ISAYA 31
31
Mungú gixsár Yerusalemu ga de'én
1Tsaxwaaín mukdá' Misrirí alee/isoó firór aa'áw
nee kudá' farasuú harahhifafiít.
Mukdá' gaardaá slaqwara ngi harahhifá' as kiwa yaariír,
kudá' múk farsuú i tsa/a/ám gu harahhiíf as tawa múk /uureemaá koóm.
Ala Kudá' Hhoohhoó' oo Israeli ngu i qaytsimiitiaaká,
tam sleeme AAKOÓ MUNGÚ ngu yaahamiisiaaká.
2Tam adoorihe Mungú ku sagaloó', i slahh'amuú huwahuuw,
Inós axweesantós ga warqeesiiká,
Ala in sihhiit iwa slaqwi nee maraá múk tlákw
nee in slaaqw nee mukdá' múk tlakweemaá tlehhahhiít gu alee/iimamiís.
3Múk Misri a muu, inooín a Munguheeká,
nee farsuuín a makaay, slám a qeeruwoká.
Qoomár AAKOÓ MUNGÚ dakós burngwa tleés
xooroodá' ale/isoó hanmamiis kan gee/aasl nee tidá' ta alee/iimisi in hú',
xoorduuká tsaraawo niri hhaná'.
4Asma AAKOÓ MUNGÚ aníng ina báy,
«Adoodá' diraangw laqaá na/oó diraangw ir dír sluqoorós wá /ortlaatliti,
tam qoomár boohhár de'eemuuse barka ateét as nguwa tlatlahhasiya',
inós i hhasliitiiká tseeór mukdae,
tam afor'ín sleeme gu dae tlaqká,
Adoorí an adór AAKOÓ MUNGÚ Aleesleemusmo nir hardihi.
As iwa slaqwí as tloomár Siyoni nee gongooamawós.
5Adoodá' tsir/i do'ós ngur harwedaadit
an adór AAKOÓ MUNGÚ Aleesleemusmo gixsár Yerusalemu ngir xun sleeme.
Inós Yerusalemu gan xún gari ba/amis
Inós gan gurtláy gari tuu/.»
6Aá múk Israeli, ki/é' amór kudá' taa ló'wa sié'. 7Asma baala ni xeér ar kuungá' munguiihúng kudaá slaqsi'i kudá' taa qaaliindé' ar muqslár peésa nee ar sahaábu kiwa sia', kudá' taa dabaahúngár tlehhé', nuri dahaasiyé' baraá tlakweema.
8Múk Ashuru ku tsuu/ ar paánga ala ar dákw heewooká.
Inooín kin /aay nee paánga ala ar dákw hee ba/a,
múk Ashuru tari /akumiit,
nee masoombar'ín gadiyér tawa bihhií noongo'otiiká gari tléhh.
9Waawutmooín kuduú adór tlaa/a iri /akuút daeero,
nee geeraharuuseerós bendeérar'ín gari geexeér as dae.
Adoorí AAKOÓ MUNGÚ gan kah kudá' asltós baraá gixsár Siyonír wá oh.
Kudá' asltós ar gufteeri baraá gixsár Yerusalemúrií dirii'.
Currently Selected:
ISAYA 31: IRQW
Highlight
Share
Compare
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
