ISAYA 14
14
Watlíngw xoorór Israeli
1AAKOÓ MUNGÚ múk Yakobo gu malé gurtláy, nee xoorór Israeli gari malé tsawaar. Inooín giri ki/is baraá yaamuuín kudaá kilá', xoordaá hatlá' niri haragwaaiyá' dír múk Yakobo, tari alhoot. 2Múk xoordaá hatlá' múk Israeli kunar tláy, kway ki/is baraá yaamuuín kudá' AAKOÓ MUNGÚ aa haniís, baraá yaamuudaá AAKOÓ MUNGUHE. Múk Israeli mukduú xoordaá hatlá' kuri aal, tawa adór lawaalér hhawaate nee ar /ameena. Mukdá' inooín gaa loohatis ngun loohatisiyá', nee kudá' inooín gaa baraamaanuus nguri sawaawuti'iná'.
Waawutmoó Babuloni i baraá yaamaá múk aa qaatl
3Bál anuú AAKOÓ MUNGÚ kuungaá múk Israeli barna amohhooárí haniís baraá slahh'amuuhunge, nee baraá tlaahhiro nee lawaali'iimár gawit ar taa /agi'i, 4baldá' kuungá' waawutmoó Babuloni kuri kooyiindá' ar girayduuwí,
«Xáy baramaanusámo, adór tura xasltís,
kuúngudá' xaraásl, adór tura baraá dewa'ameérí xasltís.
5AAKOÓ MUNGÚ hhartá heé tlaákw gaa geeqáy,
hhartadá' waawitá ir waawuti'ii'in gaa geeqáy.
6Hhartadá' naa múkár muxiyé' ar xaraasleema
ar muxtár ga/alér ilaa/a wasl.
Hhartadá' xoordu kira sawaawuti'ii'ín ar buhhta,
nee ar slahh'eemisuú baloó lakiitaaká.
7Hám daxta yaamu sleémeero naa xasliitiyé' nee ki amohhoo',
yaamu sleémeero bara/ nguna ii tlayé'.
8Xaa'aá ta babay misunobari hu'uumaawók ngin saqwalaala/iyá'.
Sahhtár Lebanoni sleeme i kat,
‹Iimír kiíng tiwa sa yaamií daáhh
heé atén taa tlaquú ay i kaahh.›
9«Gi'i baraywo naa gwarangwaritiyé',
as kiíng iwa ilaoohiya' bara baraadií hardát.
Mukdá' aáng aa qaatl kungun tlees as iwa taaqweesár aya',
nee mukdá' sleémeero oo waawituú xoordu
kungun tlees gawaá kiteeri'ín kudaá waawuti'iimar'ín wa alé sleeme.
10Inooín sleémeero kiíng tiri bay,
‹Kiíng sleeme aga daqatlakuúri adór atén wa alé!
Kiíng sleeme aga adór atén tleehhíti!
11Adoodá' tir iia tleere taa /aytiís ay baraá gi'i,
dinkwa nee mariímbawoge.
Muruudá' ta bay /ayma kwaa hhaáf tawa qatnirók,
nee naanaga an gár ta uuntsus.›
12«Kiíngadár aáng ar adór tsatse/ír haymú,
adór tira /aytiís gawaá doorí wa alé?
Kiíngadár xoordaá yaariir iga balaalit,
adór tira yaamií daáhh?
13Kiíng ana baraá muunaáwógi ó',
‹Aníng an tsa/ám ay gawaá doori,
dír tsatse/uú Munguhe gawa,
kitangw'eé' dir'ine nguri gáwtí qaás.
Aníng niri iwiít gawaá tloomadár mungui tay dogiitiya',
tidár amorqár /iíkwií saaw.
14Aníng an tsa/ám gawa, huunkáy nguri baá/,
aníng tari slaqás nee Munguúdá' gáwtí dirií'.›
15Ala kiíng taa gáwtá wa /arara'aás ay baraá gi'i,
taa /aytiís ay baraá gwe'eedaá bohoongw.
16Kudá' sleémeero kiíng iga ariye' tin ilií duxún,
in aldakwiyá' tari ooi,
‹Heewí an kudá' yaamu gaa daaraxaási?
Kwí an kudá' waawuti'iima gaa diingiísí.
17Kudá' yaamu ga xaanxaay tleéhhi?
Kwí an kudá' gixsadaá baraá yaamu gaa hhaamísi?
Aa kudá' mukdá' taa tsegiít gwa sí'i' gweermooro?›
18Waawitá sleémeero oo xoordu kuna foliít ar xirif,
umuúqo waawutmoowo baraá /aantaarós.
19Ala kuúng tun amór saáwí kwaahh, dír /aantaarók tidár baraá tlaa/aro,
adór na/oó taa guruú wa kwaáhh oo ta slaiiká,
tuuaarók kan uuntsuus ar tuaá múk ta tsu/aa/iín ar paangadu,
kudá' ta /aytisi baraá bohóngw tlaa/e,
tuuaarók tari slaqás nee tuuár taa kal/aa/án ar ya'a'.
20Kuúng tu alfooliiká dinkwa nee inooín,
asma kuúng yaamuuwók ina gás,
mukók kuri tsú/.
«Xwaylár múk tlákw alók in hhaán geeraawo.
21Ti amohhe'eese' na/iiwós kiwa tsu/a',
asma tlakweemaá baabi'ii'ín,
wané aluuwo ni iitlayá' yaamu ngiri aaliyá',
yaamu ngiri niiqiyá' dinkwa nee gixsaduuín.»
Mungú Babuloni ga qwaarees
22AAKOÓ MUNGÚ Aleesleemusmo i kaahi, «Aníng yaamaá Babuloni in i haratláw, muu nguri hhaamiís, múk aa meet nee na/iiwo tam na/aá ta sa laqwaali sleeme. Anuú AAKOÓ MUNGÚ tí an káh. 23Gixsarí samti gari ál, iri tlahheesá ma'aay tleehhít, aníng ngiri fiíts ar fiítsír ngir hhaamiis. Anuú AAKOÓ MUNGÚ tí an káh.»
Mungú Ashuru ga qwaarees
24AAKOÓ MUNGÚ Aleesleemusmo lo'o gaa /aáy i kaahi,
«Adoodá' tleehhamooro naa istí tsaát,
adoodá' aqo in tleehharút.
Adoodá' naa slaá' tleehhamooro,
adoodá' aqo in bó/.
25As adoorí aníng xoorór Ashuru a hhitiím baraá yaamueene,
in yaamaá hara'adáh gawaá tloomar'eé' wa ale.
Taaqwanay'ín gawaá isaá muk'eene un kwaáhh,
tam huwar'ín an hiingeés gawaá sum'aá muk'eene.»
26Adoorí an tidá' Mungú aa slaá' tleehhamooro,
baraá yaamu sleémeerowo,
dakwí an kudá' Mungú ira gadiyuús
baraá xoordu sleémeerowo.
27Asma AAKOÓ MUNGÚ Aleesleemusmo adoorí gaa tsabín,
heé ga sií' a heemá?
Inós gaa istí tsaát xoordu ngiwa muxi,
heé inós gu ilaá/ a heemá?
Mungú múk Filisti gu qwaarees
28Kurkudá' waawutmo Ahasi iwa gwaá', aníng iigu'utuuwí una sláw,
29«Kuungá' sleémeero awa múk Filisti ma qwalaala/aara',
kawa xua' qawaydá' naa muux aa tsatiít.
Asma dayshamo, dayshamoó qarkwá koóm gu laqwaal.
Nee dayshamoó qarkwá koóm dayshamoó ti gileéhh gu laqwaal.
30Asma na/aá baris awa narkuute in aaxiyá',
nee múk gaawásl ta hoot a saxareema.
Ala aníng na/iihúng i tsuú/ ar qwari,
nee panmoó aa meet dirhunge un gaás.
31Maraay ni tsuunqumiisiye', gixsadu ni /aa/iye',
kuungaásá xoorór Filisti gur'e ma'aay ngi dalaa/iye',
Asma asla ni /iikú wa hi'ít,
slám heé bihhií parangaá/ i kaahh baraá slaqwaruuser'ine.»
32Gár hee ya/abusmoó xoordu ngur mu/aywatsi a milá?
Gun bay, «AAKOÓ MUNGÚ gixsár Siyoni gaa tleéhh,
nee mukós kudá' taa slahh'eemiís,
dir'ín ar guwaay kaa sláy baraá gixsarihe.»
Currently Selected:
ISAYA 14: IRQW
Highlight
Share
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
