ISAYA 33
33
Firo as alee/isaay
1Tsaxwaawók kuúnguusíng hhitaatiím,
ala kuúng taa hhitinká.
Tsaxwaawók kuúnguusíng al/agaagiím
ala kuúng taa al/ayiiká,
bál bar aga hhe'és hhitaaro, kuúngú kilá' turi hhitín
bal bar muu al/agingo ugwa hhe'és, kuúnguú kilá' turi al/aay.
2Aá AAKOÓ MUNGÚ, atén ti gurtleer,
asma atén kuúng una harahhifaán,
kuúng masók a baqmoórén umuú looár tlawa,
nee masók an ba/amusmoorén qoomár slahha'amko.
3Muu in ta'aaín as xuuraaír afoorók,
xoordu nin diyaa/atiyá' as sihhtanoorók.
4Mukók kudá' taa ohín kuna burumbuúr adór naanaga,
muu kun i /akumiit adór tsaxwi'i.
5AAKOÓ MUNGÚ aa xirfuút asma inós i gáwtí dirii',
Inós Siyoni gan dalaa/ ar sakwasleemár ganaa' nee hotaá ganaa'á'.
6Mungú tari kudá' tundus dinqisiiká baraá slafingwhunge,
nuri ló'wa ba/amiimis, nuri sagalooárí hanmiis nee xu'utiro.
Qaasirhúng ar ur tari AAKOÓ MUNGÚ kuwa ilaiwawa/a'.
7Ga/aawaak, muk'ín oo miguuse i baraá lohdu wa /aa/amín,
ya/abuuser'ín tidár wayda /aa/eewo aa slahhá'.
8Loohidá' ur gár ga ohiim i káhh,
hhaytusmoó loohidár waraáhh i kaahh,
Al'axweesanay kwa warqemamiís
lamabu'uuse kaa waqaá'
heé hee gu heé wá tsatsahhaám i kaahh.
9Yaamu i tsuunqumiisiyá' nee na kahiyé',
Lebanoni ina qor'ót, iri kát,
Sharoni ina adór xaanxaay tleehhít,
nee loo/ór xaa'aá Bashani nee Karmeliro i páhh.
Mungú i wakuuseerós nanaaqán
10AAKOÓ MUNGÚ i kaahi, «Daxta aníng ni tláw,
daxta aníng ti amohhe'eés, daxta aníng ti kilooeé' xirfayeés.
11Muruuhúng sleémeero oo taa qoomaamesé' a adór muundáy,
nee gár ta sleera baraá muruuhúng kwisinge a slaapú,
hiinsluuhúng an asltá kuungá' nu /aay.
12Xoordu kin daa/ adór múk busluú /awák gu tlehhiít
tari adór laqayaá ta tsaát kiri qaás baraá asla.
13Kuungaásingá sawen tlehhmi'iieé' iiárií qaasaak,
nee kuungaásingá' tsewen /uurueé' ya/aamaak.
14Múk tlakuuse i da'ayumiit baraá Siyoniro
mukdá' Mungú gu ilaiwawa/aaká i daaraax nee ta kaahi,
«Baraá tla/agwrene heé qiítl dír asltá /ayiima,
baraá tla/angwrene heé qiítl iwa iwiiti dír asltá baloó gwa'aaká.»
15An heé hota ganaá' nee oo axweesani hhó'
kudá' slaasláwár /ayta ga waaqaqaá',
an kudá' slukma ga baloó i qaytaaká.
Kudá' kángw tseerdaá muu kiwa ku'umiisi axamisuuwo gu sla'aaká,
nee kudá' ilaawós gaa gumamaa' as gár tlaakw mingiwa ár.
16Heé adoorí hotaawós i gawaá gawa,
dirós tidá' amohhoo' kaa harweér ar koo/ír gawit ar tla/u,
muruú /aymaarós kun hanmiis umuú daqto,
nee ma'aá wahaangw gi baloó dakuusiiká.
Xirfuú aluú wa hi'iít
17Kuungá' hhohh'aarír waawutmo a aandá'
nee yaamaá i sawaawuti'ii'in i aandá' adór nira weelaahatiyé'.
18Inslawaywók gár dae tlaaq ar aa waarahh gari insláy tari o',
«Mukdá' atén ta fadiit nee ohme gaa qoomeemees ar xooslmo i amoomá?
Mukdá' /aampuurén awa xuuma ga tsawtsawumamiis i amoomá?»
19Kuungá' múk sagegawdén u baloó aanda'aaká,
tam múk axweesani bó/ oo ta tsatsahhanda'aaká sleeme,
múk axweesantaín ga mororohhiím ar ta tsahhká.
20Gixsár Siyoni i qaytaak tidá' deeloorén ar ur kawa tleehhaán
gixsár Yerusalemu xuxuaak
yaamaá na xasliitiye' nee heemaduwós ki gawden,
Kaaka/amaawós ki baloó tu/iiká
nee him'eerós ka baloó tlaaqiiká.
21Ala AAKOÓ MUNGÚ ar Aleesleemuwose in baraadií dirii' as atén,
yaamaá yau diren nee duxeero.
Miringe nee hhansi'iwo ki baraadár uhisiiká
tam meélír ur baraadá' gir otká.
22Asma AAKOÓ MUNGÚ an kudá' kwasleemaduurén ngi tlaáq nee ti sawaawuti'ii'iím,
AAKOÓ MUNGÚ an waawutmoorén, inós atén tin ba/amis.
23Kuungaá Siyoni, him'erhúng i sololo'ót,
dabér do' tseegaro ga alesleeraaká
tam ngiwa bihheérí ot,
an qoomár muruudá' tinda haasaáng wa hayóh kuwa qasmiisi,
tam toqooráy sleeme muruuda' gun sláy.
24Baraadae heé oó', «Aníng a tiíq.» i kaahh,
múk baraadá' wa hoót tlakweemaaín sleémeero ki gurtláy.
Currently Selected:
ISAYA 33: IRQW
Highlight
Share
Compare
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
