ISAYA 35
35
Loohír hhohhoaari
1Darma nee yaamaá kaahaar i qwalaa/iyá',
xaanxaay i qwalaa/ iri /ayuus.
2/Ayór yaariir adór tiqár wariídi gari /ayuus,
Iri baraa/, iri daa' ar qwal/uú yaariír,
xaanxaay xirfuú adór kuduú Lebanoni guri sláy,
xirif sleémeero oo Karmeli nee oo Sharoniro,
muu xirfuú AAKOÓ MUNGÚ guri ar,
nee adór Munguúrén kur úr ngiri ariyá'.
3Mukdá' aa daba' tsatiit /uurií qaasaak,
mukdá' aa diqiyaá ya'a' tsatiit, diqiya' kwa/asak.
4Múk da'ayumiít ku beera',
mune hhe'eesé', ma da'ayumitaara',
Ga/aawaak, Munguúhúng ni hardah
as li/aay nguwa bui,
Inós li/aay gun buu' gawaá wakuuserhúng.
Inós ni hardah as kuungá' nuwa ba/amisi.
5Daqaní taampu niri qaytsitiyá'
nee iawasli iri axás.
6Taqoori iri ni/iín adór saaragmo,
nee afaa wasli iri dá' ar qwala/.
Ma'aay baraá xaanxaywo niri ti'iitiyá'
nee duxe niri wá/ baraá xaanxáy wa alé.
7Hhasángw adór asla oo baraá xaanxaay iri tlawtá ma'aáy tleehhiit,
nee yaamaá naa waxiitiye' niri kutltá ma'aay tleehhitiyá',
didá' tawér i hooti ma'aay ngiri dalaa/iyá'
tsaaráy ngiri alti'iit, tari adór daa'a.
8Loohír ur baraadae i deer,
inós ka bay «Loohír hhoohhoo'.»
Múk daba' tlákw loohidá' ga kala/iiká,
ala aqo har múk Mungú kilooín.
Inooín tam ki iimi bo/e ala i qwaariiaaká baraá loohidae.
9Baraadae diraangw i kaahh,
tam makiito'ór xaraasl i baraadár waarahhká,
makaá adoorí baraadae ki baloó ariiká,
ala loohidá' múk gar ohiím a har mukdá' taa ba/amís kilooín.
10Mukdá' AAKOÓ MUNGÚ aa ba/amís i wayaa'
nin hardihiyá' ay Siyoni ar daa'ángw bara/,
qwal/uú alhhe'eesay wásl i baraá muner'ín.
Inooín nin hootiyá' ar qwala/ nee bara/,
gurhaami nee /ifooro ni faakiyá'.
Currently Selected:
ISAYA 35: IRQW
Highlight
Share
Compare
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
