TLEHHMA'AÁ YA/ABUUSE 18
18
Paulo iwa baraá Korinto
1Kaangwí iwa waaraáhh, Paulo iri Athénér wa tláy, iri hardáh ay Korinto. 2Amoodae heeko oo Yahudi guri ár, umuuwós ku bay Akila. Inós a heé taa yaamaá Pontór wa laqwaál. Inós nina hardáh yaamaá Italiár wa ale deeloodá' tseewe, dinkwa nee hareerós Priskila. Asma Klaudio hara'aya gana oó' múk Yahudi sleémeero iwa quutli baraá gixsár Romaro. Paulo iri hardáh dír dooín. 3Iri didá' wa hoót, asma inooín sleeme gadiyér'ín a ád taqár Paulo, ar heéma hirit. 4Umuúqo deelór Sabaátoro Paulo ina dáh baraá doó saaliingw, múk Yahudi nee oo Yunaniro guri intsaahhatimís as ngiwa ar ba/i.
5Sila nee Timoteo tindiwa aweér Makedoniár wa ale, Paulo pa/aangw guri sláy oo axweesantá Mungú ngiwa alki/iiti umuúqo deelooro, múk Yahudi guri lamabu'ún adór Yesu tar Kristo. 6Múk Yahudi axweesanayduú Paulo guri sií', kuri /ooslislín. Paulo giri teerír baraá tlabaawósí kuukuú', iri oó', «Kuungá' bar aga qwadé', a daandeemoohúng. Gár án i huuw i káhh. Iimír hamí aníng aga tláw amór múk xoordaá hatlá'.» 7Paulo iri didá' wa tláy, iri dáh baraá doó heeko wák, umuuwós ta bay Tito Yusto. Heewí a heé Munguú ilaiwawaá/. Do'ós nee doó saaliingw ti hariyá'. 8Krispo, heé úr oo doó saaliingw, Aako guri haratlintií' dinkwa nee múk do'ós sleémeero. Nee múk yaariír oo yaamaá Korinto axweesantá Paulo kawa iiárií qamín, tari haratlintií' kiri baatimiís.
9Xweeraakari wake Aako Paulo guna baraá iigu'utúr báy, «Ma da'ayumiitaar, axweesante'eé' alki/iiteek, slám ma xasliitaar. 10Asma aníng nee kuúng a dinkwa. Heé kuúng u i haratláw nee u gaa laáq i kaahh, asma aníng muk'eé' ku yaariír baraá gixsarihe.» 11Paulo iri baraadá' wa hoót kurkú wák nee slahheeraá lahhoó', Ya/abtór Mungú gari intsaahhatimís tla/angw'ín wa ale.
12Ala qoomár Galio tawa ga/aawusmoó yaamaá Akaya, múk Yahudi sleémeero Paulo guri i haratláy ar muunuú wák, guri huúw ay geeraá doó kwasleema. 13Tari oó', «Heewí i múk afa/aslín as Mungú kuwa ilaiwawaa/i adoodá' nee hara'ayár Mose ti slaw'aaká.»
14ala Paulo qoomár iwa adoorí wa ilawatstá slai, Galio múk Yahudi guri báy, «Kuungaá múk Yahudi, heewí geera barnaxes gár tlaakw gana tleéhh, geera alók án kuungá' nu iiárií qaás. 15Ala barnaxes tin tlaampa'aamisá' daanduú axweesanaay nee daanduú ume nee daanduú hara'ayarhúng, kuungá' kiloohúng alqaytsitaak. Asma aníng a sla'aaká niwa har'ohusmo tleehhiit daanduú muruuhúng kwisinge.» 16Giri guús dír geeraá do'duú kwasleemaro. 17Múk Yahudi sleémeero Sostene kuri óh. Inós a heé úr oo doó saaliingw. Kuri muúx dír geeraá doó kwasleemár wa ale. Ala Galio adoodá' tam ngaa ga/ayi gaa gaárií xuiiká.
Paulo iwa kií/ Antiokia
18Paulo iri amoodá' wa hoót deelór yaariire. Aluuwo deelo gari oó' dír hhae, iri tláy ar baraá tlawi ay yaamaá Siria. Priskila nee Akila tay alkoné' nee inós. Ala iwa baraá yaamaá Kenkréarí dirii'i se'eengós guri deéqw, asma al'axweesantá lo'o gaa /aáy. 19Tari hardáh ay gixsár Efeso, giri amoodá' i geexáy, inós iri dáh baraá doó saaliingw, tiri tlaampa'amisiyé' nee múk Yahudi. 20Inós kuri firín as iwa hooti deelór hhaawakahe, ala inós aa ya/aniká. 21Paulo deelo gari dir'íní oó', giri báy, «Mungú bar ngaa slaá', aníng niqo malé kií/.» Iri Efesór wa tláy ar tla/ángw tlawi.
22Iri hardáh ay Kaisarea, iri tsa/án, múk kríshaanáy guri laaw'eesár áy. Aluuwo iri aweér ay Antiokia. 23Iwa amoodá' wa hoót deelór niinawe, iri malé tláy, iri waaraáhh ar tla/ángw yaamaá Galatia nee Frigia, inós eeharuuse sleémeero gari alee/iimiís /uuru nguwa sleer baraá haratlintaaooro umuúqo gixsaro.
Apolo Ya/abtór hho' ngiwa baraá Efeso nee Korintór wa alki/iít
24Heeko wák oo Yahudi, umuuwós ku bay Apolo, nina hardáh ay Efeso. Inós a heé ta Aleksandriár wa laqwaál. Slám a heé sagalooár koóm baraá axweesanto, nee Gooír axweesantá Mungú ga ló'wa xuu'. 25Heewí kwaa intsaahhatimís loohír Aakoowo, slám muunaáwós i hamiis. Iri iimu/ún axweesanto nee intsaahhatimisuuwo ar adór qoom daanduú Yesuwo. Ala inós baatiísmoó aa xuú' a kuduú Yohane kilós. 26Axweesantá Mungú gari alki/iít ar pihh'uuma baraá doó saalíngw wa ale, tam Priskila nee Akila nguwa iiárií qaminé', kurir waátl, kángw loohír Aako kuri dirósí alki/it hhe'eés ar adoodá' ir hariin. 27Inós iri waarahhamaá slaá' ar baraá tlawi ay yaamaá Akaya. Hhae nguri harakeesiyé', barwá ngiri gooiné' amór eeharuuse as kuwa dahi'isi. Inós iwa amoodá' i hardáh, mukdá' aa haratlintii', guri ló'wa alee/iimiís ar /uuruudá' Mungú aa inós i haniís. 28Asma inós múk Yahudi guna ló'wa ar ba/a hhe'eés geeraá muu sleémeero wa ale, ngiwa laqaqan ar Gooír axweesantá Mungú adór Yesu tar Kristo.
Currently Selected:
TLEHHMA'AÁ YA/ABUUSE 18: IRQW
Highlight
Share
Compare
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
