ISAYA 19

Mungú yaamaá Misri gi muux

1Kaangwí a iigu'utuú Mungú aa laqán daanduú yaamaá Misriro.

«Ga/aaweek, AAKOÓ MUNGÚ aa tsa/án gawaá huunkír inslaahh,

i amór yaamaá Misrír káy,

slaqsi'iidá' munguaá Misri niri dír geeraawós wá daaraxaatiyá',

Gur'ér múk Misri ma'aay ngay dal/aná'.

2Aníng múk Misri un tlaahhírí kwaáhh,

umuú heewo nee hhiyaawós tiri ayá'.

Tam inslaawmo nee kuqá' tin ayá',

aya nee kuqá' tiri ayá', waawutmo nee kuqá' tiri i tlayá'.

3Múk Misri iri sage qwaqwdín,

aníng kangw'ín kudá' naa qoomeesiyé' un hhitiím,

Inooín gurbua ngiri leehhiyá' dír slaqsi'idaá mungui nee dír gi'i

nee dír iigu'utuuse nee da/aluuse.

4Aníng múk Misri nguri haniís dír heé tlaákw,

waawutmoó xaraásl giri sawaawuti'ín,

Anuú Aako, AAKOÓ MUNGÚ Aleesleemusmo tí an káh.»

5Ma'aá yaaér Nili niri /oná',

yaae iri qor'ót, iri kát.

6Mapeerodaá ma'aay xwaansláy giri dalaa/,

tsiinqaá yaaér Nili ar yaamaá Misri niri alqwaaresiyá', niri kahiyá',

tsaaráy nee miringedár oombase niri tsutsuiyá'.

7Afaá yaaér Nili niri meetiyá' tawó ale,

didár kaankír yaaér Misri sleeme.

Umuú gár taa dahaasi afaá yaaér Nili in kát,

kari ar tláy nee fur'a, iri qwát.

8Mukdá' siyoó ohahiím in /aa/amín tari wa/aa/uus,

mukdá' sleémeero baratsufay gur gadiyumamiís tari qununuu/,

kudá' sleémeero baratsufoó qamaamimá' baraá ma'aay niri hirqimiitiyá'.

9Mukdá' kitaanír xiislaasliít iri muneesii',

tam kudá' tlabaá hirimaamitá' sleeme.

10Kudá' sleémeero tlabaá tlehhaahhitá kuri amoqwaarees,

nee mukdá' sleémeero ta bu'un tlaatla/ángw wák tari gurhaamuut.

11Geeraharuusér Soani a daktanár huwisha.

Gurbu'uusér sagalooár koom ar Farao

gurbu'tá dakatu'uuma gan kát.

Alók adór Farao kura beeré',

«Aníng a na/oó heé sagaloó'

a na/oó waawutmoduú aáng.»

12Aá Farao, mukók kudá' sageeloén i amá?

Gimáy, gadaádá' AAKOÓ MUNGÚ Aleesleemusmo

naa istí tsaát tleehhamoro daanduú Misriro,

inooín ngi dorógí ooiye' as kawa xu'.

13Geeraharuusér Soani a daktana,

nee geeraharuusér Memfisi kaa al/aáy,

tla/uudá' sleémeero ta harahhifi baraá tlahh'iiwo,

an kudá' múk Misri ngwa geerahariye' baraá qwanaay.

14AAKOÓ MUNGÚ inooín gina inslawoó tlaahhírí kwaáhh,

inooín múk Misri nguri leexuyé', baraá muruuín kudá' sleémeero ta tlehhiiti.

adór xufutusmoó ta/amiít oo hara wa/amiím.

15Heé baraá yaamaá Misriro gár hhoo' tleehhamooro ga aleesláw i kaahh,

tam geeraharusmo laqaá yaamulousmo, tam heé iiatleér,

laqaá oo aleesleemuú koomaaká.

Xoorór Misri Mungú gu sluufmisuú eér

16Baalaadae múk Misri tari da'ayumiit adór /ameena, tari kitlkiitl daeero as dakwduú AAKOÓ MUNGÚ Aleesleemusmo aa gawaaíní tleés. 17Yaamaá Yuda kiri da'ayuut nee yaamaá Misri, umuú heewo oo taa kángw yaamaá Yuda báy, in daanda feehhiit daeero, as tlehhmuwí AAKOÓ MUNGÚ Aleesleemusmo aa istí tsaát tleehhamooro daanduine.

18Baalaadae tsifrír Ebrania kanar axwees baraá gixsadaá kooán awa yaamaá Misriro, múk gixsaduudá' lo'o kari /aay dir AAKOÓ MUNGÚ Aleesleemusmoó wa alé, ar inooín kiwa inkihhím. Gixsár wák kari bay, «Gixsár Tsee/amá.»

19Baalaadae kitángw ilahhooa kawa hanmiis dír AAKOÓ MUNGÚ kuri tleehh baraá tla/ángw yaamaá Misri, nee uhmoó taa paraátl as AAKOÓ MUNGÚ kuri siihh baraá digeemaá yaamaá Misri. 20Muruuwí tari laya nee lamabu'uungw dír AAKOÓ MUNGÚ Aleesleemusmoowo baraá yaamaá Misriro, qoomár birna amór AAKOÓ MUNGÚ i /aa/iyé' as baramaanusmo, inós gin ba/amusmoówí ya/aaw, giri aleekalaa/, giri ba/amis. 21AAKOÓ MUNGÚ tiri xu'utis dír múk Misri. Nee múk Misri AAKOÓ MUNGÚ nguri xuiyá', nguri sluufmiisiyá' ar ilahhooár muruú ta tsu/i, nee ilahhooár da/a/ango, nee al'axweesani ngiri oiná' dír AAKOÓ MUNGÚ, ngiri boo/eesiyá'. 22AAKOÓ MUNGÚ xoorór Misri gan muux, inós birnga muúx gari huungu/umiis. Inooín niri ki/iyá' amór AAKOÓ MUNGÚ, nee inós firor'ín gari axaas giri huungu/uus.

23Baalaadae loohír ur ni Misrír wa tleér ay Ashuru, múk Ashuru nee múk Misri tiri haraxaxayá'. Múk Misri nee oo Ashuru Mungú nguri dinkwár sluufmiisiyá'. 24Baalaadae múk Israeli in haragwaa' dír múk Misri nee oo Ashuru, inooínaaká' tamaawo tsuuqa ngiri huwiyá' baraá yaamu sleémeerowo. 25Asma inooín an kudá' AAKOÓ MUNGÚ Aleesleemusmo aa tsuúq, iwa kaahi, «Muk'eé' oo Misri ku tsuuqi, dinkwa nee múk Ashuru kudá' dabaeene naa tleéhh, dinkwa nee múk Israeli kuduú aalir'eé'.»

Currently Selected:

ISAYA 19: IRQW

Highlight

Copy