TLEHHMA'AÁ YA/ABUUSE 23
23
1Paulo múk kwasleema guri ilií duxún iri oó', «Hhaee'eé', aníng muunuú hhoohhoó' una ar hoót geeraá Munguhe ay laarí.» 2Anania, kaahamusmoó úr oo Mungú mukdaádá' aa bihhiwós i sihhiit guri báy, «Heesíng afa slahhaak.» 3Paulo iri oó', «Mungú kuúng u slaahh, asma kuúng a adór koo/ír taa hhoohhoeés ar busla. Kuúng ana iwít as aníng iwa sakwasleemut ar adoodá' hara'aya i kat. Ala kuúng a kat, ‹Muxaak.› Gawaá adoorihe kuúng hara'aya aga sí'.»
4Mukdaádá' didá' wa sihhimiít iri oó', «Kaahamusmoó úr oo Mungú kuúng ugwa qítli /ooslimto?»
5Paulo iri oó', «Hhaee'eé', inós adór tar kaahamusmoó úr oo Mungú aníng aga xuiiká. Asma kaa gooín, ‹Geeraharusmoó mukók mu muruú tlákw babawaar.› »
6Paulo ngiwa tsaáhh adór baraadae bahh'alé tar múk Sadukayo nee bahh'alé a múk Farisayo, iri baraá doó kwasleemár wa tseé' ar afór ur, iri oó', «Hhaee'eé', aníng a heé Farisayo, garmoó heé Farisayo. Aníng tin sakwasleemuut asma harahhifór ni koom ar múk aa qaatl kuwa waaslee/atisi.»
7Adoorí ooaro ngiwa hhe'eés, múk Farisayo nee múk Sadukayo tari kaa/uús, boo/aydá' tiri afo dakumiís. 8Asma múk Sadukayo ta kaahi waasle/uú muu i kaahh. Slám ta kaahi, malayke i káhh, laqaá tam qeeru i kaahh. Ala múk Farisayo muruuwí sleémeero gu haratlintatii' adór ir deér. 9Tsimaahhi iri ló' wa tláhh. Intsaahhatuusér hara'ayár Mose bahh'alé, tidár bartá múk Farisayo, tana sihhiít, kuri lo'wa aleekalaá/, tari oó', «Atén tlakweemaá ta ara'araan dír heewihe i kahhiyá'. Hám wané kwaa tsuwa i axweés nee qeeru laqaá nee malaykamo.»
10Gila niwa tlahhiyé', geeraharusmoó úr oo askaári ina da'ayuút Paulo kuwa feehhamiisi. Gawaá adoorihe askaári gari ya/aáw, kuri hingeés ar /uuru dabaaín wa ale, kuri huúw baraá boóma.
11Xweeraadae Aako ina bihhaá Pauló i sihhiít guri báy, «Muuna hhe'eés, asma adoodá' kangw'eé' kura lamabu'uún baraá Yerusalemuro, un adoodár lamabu'uún sleeme baraá Romaro.»
Paulo kuwa gaasár wa slai
12Looa niwa tleér, múk Yahudi tari al'axweés, lo'o kana /aáy ar tawa /ayinka, slám ta wahiika ay dír Paulo kway gaasi. 13Nee mukwí lo'o gaa /aay mibeeraá tsiyáhh gi waraahh. 14Tari daqáy dír kaahamuusér uren ar Mungú, nee bariise, tari oó', «Atén lo'o aga /ayaán ar tawa gaa tsaqaanaaká ay dír Paulo kway gaasaan. 15Gimsé', kuungá' nee bariisér kwasleema geeraharusmoó úr oo askaári ádbawaak Paulo nguwa amoorí ar /eeti matlo. Baré kwaáo' kangós un alqaytsitár wa sla'á'. Daqaní atén u loohír wa giiraán, nguri gaasaán.»
16Garmoó hho'ór Paulo kaangwí Paulo kuwa gigidin guri axaás. Iri tláy, iri dahmaá áy baraá boóma, kaangwí guri oó' dír Paulo. 17Paulo geeraharusmoó wák oo askaari guri ateét guri báy, «Garmaawí huweek amór geeraharusmoó úr oo askaári, asma gár i dirósí ooár wa slai i deer.» 18Geeraharusmoowú askaári garmaadá' guri huúw ay amór geeraharusmoó úr oo askaári, iri oó', «Paulo, kudá' taa tseék, aníng ina ateét as garmaawí nguwa amoorók i huuw. Asma gár i dirógí ooár wa slai i deer.»
19Geeraharusmoodá' úr oo askaári garmaadá' guri dawa óh, gurir bihhí suruúk, guri yaahaás, «Kuúng gár ni ooár wa sla' a milá?»
20Garmaadá' iri oó', «Múk Yahudi taa al'axweés kuúng tuwa firin as Paulo kuwa baráy ar /eeti matlo, nee kuwa qaasi dír geeraá kwasleema. Baré kwaáo' kangós ngun kángw kilá' wa alqaytsitár wa slaiyá'. 21Ala kuúng ma ya/aamaar, asma múk mibeeraá tsiyáhh gi waaraáhh ngu loohír wa gigidiná'. Nee inooín lo'o ngaa /ayiyé' ar iwa /ayina'aaká, laqaá i wahiaaká, ay dír Paulo ngway gaasiya'. Nee hamí axweesantá amoorók daahh ngin daamaraná'.»
22Geeraharusmoó úr oo askaári garmaadá' guri hara'ayín guri báy, «Kangwsíng mu heéwí ooaar adór ngura aníng i ó'.» Guri deelór i oó'.
Paulo kuwa huúw amór Felisi
23Aluuwo geeraharuusér tsár ar askaári gari ateét gari báy, «Askaárír tsiire tsár amohhe'eesaak as iwa Kaisareár keer, nee ar farsúr hi'iimiit, nee slám askaarír lawlaá koom tsiire tsár. Askaárisíng ti amohhe'es iwa tleer looár tám ar xweeraawo.» 24Iri oó', «Faras amohhe'eesaak as Paulo kuwa tsa/aasi nee kuwa hardahasa' ar saxareema ay amór Felisi, ga/aawusmoó waawutmoó múk Roma.» 25Barwá gari adoorír gooín,
26«Anuú Klaudio Lisia barwaárí ngi amoorók i gooiím, kuúng Ga/aawusmoó xiríf, Felísi, Laawaay. 27Heewí kuna óh nee múk Yahudi, kuri lak gaás. Ala aníng kaangw nguwa axaás adór inós tar heé Roma, niri daqáw dinkwa nee daqtá askaári, nguri tuú/. 28Aníng /aymuudá' kuwa sakwasleemuút nguwa xu'utír wa slaá', nguri huúw, nguri qaás geeraá kwasleemar'ín. 29Aníng ana tsaáhh adór inós gár tlaakw aa tleéhh ir káhh ar gwa'arár wa hariim, laqaá tam tseegamo. Ala gár kuwa sakwasleemuút a garka tiwa slaslay'aaká baraá daber'ine. 30Aníng ngiwa axaás adór heesíng kur gigidín nee múk Yahudi as kuwa gaasár wa slai, nguri amoorógí waarahhaás. Nee mukdá' inós gwa sakwasleemuut una ádbáw, kangós nguwa amoorók i alki/iituú aya'. Deelo.»
31Askaári adoodá' kaa báy gari tléhh. Paulo guri ar tleér xweeraawo, kuri huúw ay yaamaá Antipatri. 32Looa iwa tleér Paulo kuri ar tláy nee askaaridá' faras gwa i tsa/aan, tidá' ar ya'a' iri kí/ ay amór boóma. 33Nee mukdá' iwa hardáh Kaisarearo, ga/aawusmo kuna barwaádá' i haniís, Paulo kway geeraawós i huúw. 34Barwaádá' soómaro ngiwa hhe'eés, giri yaahaás, «Heewí oo yaamu gaalá?» Tari oó', «A heé yaamaá Kilikia.» Inós adoorí ngiwa axaás, 35iri oó', «Kwasleemarók a iiárií qaás, mukdá' kuúng u sakwasleemuút birna hardáh.» Hara'aya gari oó' as Paulo kuwa baraá boomár Heródé wa xun.
Currently Selected:
TLEHHMA'AÁ YA/ABUUSE 23: IRQW
Highlight
Share
Compare
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
