TLEHHMA'AÁ YA/ABUUSE 20
20
Aa'aá Paulo ay Makedonia nee yaamaá Akaya
1Tlaahhidá' ar muu iwa fák, Paulo eeharuuse gari ateét, gari gurkwa/amís, gari deelór i oó'. Iri tláy ay yaamaá Makedonia. 2Iri waaraáhh ar yaamuudá', nee umuúqo diiro eeharuuse gari alee/iís /uuru nguwa sleer baraá haratlintaaooro ar axweesanoó yaariír. Iri hardáh ay yaamaá Yunani. 3Iri amoodá' wa hoót slahheeri tám. Paulo iri tleemuú slaá' iwa yaamaá Shamúr kay ar baraá tlawi. Ala múk Yahudi adór kur gaasi kaa al'axweés. Gawaá adoorihe Paulo saga guri warqeés iwa ki/i ar baraá tla/ángw Makedonia. 4Inós tina koné' nee Sopatro, garmoó Piro. Inós a heé yaamaá Berea, nee Aristarko nee Sekundo, inooín a múk gixsár Tesalonike, nee Gayo, heé gixsár Derbe, nee Timoteo nee múk tsár oo Asiár daáhh. Inooín a Tikiko nee Trofimo. 5Mukwí ina geerií hi'iít, tiri dané' yaamaá Troa kiwa áy. 6Atén ana Filipír wa tlawaán ar baraá tlawi, deeloodá' ur ar Mikaátér taa sluuftisiiká iwa waaráhh. Deelo kooán iwa waaráhh kiri Troár i awaán. Tari didá' wa hootaán deelo faanqwe.
Paulo iwa deelór ooár áy baraá Troa
7Deelór Jumapiíliro ana burumburiitaán as muruú /aymár Aako kuwa /ayaan. Paulo axweesantá Mungú gari alki/iít, iri kumiít axweesanto ay qoomár dakiing. Asma looár tlawa i tleemuú slaa'. 8Nee baraá do'dá' ta i burumburiitaán aslo ki ló'wa yaariir. Slám do'dá' a doó qoroofár gáwtá koóm. 9Nee masoomooko wák, umuuwós ta bay Eutiko, ina iwiít gawaá dirishár i alé. Paulo axweesanto iwa kumiít, masoomoodá' iri gufmiís, gu'ute guri ar bá/, iri gawaá qoroófár tám wa /eét ay yaamu. Kuwa tleés naxés aa qaroó gwaá'. 10Ala Paulo iri yaamií aweér, tiri gawaawós i qaatiís, guri slaqwtós i óh, iri oó', «Ma da'ayumiitara', inós i slaaf.» 11Aluuwo Paulo iri gáwtí kií/. Mikaáte gari parhhamiís. Iri /ayín. Iri malé kumiít dir'íní axweesanto ay matlaatle. Matlaatleero iri tláy. 12Masoomoodá' kurir waátl ay do', i slaaf. Tari ló'wa gurkwaá/.
Tana Troár wa tláy ay Mileto
13Atén tari geerií hi'iitaán ay dír miringamo, tari tlawaán ar baraá tlawi ay Aso. Gár taa sla'aán a Paulo un tsa/aasaán Asór wa ale. Inós tina adoorí báy, asma inós ina amoodií tláy ar yaamaá kaahaar. 14Tiwa Asór i áy, una didá' wa tsa/aasaán, tari kumiitaán ay Mitilene. 15Tari didá' wa tlawaán ar baraá tlawi, nee bál tsár tari hardahaán dirka ta bay Kio. Bál tám tari waarahhaán ar Samo, tari hardahaán ay Trogilio, tari diirí deelaán. Bál tsiyáhh tari hardahaán Mileto. 16Paulo gaa slaiiká iwa waaraahhi ar Efeso. Asma deelór yaariir mingiwa qwaareés yaamaá Asiárí wa aleeró. Asma inós i gaanslín. Gár aa slaá' masók in hardah Yerusalemu dír deeloodár Pentekoste ira xeeriiká.
Paulo bariisér Efeso ngiwa deelórí oó'
17Dír Miletoro Paulo muu guri ya/aáw ay Efeso as geeraharuusér kríshaanáy kawa ateeti. 18Geeraharuuseedá' niwa hardát, Paulo giri báy, «Kuungá' kilá' a xuá' aníng adór nira hoót tla/angwhúng wa ale qoomaadá' sleémeero, iimír baalaadár geera án niwa baraakaá Asiár i hardáh. 19Aníng Aako una sagadiyuús ar tsatsa'areema sleémeero, tam qoomár niwa baraá /aa/eé dirii', laqaá tam baraá iiara'aduú naa sláw dír múk Yahudír wa aleeró, tiwa gaasár wa slai. 20Aníng kuungá' /aymuú nuwa /iít i kaahh. Ala umuúqo gaaro baraá axweesantá Munguhe ana alki/iít, nee ana intsaahhatimís ar geehhoeema laqaá tam baraá maraay, as alee/isayhúng. 21Án múk Yahudi nee Yunaniro una ló'wa gurbuú' tlakweemaaín kiwa hhu'u'n dír Mungú i hhu'u'un, nee Aakoorén Yesu Kristo kuwa haratlintii'i. 22Nee aníng hamí aga tláw ay Yerusalemu, taa tseék nee Qeeruú hhoohhoó' oo Mungú. Gár aníng ni amorqií aw a xuaaká. 23Ala Qeeruú hhoohhoó' oo Mungú aníng i ádbabáy umuúqo gixsaro adór tseegamo nee slahh'amaaye aníng ir daamaraná'. 24Ala bar án kilooeene slafingw'eé' u gaárí xuaaká. Ala gár gídaabár koom a masók slafingw'eé' kudá' nee Aako un alhhe'eés, nee gadiyér'eé' tidá' naa ilaaóh dír Aako Yésú wa ale, ngiwa alhhe'ees. Nee gadiyeérí an alki/ituú Ya/abtór hho' daanduú gurtleemuú Mungú.
25«Aníng ana hi'iimiít baraá tla/angwhúng wa ale, waawuti'iimár Mungú ngiri alki/iít. Nee ala aníng hamí a xuú' baraá tla/angwhunge heé aníng i malé ar i kaahh. 26Gawaá adoorihe laarí án kuungá' nu baw ar geehhooeema, hee dirhunge bira qwaár, a daanduueeneeká. 27Asma aníng adoodá' sleémeero Mungú i slai dirhúngí alki/iituuwo ngaa mawiiká. 28Kuungá' kilá' munerhúng harmagahhaak, nee kríshaanáydá' sleémeero, kudá' Qeeruú hhoohhoó' oo Mungú kuungá' nuwa qaás tawa xuumuuser'ín. As múk Aako kuwa de'eenda', kudá' inós aa tlaáxw ar tseereerós ar kilá'. 29Aníng a xuú' adór án bar aga tláw, taweruú xaraásl ir dáh baraá tla/angwhúng nee múk kríshaanáy gu gurtlayká. 30Nee slám baraá tla/angwhunge muu i ti'iit. Mukwí looeema giri warqees as eeharuuse kawa amor'ín i uuruuxi, inooín kiri eehar. 31Gawaá adoorihe, kuungá' dalaaé'. Ma gunqaruutara' adór aníng kuungá' sleémeero nura hara'ayiyiím ar hhirhheeri, xweera nee tlaatla/aango, baraá kureeraá tame, slám naa baloó mawiiká.
32«Ala aníng hám daxta kuungá' nu qaás baraá dabaá Mungú, nee dír axweesantadár gurtleemuú Mungú. Tidá' kuungá' nu kwa/as nee nuri aalírí hanís dinkwa nee mukdá' taa hhoohhooeés. 33Aníng peésár hee aga baloó slaiiká, laqaá sahaábu, laqaá tam inqwaruuwós. 34Kuungá' kilá' a xuá' adór dabaaeé' kuká' nira gadiyuusiyé' as muruudá' án ni slaa' nguwa slaw, dinkwa nee mukdá' nee aníng al hootá'. 35Baraá muruú yaariire aníng ngaa laqaám, adór gár atén tiwa hariím, tar liitlakuuse kawa alee/iisaan, ar gadiyér adór tí kawa tleehhaan. Nee /ayma'aá Aako Yesu ki inslawaán, kudá' iwa oó', ‹Qwala/ i deer baraá gaa haniisaro ta baraá gaa ilaooharo.› »
36Qoomár Paulo axweesanaywós nguwa hhe'eés axweesanto, iri tumbarara'aát dinkwa nee mukdá' sleémeero, iri firín. 37Sleémeero tari ló'wa /aa/amín, Paulo kuri slaqooín i ohín kuri ma'amiís. 38Tari ló'wa gurhaamuút as /aymuudá' Paulo iwa oó', «Án kuungá' i malé aanda'aaká daxta.» Kuri haydohiís ay dír miringamo.
Currently Selected:
TLEHHMA'AÁ YA/ABUUSE 20: IRQW
Highlight
Share
Compare
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
