TLEHHMA'AÁ YA/ABUUSE 26
26
Paulo tiwa dír geeraá Agripá wa aleekal/án
1Agripa Paulo guri báy, «Pa/aangw ngwa haniís oo axweesanaywók kuwa o'.» Paulo dakós guri tleés, tiri aleekal/án ar /aymi'iiká',
2«Kuúng waawutmo Agrípa! Dir'eene a gitse/aá ur asma án tiwa dír geeraawók wa aleekal/aam laarí baraá muruudá' sleémeero múk Yahudi aníng iwa sakwasleemuuti. 3Asma tlehhma'aá yaariir nee yaahamisuú yaariír oo múk Yahudi kuúng u ló' wa xú'. Gawaá adoorihe án kuúng u firiím, án iiárií qaasáng ar qitla.
4«Múk Yahudi sleémeero ga xuu' aníng adór nira hoót iimír masoombi'iimar'eene. Ka xuu' iimír iimu/uungo adór nira baraá tla/ángw muk'ín wa hoót, nee baraá Yerusalemu. 5Inooín barka lamabu'úngw wa slaa', lamabu'uungo ka aleesláy asma iimír iimu/uungo aníng ana hoót adór heé Farisayo, kudá' hara'ayár diínirén gaa ló' wa eehar. 6Qaytsiít, án hamí a sihhimiít as tiwa sakwasleemuuti, asma al'axweesantadá' Mungú aa dír baabi'iiréní oó' ana harahhiíf. 7Al'axweesantí tlahhi'iirén kudá' mibaá nee tsár sleémeero ngin daamaraná' ngiwa i hardihiya', tawa Munguú sluufmamiisi ar inkihhimu tlaatla/aangw nee xweeraawo. Waawutámo! Aníng gár tiwa sakwasleemuuti nee múk Yahudi a daanduú haraxu'utirí. 8Asma milá kuungá' mas haratlintatia'aaká gídaabá Mungú muu waasle/atisaro gu aleesláy?
9«Anuú kilá' geera ana haraxuú' adór tar gár aníng wa hariim mura' sleémeero nguwa tleehh, kudaádá' Yesu Kristoó Nasareti gu baáq. 10Adoorí an adoodá' naa tleéhh baraá Yerusalemuro, kaahamuusér uren ar Mungú ina aleesleemií hanís, múk hhohhó' oo Mungú nguri tsegiít. Nee qoomár kwasleema kawa tsaát ar kiwa tsu/i, aníng sleeme ana ya/aám. 11Baraá maraá saaliingo daqtá yaariire múk Mungú una dae tlaáq ar muxta, as Yesu kuwa /ooslislin. Baraá buhhtaaeé' kudaá dakti'iimaro, inooín ina gusiisiím tam ay baraá gixsadaá ayeemaá hatlá'.»
Paulo iwa hhu'u'uungós alki/iiti
12«Aníng baraá kaangwihe ana Damaskór káw sleeme. Niwa daqaw, kaahamuusér uren ar Mungú aleesleemu nee hara'ayaro kingina haniís. 13Waawutámo, qoomár tlaatla/aango án niwa loohír i dirii', gwa/aateemaá ur awa tsee/amá ba/a ina ár, i gawaá dooraá dahhiyá'. Gwa/aateemaaká' aníng ina i gwa/aatiyé' bihhe sleémeero, dinkwa nee mukdá' nee aníng ti alkoomá'. 14Sleémeero tari yaamií huhu'uumaán. Aníng afo ngiri axaás ar amor'eéní axwees ar tsifrír Ebrania, i kat, ‹Saúlo, Saúlo, ahaá waáy, án mihar slahh'eemís? A gár gawít diroge tawa slaqw nee aníng a adór heé laqwáy gu kal/aám.› 15Aníng niri oó', ‹Kuúng a heemá, Aáko?› Aako iri oó', ‹Aníng a Yesu, kudá' kuúng ta slahh'eemis. 16Ala tláw, sihhiít ar ya'aawók. Gaarí an gár aníng kuúng usa harati'iít, as uwa qaas tawa sagadiyusmo, nee lamabu'usmoó muruuwí taa aán nee muruudá' ta aan aluuwo. 17Án kuúng u tuú/ baraá dabaá múk Israeliwo, nee dabaá múk xoordaá hatlá', asma aníng kuúng un amor'íní ya/aáw. 18Kuúng ilaaín in qaytsitís, nee inooín in warqés baraá giwtír wa aleeró, tari dah baraá gwa/aateema, nee in baraá /uuruú Neetlángw wa dúx, nee kiri húp amór Mungú. As kahhó' tlakweemaaín kiwa gurtlay, nee niwa aaluusér Mungú tleehhiitiya' baraá tla/ángw kudá' taa hhoohhoeés, asma aníng iwa haratlinti'iiyé'.› »
Paulo iwa gadiyeérós kaahi
19«Gawaá adoorihe, waawutmo Agrípa, aníng iigu'utuudá' gawaá dooraá daáhh ugwa si'iiká. 20Án kángw Mungú una alki/iít har geeraawo dír múk Damasko. Aluuwo baraá Yerusalemu tin wa alki/iít, nee baraá yaamu sleémeero awa Yudea, nee dír múk xoordu sleeme, as tawa hhu'u'un nee Mungú kuwa i warqay, nee tlehhma'aá nee hhu'u'ungw'ín ti slawá' kiwa tleehhi. 21Gaarí an gár múk Yahudi aníng isa óh, qoomár aníng niwa baraá Doó Mungú i dirii', tiri gaasár wa slaá'. 22Ala án Mungú ina alee/iís ay laarí. An gár nis sihhimiit diirí wa aleeró, múk urén nee oo ninakwe nguwa i lamabu'uum. Nee aníng /aymuú hatlá' oo ni oo' i kaahh, aqo har kudá' aaruuse nee Mosewo taa káh as iwa tleehharuuti. 23Nee kangwdá' a kwí, Kristo gár kuwa hariím a kun slahh'eemiis, nee tari heé baraá múk aa qaátl wa geerií waasleé/. Nee kángw gwa/aateema guri alki/iit dír múk Israeli nee dír múk xoordaá hatlae.»
24Paulo qoomár tiwa aleekal/an, Festo iri tseé' ar afór ur, iri oó', «Paúlo, kuúng aga slarhhamút, soómarók tisíng yaariir ugwa slarhhamuúr.»
25Ala Paulo iri oó', «Waawutmoó xiríf, aníng aga slarhhamuutiiká, ala án axweesanoó ló' un káh, nee oo ganaá'. 26Waawutmo Agrípa muruuwí gu xuu', nee aníng un axweés dír geeraawós wa aleeró ar pihh'uuma. Asma aníng a xu'uti hhe'eés adór gár waawutmo i xuiiká ir káhh baraá muruuwí sleémeerowo. Asma kaangwí aa baraá lu/aaráy wa tleehharuutiiká. 27Waawutmo Agrípa, kuúng aaruuse a haratlintía? Aníng a xuú' adór kar haratlintaatí'.»
28Agripa Paulo guri báy, «Ar /aymi'iiwók kwisíng niinawe aníng inqo Krishaanmo tléhha?»
29Paulo iri oó', «Tam ar /ayma'aá yaariir laqaá tam awa niinawe, ala gár ni fiririim dír Munguhe, kuúng masók an adór aníng tleehhít, ala mutuwa adór aníng wa tseék. Slám a kuúng kilogeeká, ala tam mukwí sleémeero oo aníng i iiárií qamiím diirihe.»
30Waawutmo nee ga/aawusmo nee Bernike nee mukdá' aa didií iwiit tari sihhiít. 31Tawa ti'imiiti tari kilooín axweés tawa kaahi, «Heewí gár gwa'arár wa hariim gaa tleehhiiká, laqaá tam ar tseegamo.» 32Agripa Festo guri báy, «Bar heewí geera waarahhamá amór waawutmoó múk Roma ngaa firiniká, alók a gweera.»
Currently Selected:
TLEHHMA'AÁ YA/ABUUSE 26: IRQW
Highlight
Share
Compare
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
