ISAYA 36

Múk Ashuru i múk Yerusalemúr dae tlaaq

(2Wat 18:13-27; 2Qom 32:1-19)

1Kurkú mibaá nee tsiyáhh iimír waawutmo Hesekia iwa waawuti'ín, waawutmo Senakeribu oo Ashuru gixsadu sleémeero awa yaamaá Yuda, kudá' koo/i gawden gina i haratláy, giri hayóh. 2Waawutmoó Ashuru geeraharusmoó úr oo slaqwaruuseerós guri ya/aáw amór Lakishír wa alé, amór waawutmo Hesekia baraá gixsár Yerusalemu. Geeraharusmoodá' ina sihhiít dír maparír ma'aá wa/amis baraá tlahhsa, bihhaá gawa awa loohír ur ar dír hhuntsitór kaw. 3Kuri al'áy nee Eliakimu garmoó Hilkia kuduú sagesihhtusmoó doó waawutmo, nee Shebna kuduú goousmo, nee Yoa garmoó Asafu kuduú goousmoó muruú inslaslángw wa hariím. 4Geeraharusmooduú slaqwaruuse iri oó', «Tlawsé', waawutmoohúng ku beera', waawutmoodá' úr oo Ashuru i kaahi, ‹Gár ta ak ló'wa harahhif a milá masa tawo migís? 5Kawa xu' axweesanoó tawo i /uuruú húwi nee sagalooa baraá slaqwaraaro? Heesíng ta harahhif a heemá tam aníng iri áhh? 6Ga/aaweek, kuúng múk Misri una harahhíf, inooín a adór daaír aa qet, hee birnga i tliintií' gun dawa /ák, an adór Farao i dirii'i dír mukdá' gwa harahhifi.›

7«Ala kuúng bar kat, ‹Atén AAKOÓ MUNGÚ, Munguúrén un harahhifaán.› Xaysé' Munguúdá' Hesekia aa kiteeraá ilahhooa feé/ nee wa/aamér gawa aa feé/ an kwisingekáhe? Múk Yuda nee oo Yerusalemuwo guri báy, ‹Dír kitaangwí wák na wa sluufmisaak?› 8Gimsé' qwalaas al'axweesantá wayda tleehhaak nee aakooeé', waawutmoó Ashuru. Daqaní aníng farsuú kumér tsár ngu haniís kuungá' bar múk gu i tsa/ám u sleera'a. 9Kuungá' sagadiyusmoó niiná baraá sagadiyuusér aakooeene adór ngura ki/isé' bar kuungá' aqo alee/isoó Misri un daamarandá' nee mukdá' faras ngwa i tsa/ani? 10Tam adoorihe kuungá' kawa xua' aníng ninaqo tawó daqáwi, dákw Mungú iri kaahh dir'eene oo yaamuuká' ngiwa hhaamiis? Xuaak AAKOÓ MUNGÚ aníng ina báy, «Tláw yaamusingá' i haratlaweek ki hhaamís.› »

11Aluuwo Eliakimu nee Shebna nee Yoa geeraharusmoodá' nguri bayé', «Na'ás, axweés ar tsifrír Aramu, asma atén a axamiisaán, ma axwesaar ar tsifrír Ebrania, asma múk gawaá koo/ír wa xumiís i axamiis.» 12Ala geeraharusmoodá' giri mu/aywaáts iri oó', «Ahaá aníng amór aakooeé' i ya/aáw a amór aakoohúng nee kuungá' kiloohúnge? Ahaá, a amór mukwí gawaá koo/ír wá sihhmiitaakáhe? Asma inooínaá kilá' aqo adór kuungá', alaá deelór niinawe /oo/oduuíná kilá' ngin /ayiyá' nee sooxaaín, ngiri wahaná', kiri hhaamiis.»

13Geeraharusmoodá' iri sihhiít, iri tseé' ar afór ur ar tsifrír Ebrania iri oó', «Axweesanoó waawutmo úr, waawutmoó Ashuru iiárií qaasaak. 14Waawutmo i kaahi, Hesekia mu aleeya/aa/amaara' nuwa al/agin. Asma inós kuungá' tu/uto nu aleeslayká. 15Hesekia mu ale ya/a/amaará' nuwa harahhiifórí qamiín ar AAKOÓ MUNGÚ kuwa harahhifa', iwa kaahi, ‹AAKOÓ MUNGÚ atén ti ba/amis looeemaawo, gixsarí ka hayohiiká nee waawutmoó Ashuru.› 16Waawutmo Hesekia mu iiárií qamiimara'. Waawutmoó Ashuru i kaahi, ‹Wayda tleehhaak nee aníng, qwalaasé' amor'eé', daqaní umuú heewo sabiíbu qaymoorós gu /aay, nee seituúnirose, nee iri hhekiit baraá hhalaangós oo kilá', 17ay dír aníng nay hardah nuri huúw ay baraá yaamaá adór koohúng kuká'. Yaamaá balaangw iwa hamdiiti nee difaáiro, yaamaá angaáno nee qamaá sabiíbu kiwa sleera'.› 18Magaahhé', Hesekia kuungá' munduwa hhaáf, iwa kaahi, ‹AAKOÓ MUNGÚ atén ti ba/amis.› Xaysé' baraá munguidaá xoorduuwo, Mungú mukós ngwaa tuu/ dír waawutmoó Ashururo i deéro? 19Xáy, munguaá Hamati i amaáriya' nee awa Arpadiro? Xaysé', munguidaá Sefarfaimu i amoomá? Gaálaay Samaria ngaa tu/iye' gawaá dabaaeene? 20Baraá munguiiká ayeemookae a gaalá oo yaamuuwós ga tuu/ gawaá dabaaeene as kahhó' AAKOÓ MUNGÚ sleeme gixsár Yerusalemu ngiwa tu/i?»

21Ala muu ina qartlamiít, oo axweesantadá' gaa tlaaxw i kaahh asma waawutmo gina hara'ayín ina oó', «Ló' ma /aymu tlaxwaara'.» 22Aluuwo Eliakimu garmoó Hilkia nee goousmo Shebna nee Yoa garmoó Asafu kuduú muruú inslaslángw wa hariím gu gooiím tari amór waawutmo Hesekia káy, tlabaaín ngaa feehhamiisiyé' muruudá' sleémeero oo geeraharusmoodá' aa aaín nguri alki/iitiyé' dír waawutmo.

Currently Selected:

ISAYA 36: IRQW

Highlight

Compare

Copy