ISAYA 38

Tiqtír waawutmo Hesekia nee hungu/umaawós

(2Wat 20:1-11; 2Qom 32:24-26)

1Deeloodae waawutmo Hesekia tiqti guri eér, gwa'ara gari nakaá/. Aarusmo Isaya garmoó Amos iri amoorós káy, guri báy, «AAKOÓ MUNGÚ i kaahi, kuúng gwa'araro a pa/ká, gimáy kángw do'ók qoomeeseek.»

2Naagáy waawutmo Hesekia iri warqáy amór koo/i, AAKOÓ MUNGÚ guri firín, 3iri oó', «Aá AAKOÓ MUNGÚ, án kuúng u harhheehhe'eés, na'amaamís, adoodá' aníng kuúng ura sagadiyumaamiís ar inkihhimu inslaweek, slám ar muunaáeé' sleémeero, nee muruú qoóm una tlehhahhiít dír geeraawoge.» Hesekia Mungú guri ló'wa ii /aa/amín.

4Aluuwo AAKOÓ MUNGÚ iri axweés dír Isaya, guri báy, 5«Tláw Hesekia ku beer, AAKOÓ MUNGÚ, Munguú baabuúwók Daudi i kaahi, ‹Aníng firoorók aga axaás nee hhirhheeriwók iga ár. Ga/aaweek, aníng slafiingók ngwaa doók oo harqoomoó kureeraá mibaá nee kooán. 6Aníng kuúng u tuú/ dinkwa nee gixsarihe dír waawutmoó Ashuruwo nee gixsarí ngiri xuúm.› » 7Isaya guri báy, «Layár amór AAKOÓ MUNGÚ daahh ar kuúng ta aan a tí as kawa tsahh adór AAKOÓ MUNGÚ al'axweesantós ngir boo/eés. 8Aníng mahhtidár dír tsa/a/amtoodá' Ahasi aa tleéhh an alií surkuús ar harqoomoó digiruú mibaangw.» Mahhtidá' iri surúk ar harqoomoó digruú mibaangw. 9Waawutmo Hesekia iwa huunguú/ daa'angwí guri daá' as sluufaay.

10Aníng ana oó', «Baraá na/uumar'eene

aqo an gwaá',

aníng taa qaroó amohhe'eés niwa dah baraá gi'i

deelo sleémeero ar naa meti baraá slafingw'eene.

11Ana oó', Aníng AAKOÓ MUNGÚ u sangw baloó araaká,

baraá yaamaá múk slafa

tam heé ni ar inqo kaahh,

baraá tla/ángw yaamuloouusér daanduú yaamuwo.

12Didá' ni hoot kaa hingeés dir'eene

adór heémár de'eemusmo wá ale,

slafingw'eé' una amohhe'eés adór heé tlabaá hirimamiít neewo ngir marmaraarin

ana oó', Mungú aníng iga sií'

xweera nee tlaatla/ango aníng in gaamiis.

13Xweeraawo alee/isay una firaariím ay matlaatle,

faduueé' gina giqáy adór dirángw wa alé,

tlaatla/aangw nee xweeraawo aníng ina gaamiís.

14«Aníng ana adór halee/amó wá inini'imamiít

ana hununu'umamiít adór hhookír wá ale,

ilaeé' niri maa/uumitiyé' as xumsír gawa,

ana oó', ‹Aá AAKOÓ MUNGÚ, aníng a slahhaá' kuúng masók a slafingw'eé'.›

15Ala gár ni oo' a milá daxta, asma inós ina i axweés,

inósuú kilá' gari tleéhh,

gu'uter'eé' ina daandií /akút,

asma slahh'amuú na sláw baraá muunaáeene.

16«Aá Aáko, muu in slaaf ar muruuwí,

nee aníng sleeme an slaáf ar muruuwí,

slaqwahhooárí ki/isáng nee slafisáng.

17Slahh'ámudá' naa sláw dir'eene an hhooa,

ala kuúng slafingw'eé' una tú/

dír afkú bohóngw gi'i wá ale,

asma kuúng tlakweemaaeé' sleémeero

ina amór aluuwógí kwáhh.

18Asma baraá gi'iwo heé kuúng u sluufiís i kaahh,

tam baraá gwa'araro heé kuúng u xirfayeés i kaahh,

mukdá' sleémeero aa baraá gi'ií /eet

inkihhimuwók ngu harahhifiaaká.

19Múk slaáf kilós an kudá' kuúng u sluufiís

adoorí aníng laarí ni /imiis

xwayliité inkihhimuwók guri dír na/ii'íní alki/ít.

20«AAKOÓ MUNGÚ aníng i ba/amis

atén tari daa'aán ar seése,

baraá doó AAKOÓ MUNGÚ wá alé

slafingwrén sleémeero.»

21Naagáy Isaya iri oó', «Tlawsé' maandasmoodá' taa tleéhh ar mamaá /aantsí taatahhaak ku qasá' gawaá umangwdá' as iwa huungu/i.» 22Hesekia iri malé oó', «Laya a milá as aníng niwa amór doó AAKOÓ MUNGÚ kaw?»

Currently Selected:

ISAYA 38: IRQW

Highlight

Compare

Copy