ISAYA 17
17
Mungú múk Aramu nee oo Israeli gu muux
1Kaangwí a iigu'utuú Mungú aa laqán daanduú gixsár Damaskoro, i kaahi,
«Ga/aaweek, gixsár Damasko in hhaán iri baloó gixsárí ki/ká,
in hhitirút iri ufa tleehhít.
2Gixsaduuwós kin xaanxaay tleehh ay alhhe'eesay wasle,
tari ayaá hikwa nee bee/aangw ki tleemisi,
niri baraadá' wa guiyá' tam ki dae tsatiiká.
3Koo/idá' gawden ar Efraimu i hhaán,
nee waawuti'iimár múk Damasko i qwát,
múk Aramu oo aa meet kuri niqín
adór múk Israeli.
Anuú AAKOÓ MUNGÚ Aleesleemusmo tí án káh.
4«Baalaadae xirfuú múk Yakobo i qwaar,
nee slaqooín kudá' naa wahhdiitiye' i faakiyá'.
5Inooín tari adór hhaanslaá ta burumburin,
kin adór hhaanslaá ta fiiqiti tleehh,
Inooín tari adór hhaanslaá ta fiiqiti,
awa baraá xatstá Refaimu.
6Inooín ki múk niiná i geexáy
adór na/aá seituúni awa taa /aytimiís,
adór mamaá tsár laqaá tám awa taa geexáy
gawaá halmír gáwtí saaw,
laqaá adór halmír mamaá tsiyáhh laqaá kooán
kiwa geexáy gawaá xa'anoó mamaá koóm.
Anuú AAKOÓ MUNGÚ, Munguú Israeli tí ana káh.»
7Baalaadae muu tleehharusmooín gu ya/án, nee Kudá' Hhoohhoó' oo Israeli nguri harahhifiyá'. 8Inooín kiteeridaá ilahhooa, awa gadiyér dabaaín ngiri si'iyá', nee gadiyér ditsaaín ngiri baloó harahhifiaaká, didár munguúduú Ashera nee kitangwduú ilahhooár mooyángw tsuú' kay haniisi. 9Baalaadae gixsaduín kudá' gawden in xaanxay tleehhitiyá', adór yaamuudá' taa geexáy nee múk Hifi nee oo Amoriwo qoomár niwa guwiyé' as xoorór Israeli, tam gixsaduuín sleeme kin tawo geexáy.
10Asma kuungá' Israeli, Munguúduú ba/amarhúng ugwa gunqaaresé',
tam tlaa/adár guwayhúng aga insleeri'iiká.
Gawaá adoorihe, tam dahaasíngw sla'atimís u dahaasinda'a,
kuri hanisá' dír munguúdá' ta bay Ba'ali.
11Tam geera u ureemisa'a looár wák ale,
tam i /ayuusi matlaatleedá' kwa dahaás ale,
tam adoorihe balangwhúng in tawo faak,
baalaadár qwanayhunge, tidá' slahh'amuuhúng kuwa baloó tse'eesiiká.
Xoordaá wakuuse kaa baál
12Kwaaraa/ír múk yaariír iiárií qaasaak,
kwaaraa/ir'ín a adór gwaanduú tlawi.
Kwaaraa/ír xoordu iiárií qaasaak,
inooín in kwaaraa/iyá' adór hhaahhoó ma'aá yaariir.
13Xoordu i kwaaraa/iyá' adór hhaahhoó ma'aá yaariir,
ala Mungú gin iigahhaat niri tlatlaahhiyá' amór saaw.
Kin tlatlahhaas adór fur'a xwaansloó gawaá tlom'i ngu /imaamis,
adór bambaao teeri ngi /imaamis.
14Muu ngun mak dae tsatiyá' qoomár tsiindoowo,
ala koonkomo iwa uui inooín i qaroó kahhiyá'.
Mukdá' muruurén gu hayoohiím kun adoorí laaq,
nee kudá' muruurén hara/uuntsimá' tí gi sleér.
Currently Selected:
ISAYA 17: IRQW
Highlight
Share
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
