ISAYA 24
24
Mungú yaamu gi sakwasleemuut
1Ga/aaweek, AAKOÓ MUNGÚ yaamu gi hhitín,
nee giri dewa'atis.
Inós faltá yaamu gan tukuntuuk,
nee yaamuloouusér baraadá' hoot gari diyaa/.
2Baalaadae gadaádá' muu gu slaw, kaahamusmo gu sleér sleeme,
nee gár lawaalmo gu slaw, aakoowós gu sleér sleeme,
nee gár lawaalo'o ga slaw, aayór do' loo' ga sleér sleeme,
nee gár heé tlaxuúm gu slaw, heé weeramiís gu sleér sleeme,
nee gár heé kirkiít gu slaw, heé ta kirkiti gu sleér sleeme,
nee gár heé ta iinuusi gu slaw, kudá' iinuús gu sleér sleeme.
3Yaamu ki xaanxay tleehh,
kiri kángw kilá' wa qwaarees,
asma AAKOÓ MUNGÚ tí gana oó'.
4Yaamu i tsuunqumiisiyá' nee i hhiturutiyá',
yaamu i amoqwaqwadiná' nee i hhiturutiyá',
doori nee yaamuwo i amoqwaqwadiná'.
5Yaamu kaa meetagaás nee mukdá' gi hoót,
asma hara'ayár Mungú ngina hhitiné',
nee kaahirós ngina si'iyé',
nee alqadoodár alhhe'eesay wasl ngiri si'iyé'.
6Gawaá adoorihe lo'o yaamu gaa /ák,
nee yaamuloouusér baraá yaamu ka slahh'eemiis as tlakweemaaín.
Gawaá adoorihe yaamuloouusér baraá yaamu aa /aaruúr,
nee múk niiná kilós ina meét.
7Sabiíbu i kahaakah,
difaái i káhh,
nee mukdá' sleémeero ga saqwalalaá/ i tiiq gurhaamiro.
8Qwal/uú tawa neeti ar oowi aa faák,
afór ururu'uumis aa qwát,
qwal/uú tawa neeti ar gidaandori aa faák.
9I malé kumitiaaká difaái kawa xufi ar girayda,
difaáír aa hamat iri tlí/ dír xufutuuseero.
10Gixsadár tlaahhuso'o kaa yaamií daáhh
Umuú afkú do'o kwaa tseék as hee miwa dáh.
11Baraá lohduuwo muu /aa/eewo tsee/a gaa faák, as difaái kawa dakuús,
qwala/ sleémeero aa faák,
qaseengw baraá yaamuwo aa suquút.
12Baraá gixsaro gár aa met a deewa'ame kilós,
nee afkú gixsa kwa tuuaaiít iri hhituruút.
13Adoodá' mamaá niiná nir meetiya' gawaá xa'anoó seituúni,
laqaá gawaá xa'anoó sabiíbu,
alaá burkwa hhe'eés bu'uungo,
an adoodá' tleehharuut baraá yaamu sleémeero,
múk niiná i slafíngwí meet.
14Panaydá' aa meet iri tseeamín, iri daa' ar qwala/,
tari tseeamín iimír /uwá wa alé as aleesleemuú AAKOÓ MUNGÚ.
15AAKOÓ MUNGÚ kuri xirfayeemiis da/awe,
mukduú afaá tlawtá hoót,
umuú AAKOÓ MUNGÚ, MUNGÚ Israeli, nguri xirfayeemisiyá'.
16Afór xirfayeemis ana axaasaán iimír ku/uyaá doori,
afór xirfuú kudá' gan'amuú koóm kuwa xirfayeemisi.
Ala aníng ana oó', «Aníng aga slaqwa tlakúw,
aníng aga slaqwa tlakúw. Tsaxwaeé'!»
Asma múk al/agiím al/aymaaro tan ak kumiit,
al/aymuuse in ak ló'wa kumít al/aymaro.
17Kuungaá yaamuloouusér baraá yaamu,
dae nu sleér, nee /e/etíngw baraá boh'eero, nee tunduwa uhín ar tsaaxwel.
18Heé aa daér wa goow,
in /eet baraá bohoongw,
nee kudá' ni baraá bohóngw wa ti'imiít
kun oh nee tsaaxweeli.
Asma foxa'aá doori kaa gweér
nee iihhafiirír yaamu i diingiín.
19Yaamu i ló'wa gwagwa'aná',
yaamu i ló'wa feehhamitiyá',
yaamu i taa/aná' ló'wa ale.
20Yaamu i ta/amiitiyá' adór heé aa ooniit,
yaamu i taa/aná' adór islaangw,
asma kaa al'iilooúy nee huwár tlakweemaaín.
Inooín i huuiyá' sleeme i baloó sihhitiaaká.
21Baalaadae AAKOÓ MUNGÚ slawodaá gawaá doori gi slaahh,
waawituú baraá yaamu sleeme gun slaahh.
22Sleémeero kiri dinkwárí burumbuur
adór múk taa tsegiít, kuri /aytiís baraá bohoongw,
Inooín kin tsegiit baraá doó tseegamo
alaá deelór hhaawaakahe kiri muux.
23Aluuwo slahhaangw iri giiw,
nee tsee/amá gwa/aateema giri máy,
asma AAKOÓ MUNGÚ Aleesleemusmo
tloomár Siyoni nee Yerusalemu gan sawaawuti'ín,
nee xirfuuwós guri laqán dír bariisér mukós.
Currently Selected:
ISAYA 24: IRQW
Highlight
Share
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
