ISAYA 28
28
Gurbu'utá waawuti'iimár bihhaá /iya
1Tsaxwaaín, xufutuusér daara/aam ar Efraimu.
Xirfuuín i qwaar adór /ayór aa kat.
Xirfuudá baraá xatstá wahhaárí dirií', nee gawaá sagér mukdá' xufta aa bál.
2Ga/aawak, Aako heewós oo migusmo, nee oo /uuruú koóm gwaa sláy,
inós i hhaamimiis adór tluwoó tlaa/e nee oo duki,
a adór tluwoó duki oo yaariír nee alwuo.
Inós kuungá' nun yaamúr tsataat ar xarasleema.
3Daara/uusér xufimamiit ar Efraimu
ka yaamií nakaa/arúy.
4Xirfuuín oo hhohh'aari aa qwaár adór /ayór aa kat,
xirfuudá' baraá xatstá wahhaárí dirií',
iri adór /aantsí tleehhiit ar aa hamat qoomár age iwa ti'imiiti,
hee birnga ár gan buu'
gari /aay hamtidár kilá'.
5Baalaadae AAKOÓ MUNGÚ Aleesleemusmo in slamángw xirif tleehhiit,
iri adór slamángw hhoohhoó' tleehhiit dír mukós kudá' aa meeti.
6Dír mukdá' kwasleemadaá tlaaqa,
inós in qeeru tleehhiit oo kwasleemár ganaa',
iri /uuru tleehhiit dír mukdá' gixsár xuuma.
Isaya nee aaruusér xufiit ar Yuda
7Múk hatlá' i deer oo aa oonimiit difaáiro,
múk ta/amiít as buurár aa hamat,
kaahamuusér Mungú nee aaruuseero taa oonimiít as buurár aa hamat,
niri leexuutiyé' as difaái,
inooín i ta/amiitiyá' as buurár aa hamat,
baraá iigu'utuwo muruú aa qwaar ngun kaahiyá',
nee baraá sakwasleemaro in dakumiisiyá'.
8Meesadu sleémeero kaa niíq wa/ariwo,
dír taa meetagasiiká i káhh.
9Inooín aníng in niqimiisiyá' iwa yaahamisiya',
«Heé i intsaahhatisi a heemá?
Heé i ya/abtoórí ooi a heemá?
A na/iidá' naa sangw /oní'i?
Kudá' taa sangw iseemaá /íti?
10Asma hara'aya gan daanduú tiqá' wa oo',
nee axweesani gan gawaá tiqá' í tsa/aas,
daqtihe tí gan oo', daqtihe tiqá' gan oo'.»
11Gimsé' daxta, AAKOÓ MUNGÚ i axwees dír mukwí,
ar axweesantá tsifir hatlo,
in axwees ar tsifrír múk dahaaye.
12Tam adoorihe inós aáng gina báy,
«Dír hungu/usarhúng arengaay,
heedaádá' aa slaaqaat i hungu/uusi,
diirí an dír tay hungu/usa'.»
Ala inooín iaaín ngina alií naatsiyé'.
13Gawaá adoorihe, AAKOÓ MUNGÚ inooín gin adór na/'ií wa i axwees,
hara'aya gan daanduú tiqá' wá oo',
axweesani gan daanduú tiqá' i tsa/aas,
daqtihe tí gan oo', daqtihe tiqá' gan oo',
as kahhó' niwa /akumiitiya' niri alií huuhu'uná',
niri qeqtiná', kiri uhín, kiri ar tláy.
Tlaa/ár iihhafiiri ar Siyoni
14Gawaá adoorihe, kuungaásingá' niquuse,
axweesantá AAKOÓ MUNGÚ iiárií qaasaak,
kuungásingá' waawuti'ii'imá' baraá Yerusalemuro.
15Asma kuungá' a kata',
«Atén nee gwa'ara alqado aga tleehhaán,
nee gi'i taa axweesani slawaán,
qoomár amotlakwe bir taa i hardát,
amoorén ngi keeraaká,
asma lama ana dír guwayrén tleehhaán,
nee al/ayma an dír tay nahhataan.»
16Gawaá adoorihe Aako, AAKOÓ MUNGÚ i kaahi,
«Ga/awaak, aníng tlaa/ár iihhafiiri a qaás baraá gixsár Siyoni,
a tlaa/ár taa iiár,
a tlaa/ár tlaxo gawit ar do' ir gawduy, tlaa/ár iihhafiiri ar do' ir gawduy,
‹Umuú heé gaa haratlintii' i kwareeiiká.›
17Aníng sakwasleemár ganaa' anar gadiyuús tawa xooslmooeé' oo qoomeemes,
nee hotaá ganaa'á' tawa hhutlmoó qoomeemes,
lamemoohúng kudá' ta i gogoba' kin xoontsoroo' nee tluwoó tlaa/e,
nee al/aymarhúng tidá' tay nahhmita' kan ar tlay nee alwuór ma'aay.
18Daqaní alqadorhúng tidá' taa tlehhé' nee gwa'ara iri paysút,
kangwdá' nee gi'i tiwa axweesani sleeré' i tleehharutiiká,
qoomár amotlakwe burna i hardát,
kuungá' sleémeero nun yaamií dahás.
19Umuúqo baalár amotlakwe iwa ayaahúngár waarahha aqo nun dásl,
umuú matlaatlér xawa aqo nun i hardát,
umuúqo tlaatla/ango nee xweeraawo,
kángw adór kwí kuwa axas i ló'wa dae tlaaq.
20Asma dír kuungae a adór heé aa qaat gawaá qatanír ququmaar,
nee adór heé tsatmír inqwaari gaa uuntsuus.
21Asma AAKOÓ MUNGÚ ni sihhiit adoodá' aa tleéhh amór tloomár Perasimuro.
In daa/atúy buhhtaawo adoodá' aa tleéhh baraá xatstá Gibeoniro,
as tlehhmi'iiwós kudaá' waa/oo/amo aa qoomeés ngiwa tleehhi,
nee gadiyeérós tidá' xuaawasl ngiwa tleehhi.
22Gawaá adoorihe, kuungá' ma niqiimara'
as tsegmuuwo mutunduwa harwaarahhaás.
Asma aníng kángw qwanoó yaamu ugwa axaás,
amór Aako, AAKOÓ MUNGÚ Aleesleemusmo ngin daahh.
Sagalooár Mungú
23Iia qaasaak, afor'eé' iiárií qaasaak,
iia qaasaak, axweesante'eé' iiárií qaasaak.
24Heé doósl as iwa dahaasin doosla gaqo tawo laaláya?
Qaymo gaqo tawo doósli wa'aá tsare iri malé kii/.
25Qoomár birnga hhe'eés dooslaro,
inós maa/aará gan tsaafiis nee balángw ta bay jiraro,
angaáno guri dahaas ar hhai nee angaanoduú shayiíriro,
nee xa'anoó ta bay Kusementi guri dahaas baraá afaá qaymoorós.
26Hee gár i tleehhi ga xuu',
asma kuna intsaahhatís nee Munguúwós.
27Maa/aará nee jiraro ki muxaxinká ar difiitamo,
tam gaárír hikwa ka gawaadár uuruxaxinká.
Ala maa/aará gár kar muxaxin a paa/almo,
nee mamaá xa'anoó ta bay jira gár kir muxaxin a hhara.
28Dooslusmo bir aangaánó slahhán,
gu muxaxinká ay dír i naasuuti.
Adór angaáno kur muxi ar gaárír awe ga xuu',
tam ilemidaá angaáno gi tsu/iiká.
29Xu'utirí sleémeero amór i dahh a amór AAKOÓ MUNGÚ Aleesleemusmo.
Hara'ayaarós i waa/oo/amór koón,
sagalooarós i ló'wa ganá'.
Currently Selected:
ISAYA 28: IRQW
Highlight
Share
Compare
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
