ISAYA 29
29
Ya/abtór gixsár Yerusalemu
1Tsaxwaawók, aá gixsár Yerusalemu,
kitángw ilahhooa kawa hanmiisi dír Mungú,
gixsadá' Daudi aa xaftós tleéhh.
Kureeri i hardarahiyá' nee i waraahhiyá',
nee deeloorók ar uren i kumít iwa tleehharumit.
2Tam adoorihe, aníng Yerusalemu a slahh'eemiís,
tari /aa/amín nee tari tsuunqumiis,
gixsarí iri kitángw ilahhooa tleehhít.
3Aníng xafoó slaqwaruuse un harweér ar Yerusalemu,
aníng ngiri /aampúr harweér,
aníng múk kiíng i haraweél ngun amorógí tleés.
4Kiíng baraá yaamuwo tin amór saáwí kwaahh tari amoodá' wa axwés,
afoorók niri baraá teerír ilaawáts,
afoorók niri yaamuú wa ilaawáts adór ar múk aa qaatl,
nee axweesantók niri saasáhh baraá hhapér wa alé.
5Wakuuseerók tidá' yaariir i adór teeri tleehhít,
nee mukdá' kiíng iga baramaanumaamiis ku adór tsinór balaangw tleehh,
kaangwí in gaanslár tleehharuut.
6AAKOÓ MUNGÚ Aleesleemusmo kiíng i alee/iis
ar kwarara/a nee kunseeli nee afór ur,
nee ar bambaao nee duki nee tsángw asla oo /ayiím.
7Nee boohhár xoordu sleémeero kudá' slaqwá' amór Yerusalemu,
kudá' slaqwá' amór koo/ír gawit ar gixsa as ngiwa baramaanusiya',
in adór tlata tleehhitiyá', nee adór iigu'utuú xweera.
8Boohhár xoordu sleémeero kudá' amór tloomár Siyoni slaqwá',
tari slaqás nee heé qwariít oo tlatitiím kwaáo i /ayín,
ala bira daarakiít qwarkós iqo adoodií kaahh,
laqaá adór heé waxiít oo tlatitiím kwaáo ma'aay gina wáh,
ala bira daarakiít aa slaaqamiít waxeero, waxeerós aa fakká.
Tsaxwa as gurbu'uungw kuwa siaasi'i
9Waa/oo/é' kiloohúng ta baraá waa/oo/amórí metá',
taampumité' kiloohúng ta baraá taampu'umárí metá'!
Oniimité' ala ma oonimitara' ar difaái,
ta/amiité' ala ma ta/amiitara' as buurár aa hamat.
10Asma AAKOÓ MUNGÚ qeeruú gu'utér ilo' ngi huwahuúw,
ngwa gawaahúngí ku'uús,
nee ilaá kuungaásaá aaruuse gina tuuntuúk,
nee sagér kuungásingá' muruú araa'ará' gana giwísh.
11Iigu'utuú muruuwí sleémeero birna dirhúngí hardáh, tari adór axweesanoó taa baraá kitaábií gooín oo taa tuuntuúk kuri dugnií qaás. Kitaábuudá' bura húp dír heé soómár xuú', kuri beér, «Gám kitaábuuwí soomusang.» Inós in ooi, «Anuú aslawká asma kwa dugnií qaás.» 12Nee kitaábuudá' burka huúw dír heé soomár xuaaká kuri bay, «Gím kitaábuuwí soomuusang.» Inós in ooi, «Aníng soóma a xuaaká.»
13Asma Aako i kaahi,
«Mukwí aníng in sluufmisiyá' ar afér tawo,
nee in xirfayeemisiyá' ar axweesanoó tawo,
siwaadár kilae muner'ín ka sawen dir'eene,
nee aníng in ilaiwawa/iyá' ar hara'ayár taa dir'íní intsaahhatís nee muu.
14Gawaá adoorihe, ga/aawaak,
aníng tlehhmuú waa/oo/amo u malé tleehh dír mukwí,
tlehhmuú waa/oo/amo nee oo dae tlaáq.
Mukdá' sageelooén iri sageeqwaar,
nee daharuú mukduú daharuú koóm iri suquut.»
Harahhifór deelór hi'iit
15«Tsaxwaaín mukdá' axweesanay'ín gu dír AAKOÓ MUNGÚ wa lu/u/uúm,
nee mukdá' tlehhmi'ii'ín baraá giwtírí diriiá',
mukdá' káh, ‹Heé atén ti ga/áw a heemá? Heé atén ti xuú' a heemá?›
16Kuungásingá' muruú /aankwartsimá',
xáy, iqo ya/aánda tleeusmo kuwa harafari bartá tleei?
Tam xooslár tleei heedá' gaa tleehh nguwa beer,
‹Aníng kuúng iga tlehhká.›
Laqaá xosluudá' taa tleéhh tleehharusmooín nguwa beer,
‹Kuúng gár ta xu' i káhh.› »
17Deelór aa met ka ureeká,
yaamaá Lebanoni ki warqees tari qaymór wahhaar,
nee yaamaá wahhaará' kiri warqees tawa darma.
18Baalaadae múk ia' waslén
axweesantá baraá kitaábu barka soomuús ga axaas,
nee ilaá taampu niri qaytsitiyá'.
19Múk tsaén qwal/uú tsuaaiím gun sláy baraá AAKOÓ MUNGUHE,
nee múk narkuute iri ló'wa baraa/ as Kudá' Hhoohhoó' oo Israeli.
20Asma mukdá' baramaanumaamiís ku qwaarees, nee kudá' niqaaqimá' i faakiyá',
nee mukdá' gigdaadiím as tlakweema kiwa tleehhi ku hhaamiis.
21Mukdá' baraá kwasleemaro axweesanoó múk hhitatiím,
mukdá' gan'amuú hee gu warqeés ar lamemooín,
mukwí sleémeero ku qwaarees.
22Gawaá adoorihe AAKOÓ MUNGÚ kudá' Abrahamu gwa ba/amis, daanduú Yakobowo i kaahi,
«Xwaylár Yakobo ka baloó murekesiiká,
sager'ín mureero ngi malé yaamií xupu'usiaaká.
23Asma qoomár na/ii'ín birnga ariyé',
kudá' aníng naa inooíní haniís,
inooín umuueé' nguri xirfayeesiyá',
umuú Kudá' Hhoohhoó' oo Israeli nguri xirfayemisiyá',
nee Munguú Israeli nguri ilaiwawa/iyá'.
24Mukdá' baraá hotaá qeeruuwo aa dakuus tsaahha gari ya/án,
tam mukdá' qununu/umamiít intsaahhatisa gari ya/án.»
Currently Selected:
ISAYA 29: IRQW
Highlight
Share
Compare
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
