
SEGNER, to kone ki mo pou dir.
5To la partou otour mwa
e to lame protez mwa.
6To konn mwa dan enn fason parfe,
sitan bien, ki li difisil pou konpran tousala.
7Kot mo kapav kasiet pou res lwin ar twa?
Kot mo kapav sove pou pa tom dan to prezans?
8Si mo mont dan lesiel to pou laba;
si mo tom dan trou lamor, laba osi to pou prezan.
9Si mo anvole, mo al lot kote, kot soley leve,
si mo travers lamer pou al dan enn finfon, kot soley kouse,
10to lame pou la pou gid mo pa,
to lame drwat pou tini mwa ferm.
11Si mo dir, “Mo sir marenwar pou kasiet mwa,
ki lalimier otour mwa pou vinn obskirite,”
12mo sir marenwar pa pou ase nwar pou kasiet mwa
e lanwit pa pou ase som.
Pou twa lalimier ek marenwar pa fer okenn diferans.
13Se twa kreater sak parti mo lekor;
se twa ki finn fasonn mwa dan vant mo mama.
14Mo loue twa parski to finn kree mwa enn vre mervey,
tou seki to fer li enn mervey,
sa mo bizin rekonet.
15To ti kone letan ti pe form mo bann lezo dan sekre,
letan ti pe fasonn mwa dan profonder later.
16To lizie ti trouv mo lekor ki pa ti ankor ena form.
To ti fini tras tou mo bann zour
avan mem ki mo lizie ti ouver pou trouv premie zour-la.
17O Bondie, kouma li difisil pou konn to panse;
zot inpozan, telman ena boukou!
18To ena plis plan dan to latet ki lagrin disab lor laplaz;
mo pa kapav konte; mo leve, mo touzour avek twa.
19O Bondie, si selman to ti kapav fer move dimounn mor,
e pous bann dimounn violan lwin ar mwa!
20Zot dir bann kalomni ek mesanste lor twa;
zot zet labou lor to nom.
21O SEGNER, mo deteste bann ki ayir twa,
zot degoutan bann ki revolte kont twa.
22Mo vremem ayir zot,
mo konsider zot kouma mo lennmi personel.
23Examinn mwa, O Bondie
pou to dekouver mo leker;
teste mwa pou to konn mo panse.
24Gete tomem si ena lemal dan mwa
e gid mwa lor sime leternite.
Currently Selected:
Psom 139: KMNT
Highlight
Copy
Compare
Share
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
