TLEHHMA'AÁ YA/ABUUSE 22
22
1«Hhaee'eé' nee baabi'iieene, án iiárií qaasaré', tiwa dír geeraahúng wa aleekal/aam.» 2Kawa axaás i amor'ín axwees ar tsifrír Ebrania, tari xasliita hhe'eés. Aluuwo giri báy,
3«Aníng a heé Yahudi. Tina laqwaál Tarsór wa ale, gixsár yaamaá Kilikia. Ala ana baraá gixsarír Yerusalemúr wa uráw, baraá dabaá Gamalieli, án ina intsaahhatimís daanduú hara'ayár baabi'iirene. Tari heé ilakaahaár daanduú Munguhe adoorí kuungá' sleémeero ti diria' laarí. 4Múk loohír Aako ga eeharahár nguri slahh'eemiís, nee sleeme nguri tsuú/, ina tsegiít, ngiri dahamiís baraá doó tseegamo, hhawaate nee /ameenaaro. 5Adoorí kaahamusmoó úr oo Mungú nee bariisér doó kwasleema sleémeero ngi xuiyá' sleeme. Slám inooín awa kilá' tiri barwaduú i hanmiís awa ni huuw amór hhaeerén awa múk Yahudi, kudá' Damaskórí diriiá'. Niri Damaskór káw, as mukdá' amoodií dirií' oo loohír Aakoó eeharahár nguwa ohiim, nee nguwa tsegiit, nee nguwa huwahuuw ay Yerusalemu as kuwa sakwasleemuuti.»
Paulo iwa hhu'u'uungós alki/iiti
6«Qoomár niwa aa'aá kaw, niwa nakaá/ Damasko, qoomár looár lahhoó' gwa/aateemaá ur awa gawaá dooraá dahhá' niri gwa/aatiyé' ar gaanslaay bihhe sleémeero. 7Aníng niri yaamií huú'. Afo ngiri axaás ar i babaw, ‹Saúlo, Saúlo, ahaá waáy, án mis slahh'eemís?› 8Aníng niri oó', ‹Kuúng a heemá, Aáko?› Iri báy, ‹Aníng a Yesuú Nasareti, kudá' kuúng ta slahh'eemis.› 9Mukdá' nee aníng ti al koomá', gwa/aateema kilooín kina ár, ala afór heedá' naa amor'eéní axwees kaa axaasiiká. 10Niri oó', ‹Adór ni laaq, Aáko?› Aako iri báy, ‹Tláw, sihhiít, dáh baraá gixsár Damasko. Nee baraadae kaangw sleémeero oo kuúng wa hariím kungu oo'.› 11Aníng xumso ngiri harslaaqaát as miraa/ór gwa/aateemaadá'. Mukdá' nee aníng ti al koomá' iri dawa óh, iri geerahaár ay Damasko.
12«Heeko wák ta bay Anania i deer. Inós a heé ilaiwa/amér koóm gawaá hara'ayaro, heé ta hhoár i xui nee múk Yahudi sleémeero oo amoodá' i dirií'. 13Aníng iri i daqáy, iri sihhiít dír bihhieé', iri oó', ‹Hhiyaeé' Saulo, ilaawók i qaytsitiye'.› Ilaaeé' niri qaytsitiyé' hamtidár kilae, inós nguri ár. 14Aluuwo iri oó', ‹Munguú baabi'iirén kuúng ugwa tsawaár as sla'aarirós kawa tsahh, nee Kudá' Ganaá' kuwa aan, nee afoorós ar kilá' kawa axas. 15Asma kuúng a lamabu'usmoowós tleehhít dír muu sleémeerowo daanduú muruuwí sleémeero taa aán, nee taa axamisi. 16Slám mas dóts? Sihhiít tu baatisi, tlakweemaawók ki hamaatli umuú Aako ateeteek.› »
Ateetamór Paulo as xoordaá hatlá' ngiwa i dahareemisi
17«Aníng niwa kií/ Yerusalemu, looarka wake niwa baraá Doó Mungú wa fiririim, iigu'utu una ár. 18Yesu una ár, i aníng babay, ‹Goów ar gaanslaay, baraá Yerusalemu geexaweek, asma lamabu'uungók daanduueene ku ya/anaká nee múk baraaká'.› 19Aníng niri oó', ‹Aáko, inooíná kilá' ngi xuiyá' adór kudá' kuúng ugwa haratlintii'iye', aníng ngira tsegiít nee ngira muúx baraá maraá saaliingo. 20Qoomár tseerér Stefano, lamabu'usmoowók, kawa ku'uús, aníng a didií dirií', nee ana qwalalaá/. Tlabaá mukdá' inós gwa gaas ina xuúm.› 21Aluuwo aníng iri báy, ‹Tláw, aníng kuúng u amór saáwí ya/aáw, amór múk xoordaá hatlá'.› »
22Paulo kuna iiárií qaás ay dír /aymuuwí. Alaá /aymuuwí ooaro nguwa hhe'eés, muu iri tseeamín ar afór ló' wa ur, ta kaahi, «Heewí hingeesaak baraá yaamuwo! I harinká iwa hooti!» 23Qoomár tawa tseeamin, nee tawa tlabaá kwakwahhi, nee tawa teerír tleemisi, 24geeraharusmoodá' úr askaári gari ádbáy Paulo kuwa dahaasi baraá boóma, nee kangós kuwa yaahamiisi, kuwa hara muxi ay dír gaarí kuwa i tseeamin ngay ooi.» 25Ala qoomár kuwa him'eérár tseék as kuwa muxi, Paulo geeraharusmoó askaári kudá' aa bihhaawósí sihhiit guri báy, «Ahaá, adoorí a dáko ar yaamuloousmoó Roma kuwa muxi, bur kwa sakwasleemuutiiká?»
26Geeraharusmoodá' adoorí ngiwa axaás, iri tláy, geeraharusmoodá' úr guri ádbeemuú áy kaangwihe, iri oó', «Adór ta tleehhamór wa sla' a adoomá? Baré heewí a heé Roma.»
27Geeraharusmoodá' úr oo askaári niri hardáh, guri yaahaás, iri oó', «Kuúng a heé Romáro?»
Paulo iri oó', «Ee.»
28Geeraharusmoodá' úr iri oó', «Aníng yaamulooarí ana sláw ar tlaxór ur.»
Paulo iri oó', «Ala aníng a yaamuloousmoó Roma oo laqwalama.»
29Mukdá' taa amohhe'eés as Paulo kuwa yaahaasi tari tláy, kuri geexáy. Nee geeraharusmoodá' úr oo askaári sleeme iri da'ayuút ngiwa tsaáhh Paulo tawa heé Roma, nee inós gwa tseék.
Paulo i dír geeraá kwasleema
30Geeraharusmoodá' úr gár Paulo kusa sakwasleemuút nee múk Yahudi gari xu'utír wa slaá'. Gawaá adoorihe looaytleérós Paulo guri gweér. Kaahamuusér uren ar Mungú nee bariisér doó kwasleema sleémeero gari ateét. Paulo guri leéhh, guri dír geeraaíní huúw.
Currently Selected:
TLEHHMA'AÁ YA/ABUUSE 22: IRQW
Highlight
Share
Compare
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
