TLEHHMA'AÁ YA/ABUUSE 19
19
Paulo iwa baraá Efeso
1Qoomár Apolo iwa baraá Korintórií dirii'i, Paulo iri waaraáhh ar baraá yaamaá kaahaar, iri hardáh ay Efeso, amoodae tiri doogiyé' nee eeharuuserka, 2giri yaahaás giri báy, «Kuungá' Qeeruú hhoohhoó' oo Mungú ugwa ilaotí'i qoomár tawa haratlintié'?»
Tari oó', «Aasla'áy, adór Qeeruú hhoohhoó' ir deér tam axaasaro una qo axaasaniiká.»
3Aluuwo giri yaahaás, «Baatiísmoó tundura baatiís a baatísmoó heemá?»
Tari oó', «A baatísmoó Yohane.»
4Paulo iri oó', «Yohane ina baatimiís ar baatiísmoó hhu'u'uungw, muu guri ádbabáy as kudá' aluuwós wa hardáh kuwa haratlinti'i, inós an Yesu.»
5Inooín adoorí kawa axaás, kiri baatimiís ar umuú Aako Yesu. 6Qoomár Paulo dabaawós ngiwa gawaaíní qaás Qeeruú hhoohhoó' oo Mungú giri i aweér. Tari axweés ar tsifrír xuawaslen, nee ya/abtór amór Mungú daahh kari axweés. 7Mukdá' sleémeero a har afi mibaá nee tsár.
8Paulo ina daráh baraá doó saaliingw, har afi qoomár slahheeri tame kángw waawuti'iimár Mungú guri baraadá' wa alki/iít ar pihh'uuma. Paulo nee muu tina tlaampa'aamisiyé', nee muu guri harakeemiís. 9Muu bahh'alé ku sage gawdén, tari sií' haratlintaaooro, loohír Aako kari /ooslislín geeraá boo/oó múk wa ale. Paulo inooín giri geexáy, eeharuuse gari paraátl. Gari ar tláy. Nee umuúqo deelooro iri intsaahhatimís baraá doó shuúlér heeko ta babay Tirano. 10Tari kumiít ar adoorí ay kureeri tsár, tam múk Yahudi sleémeero nee oo Yunaniro kudá' Asiár i dirií', Ya/abtór Aako gari axaás.
Daaqoó Skewa
11Mungú muruú waa/oo/amo guri ak tlehhaahhiít ar dabaá Paulo. 12Tam warqama' nee inqwar kudá' inós aa tsiít geeraawo, kiri huúw amór tiqtuuse, tiqtir'ín tidá' iri hungú/, tam neetlaame sleeme giri geemeér. 13Mukko Yahudi i deer oo harweerariím. Inooín a múk neetlaamér gusaasiím. Neetlaame kari iiár guusaro, ar umuú Aako Yesu kuwa kaahi daanduú mukdá' neetlaame aa eeri. Ta kaahi, «Aníng kuúng u guús ar umuú Yesu, kudá' Paulo i alki/iiti.» 14Daaqayko faanqw oo Skewa adoorí gan laqaqán. Skewa a kaahamusmoó úr oo Mungú.
15Neetlaameedá' iri ó', «Yesu u xuú', nee Paulo u xuú' sleeme, ala kuungá' a ín heemá?»
16Heedaádá' neetlaame aa eér, inooín giri hara/akumiít, giri aleesláy giri ar baá/. Niri baraá do'dá' wa /akumiitiyé' ar /aankwets, amorqaáqae kaa tseeru'umaamiís. 17Múk Yahudi sleémeero nee oo Yunani, kudá' baraá gixsár Efesór i diriiá' kaangwí kuri xuú'. Muu sleémeero iri ló'wa da'ayuút, nee umuú Aako Yesu iri ak xirfuút. 18Sleeme múk yaariír oo aa haratlintii', tlehhemi'ii'ín kiri hhu'u'ún kiri geehhoatís. 19Nee muu bahh'alé kuduú qwaslaare kitaabi'ii'ín kiri burumbuúr, kiri dír geeraá muu sleémeeró wa daá/. Nee faaro kari tleéhh, naxés tlaxór kitaabi'iidá' a shiliíngi kume mibeeri kooán. 20Adoorí an adoodá' Ya/abtór Aako ira geerií kumít, nee iri baaliín ar /uuru.
Tlaahhír baraá Efeso
21Alaá kaangwí sleémeero iwa tleehharuút, Paulo isa gari tsaát iwa waaraahhi ar Makedonia nee Akaya, nee iwa kumiiti ay Yerusalemu.» Iri oó', «Aníng bara amorqí hardáh, gár iwa hariím an Romár káw sleeme.» 22Múk tsár baraá mukdá' inós gu alee/iimamisa guri ya/aáw ay Makedonia. Mukwí a Timoteo nee Erasto. Ala inósuú kilá' iri Asiár wa hoót deelór hhaawaakahe.
23Qoomaadae tlaahhír yaariir niri ti'ít baraá yaamaá Efesoro, as daanduú loohír Aako. 24Asma heeko wák i deer, umuuwós ku bay Demetrio. Heewí a kareermo. Inós slaqsa'aá maraá Artemi gin tlehhahhiit. Artemi a munguú /ameeni oo múk Efeso. Gadiyeérós tí múk gadiyuús slaasláwár yaariir gan slaasláy. 25Demetrio mukwí guri burumbuúr dinkwa nee múk hatlá' sleémeero oo gadiyér adór tidá' ga tlehhiít. Iri oó', «Kuungá' hhawaáte, kuungá' a xuá' adór daqaari'iimarén dír kawa slaaslawaan tar baraá gadiyeérí. 26Kuungá' aga aandé' nee aga axasé' adór heewí ta bay Paulo i tlehhiiti. I kaahi, ‹Munguaá ta tlehhiiti ar dabaá muu a munguiwooká.› Inós múk yaariír gwa harakeemiís guri warqeés, ala a diirír gixsár Efeso kiloseeká, ala tam baraá yaamaá Asia sleémeero. 27Gawaá adoorihe gadiyeérén tí i baraá tsaxwá úr i dirí', muu ngiwa waaqaai. Ala a har tí kiloseeká, ala doó hhoohhoó' oo munguúrén kwí úr oo /ameeni Artemi, kuri gaárií xuiiká sleeme. Slám tsaxwa i dayá' awa munguúwí oo Artemi xirfuuwós kuwa hhitin, inósuudá' ta sluufmamiisi nee muu sleémeero oo baraá yaamaá Asia, tam múk baraá yaamu sleémeerowo.»
28Axweesanaywí kuwa axaás tari ló'wa buúhh, tari tsimahhuús, ta kaahi, «Artemi, munguú múk Efeso, ku úr!» 29Tlaahhidá' iri kumít baraá gixsa sleémeero. Boo/oó muu Gayo nee Aristarko kiri ohín. Inooín a múk Makedoniár daáhh, tina al koné' nee Paulo. Mukwí kurir tláy ay dír neeto. 30Paulo inósuú kilá' iri dahamaá slaá' amoodár geeraá muu. Ala haratlintaauuse aa ya/aandiiká. 31Ala mukdá' urén oo yaamuudá' bahh'alé a mulqér Paulo. Inooín muu kuri ya/aáw amór Paulo. Kuri harhheehhe'eés as miwa dáh baraá doó kwasleema. 32Qoomaadae dinkwadá' sleémeero i baraá tlaahhír i dirí'. Mukwí gár i tsimahhuusi a tí, kuqá' gár i tsimahhuusi a hatlá'. Asma múk yaariír gár ta sa burumburiít ga xuiiká. 33Muu bahh'alé iri káh heé tlaahhirí gaa qaas a Aleksanda, asma múk Yahudi Aleksanda guna huúw dír geeraá boo/aay, ala Aleksanda muu guri kuútl ar dawa as iwa xasliiti. Gari slaá' tiwa aleekal/an geeraá múk wa ale. 34Qoomár kawa tsaáhh adór inós tar heé Yahudi, sleémeero tari tseeamín ar afór wák ar har qoomár hhaawakahe, ta kaahi, «Artemi, munguú múk Efeso, ku úr!»
35Alhhe'eesaywo goousmoó gixsa muu guri xasltís, iri oó', «Kuungá' múk Efeso, umuúqo heewo ga xuu' adór múk doó munguúdá' úr oo Artemi gu xumxaxuúm, an múk gixsár Efeso nee tlaa/anoodá' hhoohhoó' naa gawaá doorí wa huu' sleeme. 36Kaangwí heé gu sií' i kaahh. Gawaá adoorihe, kuungá' xasliité', ma gaansluutara' gaa tleehhamooro. 37Kuungá' mukwí nguna diirí hubé', ala inooín gár taa fiís ar baraá doó mungú i káhh, slám /aymuú tlaákw oo taa oó' i kaahh daanduú munguúrene. 38Ala bar Demetrio nee mukwí nee inós algadiyuusá' gaa ka kón ar hee kuwa sakwasleemuuti, maraá kwasleema i dayá', nee mukdá' urén oo kwasleema i deer. Ti amorqá' wa sakwasleemuutiye'. 39Ala bar gár hatlá' ta koondá' ar dimbé i deer, gaasíng ka amohhe'ees didár dinkwadá' kawa hariím ar muu sleémeero. 40Asma atén a baraá tsaxwá i diriiaán tiwa sakwasleemuuti as kaangwí laarí aa tleehharuut, asma tawa adór tlaahhi. Slám gár muruuwí sleémeero isa tleehharuút i káhh. Nee atén birta yaahaás dír kwasleemaro, gár tir aleekala/aan a koomanaaká.» 41Adoorí ooaro ngiwa hhe'eés, dinkwadá' gari gaás.
Currently Selected:
TLEHHMA'AÁ YA/ABUUSE 19: IRQW
Highlight
Share
Compare
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
