ISAYA 30
30
Alee/isoó Misri mu harahhifara'
1AAKOÓ MUNGÚ i kaahi,
«Tsaxwaaín na/iidá' aníng iga aahhiye',
kudá' gurbu'úngw sla'á', ala kwe'eé' ngu slaiiaaká,
kudá' dinku'uumár nee muu ngi sla'á', ala ar qeeruueé' ngi slaiiaaká,
as kahhó' pa/ángw tlakweema ngir iinkikii/iyá' nguwa slaya'.
2Inooín nina Misrírí /eetiyé',
aníng sleeme iga yaahasi'iiká,
dír guwaay ngina leelehhtuú ayé' dír Farao as ngiwa xun,
nee amohhooa ngiwa slaya' baraá xuumár múk Misrír wa alé.
3Gawaá adoorihe, xuumasír Farao kuungá' nu mureekés,
nee amohhooár taa sleeré' baraá xuumár Misrír wa alé, kuungá' nu niqár eér.
4Asma tam geeraharuuser'ín naa hardati Soani,
nee tam ya/abuuseerós aa hardati ay Hanesi,
5inooín sleémeero ki mureekees
ar loohír mukdá' inooín /iisaro gi aslawká.
Múk inooín /iisaro gi aslawká sleeme ki slaasláwarí hanisiiká,
ala gár ni aleeslaya' aqo har mureekeesa nee niqaay.»
6Kaangwí an iigu'utuú Mungú aa laqán daanduú makaydaá baraá xaanxoó bihhaá basa,
«Ya/abuuse i waaráhh ar baraá tla/ángw yaamaá slahh'amuú koomá',
yaamaá direeraá /ameena nee awa yaqambeero ngi koomá', nee daysheero nee dayshér ti gileehha.
Inooín daqaari'iimar'ín nga tsa/aasiyé' gawaá daanduú daqwayer'ín,
nee gawaá daanduú angamíar'ín,
as tawa daqay amór múk gi gaa wa buaaká.
7Asma alee/isoó múk Misri a adór tawo nee kahhaay.
Gawaá adoorihe aníng Misri ngiri báw
‹Umuuwók a dayshamoó#30:7 Dayshamo: Baraá tsifrír Ebraniaro gár taa gooín a Rahabu. aa xasliit.› »
Múk aa ia' waslees
8Mungú aníng iri báy,
«Tláw /aymi'iiká' gooimeek gawaá peehhi,
dír geeraaín tiwa gooiin
baraá kitaábu ti dahas,
as kahhó' iwa lamabu'uungw tleehhitiyá' de'emaá hi'iita'a
ay alhhe'eesay wasle.
9Asma mukwí a múk aa dee/aanuut,
inooín a na/aá lamuuse,
a na/aá intsaahhatisár AAKOÓ MUNGÚ ngi sla'aa'aaká axaasaro.
10Inooín iigu'utuuse ngin babaya', ‹Iigu'utu mu ara'araara',›
nee aarusmo ngun babaya', ‹Muruurén oo ló' mu kaahaar,
ala muruú atén ni sla'aan na alki/iiteek,
muruú al/ayma na dahareemiseek.
11Warqawé', lohdaá looeema mawaak,
atén ti meere' mawa kumitaán daanduú Mungú axamisuuwo,
Kudá' Hhoohhoó' oo Israeli.› »
12Gawaá adoorihe, Kudá' Hhoohhoó' oo Israeli i kaahi,
«As kuungá' axweesante'eé' kawa sié',
tari ak naagisé' sagaagawduuwo nee baramaaniro,
muruuwí kuri harahhifé',
13gawaá adoorihe, tlakweemasingá' kuungá' nu qwaareesiyá',
adór koo/ír gáwtí tleér ar aa tsatit,
adór koo/ír aa tsatit iri yaamií hú' hamtidár kilae.
14Tsatiitarós a adór gwa'arár hutlaay,
adór hutloó aa suwaawa'aat,
tam qaambeesamoó asltá ya/aám i kaahh,
laqaá oo ta ma'ár islaakwi baraá hhalaango i kaahh.»
15Asma Aakoó MUNGÚ, Kudá' Hhoohhoó' oo Israeli i kaahi,
«Kuungá' an ba/aandá' ar loohír niwa amor'eéní ki/a' nee tawa dir'eéní xaslita'.
Kuungá' bara xaslité' nee aníng bira harahhifé',
daqaní /uuru u sleerá'.»
Ala kuungá' adoorí aga slai'iiká.
16Kitangose kuungá' tari oé',
«Aasla'áy! Atén an /akumitaán ar farasuú ti'ii'íngw baál.»
Kuungá' aqo ta'aaiindá',
tari malé oé', «Atén makaá ti'íingw baalá' tinar tiaainá'.»
Gawaá adoorihe mukdá' kuungá' nu gusisiím, ti'iingo kuungá' nu baa/.
17Mukhúng oo kumuú wák in tlatlaahh barkwa dae tsaát nee heé wák,
ala múk kooán burna iigahhaát, kuungá' sleémeero an tlatlahhá',
kuungá' tari metá' adór xa'anoó bendeéra oo gawaá ságw tlooma,
tari adór layár taa qaás gawaá gongooamo.
18Gawaá adoorihe AAKOÓ MUNGÚ kuungá' nu daamaarán, as nuwa gurtlay.
Inós ni tláy as kuungá' nuwa gurtláy.
Asma AAKOÓ MUNGÚ a Mungú sakwasleemár ganaa' ga tlehhahhiít.
Múk amohhoó' a kudá' inós gu daamaraám.
Mungú mukós gu tsuuq
19Kuungá' múk Siyoni, kudá' Yerusalemúr hootá' kuungá' a sangw baloó /aa/eé ki/a'aaká. Asma looeemawo Mungú kuungá' nu gurtláy as afór /aa/eehúng, qoomár /aa/eehúng birnga axaás, inós kuungá' nun mu/aywaats. 20Tam Aako kuungá' na slahh'eemisi nee tam naa muxi, ala tam adoorihe, intsaahhatusmoohúng aa nahhaatiiká, nee kuungá' intsaahhatusmoohúng u aandá' ilaahunge. 21Baraá loohiro bar papaaslá' bartá doó basáy laqaá ar doó /iyáy, afo aqo axasá' amór aluuhúng ar kah, «Loohi a tí, loohirí nar oohaak.» 22Kuungá' munguiihúng kudaá murslaaqat kudá' taa qaaliindé' ar peésa, nee kudá' taa qaaliindé' ar sahaábu kuri siá', kuri amór saáwí kwahhá' adór gár ta waki, kuri beera', «Tsumumu'uút.» 23Mungú tluwaay nguri haniis oo kuungá' tar dahasiinda', balaangw kuri sleerá' oo tindi hamareesi nee yaamu, balángw yaariír nee oo bu'uút. Baalaadae hikwaahúng sleeme qawór yaariir ngi slayá'. 24Awerhúng nee daqwayedár dooslaro, kin dimbeé /aymiis ar muruú /aymár taa maamahhaás, nee oo taa haritleés ar iimpe. 25Baalaadá' wakuuserhúng barka hhaamiís, nee /aampar'ín tidá' tleer barka daáhh, kutltá ma'aay nin gawaá tlom'ií wa wá/, nee gawaá gongooamawo. 26Baalaadae slahhaangw in gwa/aat ar adór tsee/amá, nee tsee/amá in gwa/aat sagáwa faánqw wa alé, adór tsee/amuú deelo faanqw kuna baalár wák gwa/atís. Adoorí i tleehharút bál AAKOÓ MUNGÚ mukós kudá' aa muúx burngwa huungu/uusár áy, nee inkaahha'aá mukós birnga tseegár áy.
Mungú múk Ashuru gu muux
27Ga/aawaak, AAKOÓ MUNGÚ ni amór saáw wa tláy.
Aa daa/atúy buhhtaawo, nee quuír yaariire,
afkós aa haáts xarasleemawo,
nee tsifrangós a adór asltá /ayiim.
28Hiinsluuwós a adór yaaér wa/amiim,
adór yaaér aa hats ay isa,
as xoordu ngiwa baraá guruú tuumbírár uhisi as ngiwa hhaamisi,
nee hima nguwa tseegi gawaá taqesamaá xoordu oo gi huúw baraá qwanaay.
29Ala kuungá' múk Yerusalemu an da'á' ar qwala/, adoodá' muu i /imaamisi xweeraá deelór ure. Qwal/uú yaariír nuri áy adór múk daá' ar firiímbi, oo tsa/aa/ám amór tloomár doó AAKOÓ MUNGÚ, amór tlaa/ár Israeli. 30AAKOÓ MUNGÚ afoorós tidár aleesleemu gan tlees, as kahhó' kawa axaasi nee muu sleémeero, nee slahhtós tidár /uuru kawa ari ar buhhtaá yaariir, nee tsángw asltá /ayima nee kwarara/aaro nee duktá yaariir ar tluwoó tlaa/e. 31Xoorór Ashuru iri da'ayút qoomár afór AAKOÓ MUNGÚ birnga axás nee birnga muúx ar hhartós. 32Umuúqo slahhtá AAKOÓ MUNGÚ dír múk Ashururo tin alkoomaakoná' nee afór puunda nee ar seésero. Inósuú kilá' in slaaqw nee múk Ashuru ar adór dae tlaaq. 33Asma dír waawutmoó Ashuru kway da/i kaa qaroó amohhe'eés iimír aange. A baraá bohóngw yaangaariír oo bihheérí intlaáxw, oo taa ásltí slaáx ar migiruú yaariír. AAKOÓ MUNGÚ gun hiinsluwósí ufaahh kuduú adór asltá wa óh as nguwa da/i.
Currently Selected:
ISAYA 30: IRQW
Highlight
Share
Compare
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
