ISAYA 26
26
Mungú mukós gu arba/tírí haniis
1Baalaadae daa'angwí ku daa' baraá yaamaá Yudawo,
atén gixsár gawit a koomaán,
Mungú ba/ama ngin atén ar harwediit adór koo/i.
2Afér gixsa gweeraak,
as xoorór hota ganaa' iwa dat
tidá' inkihhmúr hotatiim.
3Mukdá' sleémeero inslaway'ín aa dirógí xasliit,
nee kudá' kuúng ugwa harahhiif,
kuúng in amohhe'és baraá wayduú ló'.
4AAKOÓ MUNGÚ na harahhifeek ay kureeraá kureér,
asma AAKOÓ MUNGÚ, an tlaa/ár alhhe'esay wasl.
5Asma yaamuloouusér ayaá gawa gana yaamií daáhh,
gixsadá' iia tleer gana yaamií daáhh ay baraá hhape,
gari kwaáhh baraá teeri.
6Daxta gixsadá' ya'aá muu ngin adarahiyá'
ya'aá narkuute ngin adarahiyá'
nee ya'aá múk alemaá koóm sleeme.
7Loohír heé hota ganaá' i alqoón,
kuúngudá' ganaá' loohír heé hota ganaá' a gan'ás.
8Aá AAKOÓ MUNGÚ, baraá lohdaá sakwasleemaroge
atén kuúng un daamaán,
muneerén gár i ló'wa sla'
a inslaslángw umuuwók.
9Baraá muunaáeene kuúng una islaasláw looa ngari fiíq,
nee baraá qeerueene kuúng una tseewa leelehhtuú áw ar tsáp.
Asma bál bar yaamu iga sakwasleemút,
yaamuloouusér baraá yaamu hotaá ganaa'á' gi intsaatsáhh.
10Ala tam sla'aari ka tleehhi dír heé tlaákw,
inós hotaá ganaa'á' gi baloó ado slayká,
tam baraá yaamaá múk hota ganaa'a inós tlakweema giqo tleehh,
nee uroó AAKOÓ MUNGÚ gu tsatsahhanká.
11Aá AAKOÓ MUNGÚ, dakók ugwa mak gáwtí tlés,
ala inooín ngu ara'ariaaká.
Ala sla'aarirók tidá' daanduú mukoge u tliw/iim
ngi ariye', nee mureekeeseek,
asltá wakuuseerók kawa i búhh inooín ngi hhaamis.
12Aá AAKOÓ MUNGÚ, kuúng wayda nguna aténí hanís,
kuúng gadiyeérén sleémeero ana tléhh as atén.
13Aá AAKOÓ MUNGÚ, Munguúrén,
bariisér hatlá' atén tina balít,
ala atén kuúng kilók un lamabu'umaán tawa Munguúrén.
14Inooín naa qatliyé', i baloó slafiaaká,
inooín naa qatliyé' slám i waslee/iaaká,
asma kuúng ina alhi'iitanór eér as kiwa hhaamis,
inooín kiri baloó inslayká.
15Ala aá AAKOÓ MUNGÚ, kuúng xoororén ana tlahhás,
nee yaamurén ngina dók,
as adoorí kuúng tu xirfayemiis.
16Aá AAKOÓ MUNGÚ, qoomár niwa slahhahhaiya' nina amorógí /akumitiyé',
qoomár kuúng kiwa slahh'eemís,
kuúng uri firariné'.
17Adoodár /ameenír qoomár xwayla gaa eer i diri',
iwa tonganus nee iwa /aa/amiin as asltá xwayla,
an adór atén kuúng tay tléhh, aá AAKOÓ MUNGÚ.
18Atén slahh'amuú adór kuquú asltá xwayla tina /aáy tari laqwlimaán,
ala gár taa laqwlimaán a fur'a,
atén arba/tír naa slawaán as yaamuurén i káhh,
tam faarór muu aa dogindiiká baraá yaamuwo.
19Mukók kudá' aa qaatl i waaslee/, slaqooín i waslee/iyá',
kuungásingá' baraá yaamaá hootá' tlawaaré' daaé' ar qwala/,
asma Mungú hara'uuwós oo slafiingw ngu paahhaas,
nee gi'i múk baraaíní diriiá' ngu duuxiyá'.
Sakwasleema nee ki/isa
20Qwalaasé' muk'eé', dahé' baraá kutwayhúng,
afér kutwayhúng aluuhúng wá tseegaak,
baraasíng i nahhataak har qoomár niinawe
ay dír buhhtakaá Mungú ni waaraahhiya'.
21Asma ga/aawaak, AAKOÓ MUNGÚ ni tláy dirós tidá' i dirii'i,
as yaamuloouusér yaamuuká' ngiwa muxi as tlakweemaaín,
tam tseerduudá' taa ku'umamiís hhape sleeme gi gu/uká,
tam tu'uudá' sleeme hhape gi tuuntukká.
Currently Selected:
ISAYA 26: IRQW
Highlight
Share
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
