TLEHHMA'AÁ YA/ABUUSE 24
24
Paulo kuwa sakwasleemuút
1Deelo kooán iwa waaráhh, Anania, kaahamusmoó úr oo Mungú, bariiserka ngina ar /eét, nee heé wák oo kwasleemár baál, umuuwós a Tertulo. Kwasleemadá' Paulo kuwa sakwasleemuút kari alki/iít dír ga/aawusmo. 2Paulo kuri ateét. Tertulo kwasleema gari iimu/ún iri oó',
«Ga/aawusmoó xiríf. Baraá waawuti'iimaroge wayda unar hootaán. Yaamu niri warqayé', nee muruú hhó' ku tlehhiit baraá xooroorihe. 3Nee tí sleémeero an slaaslawaán umuúqo daqto nee umuúqo diiro ar sluufoó yaariír. 4Ala án kuúng muwa slaaqatís ar axweesanoó yaariír. Axweesanayrén kwí niiná iiárií qaaseek ar gurhhooarók. 5Asma heewí ugwa tsaahhaán adór tar heé ló'wa tlaákw. A heé tlaahhír huwahuúw baraá múk Yahudi sleémeero baraá yaamuwo. Nee hamí a geeraharusmoó mukdá' ta bay Nasarayo. 6Nee Doó Mungú nguwa meetagaamiís, kuri oohaán. [Atén geeraawo una sakwasleemár wa sla'aán ar dabeerén. 7Ala Lisia, geeraharusmoó úr oo askaári niri hardáh, guri dabaarén wa hayóh ar /uuru. 8Mukdá' inós gwa sakwasleemuut, guri hara'ayín, nguwa amoorók i sakwasleemár aya'.] Inós kuúng bura yaahamís, kaangwí sleémeero nguwa sakwasleemutaan uqo tsáhh.» 9Múk Yahudi sleeme sakwasleemadá' gari ya/án, tari oó', «Kangwsíng sleémeero oo ló'.»
Paulo tiwa dír geeraá Felisi wa aleekal/án
10Ga/aawusmo Paulo guri dákw i laqán as Paulo iwa ilawatsi. Paulo iri oó',
«Aníng an axweés ar qwala/, asma ngiwa xuú' adór kuúng tara tlík kwasleema tlaquwo baraá xooroorihe. 11A gár inslaahh diroge, looeemaá kaangwí kiwa leelehh, kari xú' adór iimír niwa Yerusalémúr i tsa/ám as saaliingw deelo mibaá nee tsár gaa waarahhiká. 12Mukwí aníng iga ariiká baraá Doó Munguhe niwa kaangaanuus, laqaá niwa tlaahhír qamiim baraá boo/aywo, tam baraá doó saaliingo, laqaá tam baraá gixsaro. 13Tam kangwqá' aníng iwa sakwasleemuutiya' looeemaawós laqaamaro ngi aleeslay'aaká. 14Aníng aga dír geeraawók wa ya/aám, Munguúduú baabi'iirén un haratlintatií' ar loohidá' ngiwa eeharahar, tidá' inooín tawa kaahi a loohír lama. Nee tidá' sleémeero nee hara'ayár Mose ti slaslaawá' an haratlintatií', nee tidá' taa gooín baraá kitaaba'aá aaruuse. 15Aníng a haraxu'utír koóm dír Munguhe, ar múk hhó' nee oo tlakwe tawa waaslee/i. Haraxu'utirí inooín sleeme ngi koná'. 16Gawaá adoorihe muunaáeé' un harmagagaáhh daqisleém, as kahhó' ku hhoohhoó' geeraá Munguhe nee geeraá muko.
17«Aníng kureeraá yaariire a kaáhh Yerusalemuwo, aluuwo niri kií/, as xooror'eé' ngiwa alee/iisáy i huuw, nee as ilahhooar'eé' ngiwa haniisár aw. 18Qoomár aníng niwa baraá kaangwí i dirii', inooín iri baraá Doó Mungú i ayé', nee aníng taa qaroó hhoohhooeés. Tam boo/oó nee aníng ti koomá' i kaahh, laqaá tlaahhír ni qamiim i káhh. 19Ala múk Yahudi oo Asiár daáhh i deer didaádae. Inooín masók gár kiwa hariím in diirí, as aníng iwa geeraawók wa sakwasleemuutiya', /aymuú i kona' bir deer daanduueene. 20Laqaá tam mukwí diirí dirií' ngi ooi, gár naa tlakweés a milá, ar inooín taa ár, qoomaadá' niwa sihhiít geeraá kwasleema. 21Ala gár tindi ooi bir deer, aqo har /aymuudá' aníng naa tla/angw'ín wa tseé' ar afór ur, niwa oó', ‹Aníng laarí in sakwasleemutá' asma ngiwa haratlintatii' adór, múk aa qaatl ir waasleé/.› »
22Felisi kángw Mungú gu xu'uti hhe'ees. Gawaá adoorihe deelór kwasleema gari surkuús, iri oó', «Lisia, geeraharusmoó úr oo askaári birna amoorí /eét, aníng kangwhúng ngu tsaát.» 23Aluuwo Felisi geeraharusmooduú askaári guri báy, «Paulo xuumaak, ala mu ak xuumara', tam mulqeerós ma ila/aamara' bar ngu sagadiyús.»
Paulo kuwa huúwdír geeraá Felisi nee Drusila
24Deelór hhaawaaká iwa waaráhh, Felisi nee hareerós Drusila tidár Yahudito'o nina hardihiyé'. Paulo kuri ateét. Kángw haratlintaaór baraá Yesu Kristo kuri dír Paulo wa iiárií qamín. 25Paulo kángw hotaá ganaa'á' nguwa alki/iít, nee kángw harqoomaay, nee sakwasleemár hi'iit, Felisi iri da'ayuút guri báy, «Kuúng ala tláw, án pa/aangw bura sláw, án kuúng uqo ateét.» 26Felisi Paulo guri ateetín daqtá yaariire tawa axweesi, asma iwa slukumár slai.
27Kureeraá tsár niwa waarahhiyé', Porkio Festo waawuti'iima gana kitángw Felísí wa óh. Felíki Paulo guri geexáy baraá tseegamo, as múk Yahudi nguwa ilaá hhó' i tleehhi.
Currently Selected:
TLEHHMA'AÁ YA/ABUUSE 24: IRQW
Highlight
Share
Compare
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
