ISAYA 32
32
Waawutmoó hota ganaá'
1Ga/aawaak, waawutmooko i waawuti'ín ar adór ganaa',
nee geeraharuuse muu guri geeraharahát ar loohír ganaa'.
2Umuúqo heewo tari adór dír tay gogoowi qoomár fur'aaro.
Tari adór dír tay nahhat qoomár tluwoó dukto.
Umuú heewo tari adór yaaér ma'aá koom ar baraá yaamaá kaahaar,
tari adór mahhatír tlaa/ár yaangariir ar baraá xaanxaay.
3Heé ilaawós xumiisá' gi sangw gumaamaiiká,
nee heé iaawós axamisá' iri ak axamiis.
4Múk inslawaay paslaáhh, adór ganaa' gari tsaahh,
nee mukdá' axweesanto kwa'kwaá' axweesani gan aleesláy.
5Heé daktani ku sangw baloó bayká, heé daharuú koóm,
nee al/aymusmo ku sangw baloó bayká, «Heé ta ilaiwawa/i.»
6Asma daktana gár i axwes a daktu'uuma,
nee inslaway'ín gar i qoomeemesi a tlakweema.
Muruú amór Mungú aasaaká ngun tlehhiitiyá',
nee axweesanoó tlákw daanduú AAKOÓ MUNGUHE ngun kaahiyá',
múk qwariít ngun qwárkwí ga/ayá',
nee múk waxiít ngun /itiyá' ma'aywo.
7Al/aymár al/aymuuse ka tlaakw,
inooín tlakweema ngin ado warqeemisiyá',
as kahhó' narkutmo nguwa qwaareesiya' ar lamtaín,
tam geeraawo gadaádá' narkutmo i slai i qoonda.
8Ala heé ta ilaiwawa/i gár i leelehhiiti a ilaiwa/ame,
nee inós muruú ilaiwa/ame gun aleekalaa/.
Sakwasleema nee ki/ima
9Kuungaásingaá /ameenár aa yaandahhe'es,
tlawaaré', aníng iiárií qaasaré'.
Kuungásaá dasuú a taqnaa/umiit,
axweesante'eé' iiárií qaasaak.
10Baraá guruú kurku wake
kuungásingá' /ameenár aga taqna/uumite' a daaraxatá',
asma sabiíbu u hamaresa'aaká,
nee mamaá ta sleera' i kahhiyá'.
11Kuungásá /ameenár a yaandahhe'es daaraxé' daxta
kuungásingá aga taqna/ute' kitlkitlé' daxta,
Tlabaahúng sleémeero duuxaak, /aankwetsimé',
guniyadu siinootaak gawaá afeetlerhúng.
12Da/eewerhúng puupuxumisaak as gurhaamír daanduú qamuudá' aáng sla'atamiisa'a
nee as sabiíbudá' aáng ló'wa laqwaliím,
13nee as yaamaá muk'eé'
kudá' tinda alti'iít nee fuquráy nee laqaya',
maraay kudá' naa hatsiye' múk qwalaala/a,
nee as gixsaduudá' qwalaala/á'.
14Asma do'oduú waawuti'iima ku kilós geexáy,
nee gixaarí muu yaariir ka xaanxaay tleehh,
goongooama' nee /aampudá' tawa xun,
i mar'o tleehhitiyá' ay kureeraá kureér,
daqoó darma iri baraadá' wa qwalalaa/,
gixsadá' iri qawtantá bee/aangw tleehhít.
15Adoorí in kumaamít ay dír qeeruú Mungú kunguy gáwtá wá ku'uusi gawaaréní alé,
daqaní xaanxaay iri warqáy tawa qaymór balángw hamaaremiis,
nee qaymór balángw hamaaremiis iri darma tleehhít.
16Sakwasleemár ganaa' kari tleehh tam baraá xaanxaywo,
nee hotaá ganaa'á' niri baaliná' tam baraá qamaá balángw hamaaremisa'a.
17Nee as sakwasleemár ganaa'a muu iri hoot ar wayda,
nee as hotaá ganaa'á',
muu in hoot ar amohhooa nee saxareema ay kureeraá kureér.
18Muk'eé' iri hoot ar wayda,
nin hootiyá' ar amohhooa nee ar yaanda hhe'eesa.
19Gartá wakuuse iri fák
nee gixsar'ín iri hhaán.
20Kuungá' a múk amohhoó' asma an dahasiindá' dír ma'aay i dirii'iya',
hikwaahúng nee daqwayerhunge in hi'iimitiyá' ar adór ni slaiya'.
Currently Selected:
ISAYA 32: IRQW
Highlight
Share
Compare
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
