TLEHHMA'AÁ YA/ABUUSE 25
25
Paulo i waarahhamaá slaa' amór Kaisari
1Festo iwa baraá ga/awusi'iimár i dáh, deelo tám iwa waaráhh iri Kaisareár wa tsa/án ay Yerusalemu. 2Kaahamuusér uren ar Mungú nee bariisér múk Yahudi kángw Paulo nguri dirós i alki/iitiyé'. Nguri harhheehhe'eemisiyé', 3inooín ngiwa aleeya/án Paulo kunguwa huwi Yerusalemu. Asma inooín Paulo ngun giirór wa slaiyá' kuwa gaasi. 4Festo iri oó', «Paulo ku xún Kaisareár wa ale, nee aniíngú kilá' a amorqí kií/ ar gaanslaay.» 5Iri oó', «Heewí bar gár aa tlakweés i deer, geeraharuuserhúng nee án ti koomaán ay Kaisarea as nguwa sakwasleemuutiya'.»
6Deelo dakaát laqaá mibaangw ngiwa amoodá' wa hhe'eés, iri /eét ay Kaisaréa. Looaytleérós iri iwiít gawaá kitángw sakwasleema, iri oó', «Paulo huwaare'.» 7Paulo iwa hardáh, múk Yahudi oo naa Yerusalemúr wa /eet, nguna harweeriyé', nguri /ayseenaá yaariír i tlaaqiyé'. Ala looeemaawós laqaamaro kaa aleeslayká. 8Paulo iri oó', «Aníng hara'ayár múk Yahudi aga si'iiká, laqaá ar Doó Mungú, laqaá tam ar waawutmoó múk Roma.»
9Ala Festo múk Yahudi nguwa ilaá hhó' i tlehhituú wa slai, Paulo guri báy, «Yerusalemu a keéra as tuwa dír geeraeé' wa sakwasleemuuti asma kaangwí?»
10Paulo iri oó', «Aníng aga sihhiít geeraá kitángw sakwasleema oo waawutmoó múk Roma, nee diirí an dír hariim sakwasleemar'eene. Kuúng a ló'wa xú' adór aníng múk Yahudi gár nguwa sadakuús ir káhh. 11Ala án bar ana dakuús, laqaá gár tlaakw ana tleéhh, ar aníng niwa hariim gwa'araro, gwa'ara a siasiaaká. Ala /aymuuwí iwa sakwasleemutiya' bar loeeká, heé aníng i dabaaín i qaás i kaahh. Kwasleemar'eé' i waarahh amór waawutmoó múk Roma.»
12Festo bariisér kwasleema ngiwa i axweés, Paulo guri báy, «Waarahhamuú amór waawutmoó múk Roma una slá', a daqeér amór waawutmoó múk Roma.»
Paulo kuwa huúw dír geeraá Agripa nee Bernike
13Deelór hhaawaaká iwa waaráhh, waawutmo Agripa nee Bernike nina Kaisareár i hardihiyé', Festo nguna laaw'eesár ayé'. 14Deelór yaariir ngiwa amoodá' wa hhe'eesiyé', Festo kángw Paulo guri alki/iít dír waawutmo, iri oó', «Heeko i deer oo Felisi aa geexáy baraá tseegamo. 15Qoomár niwa Yerusalemúr i dirii', kaahamuusér uren ar Mungú nee bariisér Yahudi, kangós nguna dir'eé' alki/iitiyé', nee gár i slaiya' a kun sakwasleemuut. 16Ngiri báw, ‹Dákw adór kwisíng dír múk Romaro i kaahh, oo hee kuwa haniisi dír mukdá' inós gu sakwasleemuút as kuwa gaasi, bar taa al sihhiitiiká baraá kwasleemaro.› 17Inooín niwa diirí burumburiitiyé', aníng iga tligisiiká, ala looaytleérós ana iwiít gawaá kitángw kwasleema, niri oó', ‹Heesíng huwaare'.› 18Mukdá' gwa sakwasleemuut iwa sihhiít geeraá kwasleema, án geeraá kah /aymuú tlaákw ngu huwiyá', ala inooín /aymuú tlaákw oo naa ooiyé' i kaahh. 19Ala aqo har daanduú diínir'ín nguna kaanganuusiyé', nee daanduú kángw heeko ta bay Yesu, oo aa qaroó gwaa', ala Paulo baraá axweesantose gari gawdeés adór ir slaáf. 20Aníng loohír kaangwí sleémeero ngur slaw aga xuuiiká. Gawaá adoorihe Paulo una yaahaás, ‹Yerusalemu a keéra as tuwa sakwasleemuuti amoodá' wa ale?› 21Ala Paulo gár aa slaá' a waarahhamuú amór waawutmoó múk Roma. Iri firín as kuwa xun ay dír kwasleemarós kay tsati nee Kaisari. Aníng adoodá' ana ya/aám.»
22Agripa Festo guri báy, «Heesíng geeraawo aníng unqo iiárií qaasár wa slaá'.»
Festo iri oó', «Matlo uqo axás.»
23Looaytleérós Agripa nee Bernike niri hardihiyé' ar xirif, tari dáh ay didá' kwasleema kawa axamiisi, dinkwa nee geeraharuusér uren ar askaári nee bariisér gixsa. Festo iri oó', «Paulo huwaare'.» Paulo kuri huúw. 24Festo iri oó', «Waawutmo Agrípa, nee kuungáká' sleémeero diirí diriiá' nee atén. Heewí u ga/eerá'a? Múk Yahudi sleémeero kudá' Yerusalemúr i dirií' nee oo baraakií dirií', i dir'eé' kwasleemuut. Gár ta /aa/amin a gaasarós, asma ta kaahi heewí i harinká iwa slafi. 25Ala aníng ana tsaáhh adór gár tlaakw aa tleéhh ir káhh ar gwa'arár wa hariim. Slám inós waarahhamaá amór waawutmoó múk Roma ngiwa firín, aníng ana slaá' nguwa amoorósí huuw. 26Nee aníng /aymuú kilá' daanduuwose ni amór waawutmoó i gooiim i kaahh. Gawaá adoorihe nguna geeraahúngí huúw, ak alé dír geeraawók, waawutmo Agrípa, as kahhó' bur kwa yaahamiís, án /aymuú daanduúuwose ni gooiim nguwa slaw. 27Asma án bar ga/áw, a daktu'uuma heé taa tseék kuwa huwi amór waawutmoó múk Roma, bar gár kuwa sakwasleemuút kaa ooiiká.»
Currently Selected:
TLEHHMA'AÁ YA/ABUUSE 25: IRQW
Highlight
Share
Compare
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
