ISAYA 25
25
Daa'ángw sluufaay
1Aá AAKOÓ MUNGÚ, kuúng an Munguúeé',
aníng kuúng un xirfayeés nee un diidi'iimiís,
asma kuúng muruú waa/oo/amór koóm una tléhh,
muruuwók kudá' taa qoomés iimír aange,
aqo un boo/és ar inkihhimu nee looeema.
2Asma kuúng gixsa ana /aantani tléhh,
nee koo/ír gawit kari gixsár aa hhiturut tléhh,
nee maraá dahaaye tari sangw gixsaroká,
sleeme ki baloó /abeesiiká tleehhamoro.
3Gawaá adoorihe, múk /uuremaá koóm kuúng u xirfayeemiis,
nee gixsadaá xoordaá tlakw kuúng uri da'ayumitiyá'.
4Asma kuúng ana dír guwaay tleehhít dír narkutmoowo,
ana koo/ír gawit tleehhít dír heé aa aleni oo baraá slahh'amu,
ana dír guway tleehhít qoomár bambaaór xaraasla,
nee ana mahhtí tleehhít qoomár siree/iro.
Asma slahhtá múk tlákw i xarásl
adór bambaaór fukukuú' gawaá koo/i.
5A adór tsee/amuú siree/i oo gwa/aát baraá yaamaá kaahará',
ala kuúng tsimaahhír dahaaye an xasltís,
adór tsee/amuú taa óh nee huunki,
gawaá adoorihe, daa'ángw múk tlákw ku slar/atis.
Mungú i muruú /aymár úr amohhe'eemiis
6Gawaá tloomár Siyoniro, AAKOÓ MUNGÚ Aleesleemusmo
xoordu sleémeero gin muruú /aymár hhóí qaas, nee difaáír tsuua,
nee fu'uunaá wahhaará' ló'wa ale, nee difaáír tsuu' ar ló'wa hhohho'.
7Nee gawaá tloomarihe AAKOÓ MUNGÚ
gurhaamidá' muu sleémeero gwa ot gan hingees,
tidá' xoordu sleémeero gaa al'iwit.
8Aakoó MUNGÚ gwa'ara gan hingees ay kureeraá kureér.
Inós hhirhheeri gin fiits gawaá ilaá muu sleémeerowo,
nee mureekeesoó mukós gun hingees baraá yaamu sleémeerowo.
Asma AAKOÓ MUNGÚ adoorí gaa oó'.
9Baalaadae muu in ooi,
«Kwí an Munguúrén, inós una damraaramaán,
as atén tiwa ba/amisár ay,
kwí an AAKOÓ MUNGÚ kudá' naa damraaramaán,
gimsé' daxta, bara/ u iimu/umaán nee qwal/uwo as ba/amarós.»
Mungú múk Moabu gu muux
10AAKOÓ MUNGÚ in kumiit gixsár Siyoni ngiwa xun,
ala múk Moabu gun kala/án yaamií ale,
adór tsaaroó taa kala/án baraá bohóngw tsuunkáy.
11Inooín daber'ín ngiri tleesiyá'
adór múk baraá ma'áy wa qumburu/umiít,
ala dinkwa nee xu'utir'ine
AAKOÓ MUNGÚ daara/angw'ín kudá' gun suwatsaat.
12Gixsaduín kudá' koo/i tledaadet gin yaamií daahh, giri inslah giri yaamúr tsataat, giri teerúy.
Currently Selected:
ISAYA 25: IRQW
Highlight
Share
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
