TLEHHMA'AÁ YA/ABUUSE 15
15
Dinkwár ur ar ya/abuuse baraá Yerusalemu
1Mukko nina Yudeár wa hardáh, hhae kiri intsaahhatimís tawa kaahi, «Kuungá' bartunda al/utliniká, adoodá' hara'ayár Mose i kat, a baloó ba/aanda'aaká.» 2Paulo nee Barnaba tiri ló'wa tlaampa'amisiyé' nee mukwí, tari kaangaanuús. Hhae kwasleema ngiri tsatiyé' Paulo nee Barnaba nee múk hatlá' baraá tla/angw'ine ta tsa/an ay Yerusalemu, amór ya/abuuse nee amór bariise, as daanduú yaahastí.
3Mukwí kuri haydohiís nee múk kríshaanáy. Tari waaraáhh ar tla/ángw yaamaá Foinike nee Samaria, kángw múk xoordaá hatlá' adór ira hhu'u'ún kuri alki/iít, hhae sleémeero niri ló'wa qwalaa/iyé'. 4Qoomár tawa hardáh Yerusalemu, kiri dahi'ís nee kríshaanáy nee ya/abuuse nee bariise. Nee muruudá' sleémeero Mungú aa tleéhh ar inooín, kuri alki/iít. 5Ala múk Farisayo bahh'alé, kudá' aa haratlintii', tari sihhiít tari oó', «A gár hariim múk xoordaá hatlá' kuwa al/uutli nee kuwa hara'ayin, hara'ayár Mose kawa eehari.»
6Ya/abuuse nee bariise tari burumburiít as kaangwí kuwa aldakuuti. 7Tari ló'wa kaa/uús. Aluuwo Petro iri sihhiít, iri oó', «Hhaee'eé', kuungá' a xuá' adór iimír aange Mungú aníng ira tsawaár tla/angwhúng wa ale as Ya/abtór hho' ngiwa alki/iit dír múk xoordaá hatlá', as inooín kawa haratlintii'i. 8Mungú munér muu ga xuu'. Nee inós Qeeruú hhoohhoó' guna dir'íní haniís adoodá' ngura dirén i haniís sleeme. Gawaá adoorihe gan laqaqán adór mukdá' ngura ya/án. 9Mungú barqaanti gaa tleehhiiká dír tla/angwrén nee inooine. Tlakweemaaín gina gurtláy asma inooín sleeme taa haratlintií'. 10Gawaá adoorihe kuungá' mas Mungú iiara'adá' ar huwár iiloo' kawa tsa/amisa' gawaá sum'aá eeharuuse? Huwaarí baabi'iirén laqaá tam atén awa kilá' aga aleeslawaaniiká gagaararo. 11Ala gár ta haratlintatiaan a tí, atén a ba/amán ar gurtleemuú Yesu Kristo, adoodá' inooín sleeme tara ba/án.»
12Múk baraá dinkwadá' sleémeero iri xasliít, Barnaba nee Paulo kiri iiárií qamín. Inooín kángw layu nee muruú waa/oo/amo kuri alki/iít, kudá' Mungú aa tleéhh ar inooín tla/ángw xoordaá hatlá' wa ale. 13Barnaba nee Paulo tawa hhe'eés axweesanto. Yakobo iri iimu/ún iri oó', «Hhaee'eé', aníng iiárií qaasaré'. 14Simeon ngaa alki/iít dirén i alé adór Mungú iimír iimu/uungo múk xoordu ngura sa daawimiít, as mukko nguwa tsawaár baraá tla/angw'ine as tawa mukós. 15Tam axweesanoó aaruuse nee kaangwí ti slaslayá', adoodá' kara gooín,
16‹Aluuwo aníng ni kií/,
nee doó Daudi ngway malé tleéhh, kudá' aa huu'.
Nee wa/aameedá' aa met
ngiri inkií/ tleehhamooro,
ngway /abeemaá i ki/ís.
17Gawaá adoorihe múk hatlá' sleémeero Aako ngu leeleehhi,
múk xoordu sleémeero kudá' naa ateét tawa muk'eé'.
Tí Aako gana oó', kudá' muruuwí gwaa tleehh,
18aa xu'utiít iimír aange.› »
19Yakobo iri kumiít iri oó', «Gár án ni slaa' a tí, ‹Mukdaáduú xoordu Mungú gwa haratlintii' muwa slahh'eemisaán. 20Ala barwá masók an amor'íní gooiimaán as tiwa harmagaahhiya' nee muruudá' taa ilahhooár munguaá hatlá' wa haniís, nee tsaatu'uuma, nee fu'unaydá' makiito'ór taa af'óh, nee tseere. 21Asma iimír aange hara'ayár Mose ka soomamuus baraá maraá saaliingo umuúqo deelór Sabaátoro, nee axweesanaywós kudá' ku alki/aa/iit umuúqo gixsaro.› »
Barwár Ya/abuuse
22Aluuwo ya/abuuse nee bariise nee kríshaanáy sleémeero oo didií dirií', axweesani kari tsaát tawa kaahi, «Muu un tsawaaraán baraá tla/angwrén wa ale, kuri ya/aawaán nee Paulo nee Barnaba ay Antiokia.» Nee múk taa tsawaár a kwí: Yuda, kudá' ta bay Barsaba, nee Sila. Mukwí an geeraharuuse baraá hhaeewo. 23Barwá kari gooín kari ya/aáw ar mukdá'. Barwaádá' gár i kat a tí, «Intsihhiisarí amór i dahh a amór ya/abuuse nee bariise. Kana gooín amór hhaeerén kudá' awa xoordaá hatlá', awa baraá Antiokiár i diriiá', nee Siria nee Kilikia. 24Atén aga axaasaán adór, mukko amoorén daáhh kuungá' nura daawitimiís ar axweesanay'ín, nee munerhúng ngaa xurér i qaasiyé'. Ala atén inooín ngaa ya/aawaniiká. 25Gawaá adoorihe atén aga al'axweesaán ar muunuú wák, muu un tsawaaraán nee nguri ya/aawaán amorhúng dinkwa nee sla'aruuseerén Barnaba nee Paulo. 26Inooín a múk slafingw'ín gwa haniis as gadiyér Aakoorén Yesu Kristo. 27Gawaá adoorihe Yuda nee Sila ngin ya/aawaán. Inooín axweesanaywí ngun ooiyá' ar afer'ín ar kilá'. 28Asma Qeeruú hhoohhoó' oo Mungú nee atén axweesani aga tsataán as huwár hatlá' makawa daandeemoohúng i qaás, ala a har tidá' kuungá' wa hariim. 29Ti harmagahhe' nee muruudá' sleémeero taa ilahhooár wa tsuú/ dír munguaá hatlá', nee tseere, nee fu'unaá makiito'ór taa af'óh, nee tsaatu'uuma. Birta harmagahhé' baraá muruuwihe, daqaní adór hhoo' aga tlehhé'. Deeloosé'. »
30Mukwí kuri ya/aáw, tari aweér ay Antiokia. Tawa hardáh, múk alqaati sleémeero kuri burumbuúr, barwaádá' kari haniís. 31Qoomár soómaro kawa hhe'eés, mukduú alqaati iri qwalalaá/ as gurkwa/asadá'. 32Yuda nee Sila inooín a aaruuse. Gawaá adoorihe niri alqadidiné' dír hhae ar axweesanoó yaariír, hhae ngiri gurkwa/amiisiyé', nee /uuru nguwa slaya' baraá haratlintaaooro. 33Tari hoót amoodá' wa ale deelór niinawe. Aluuwo hhae niri ya/ané' niwa watliya' ar wayda amór mukdá' inooín ngaa ya/aaw. [ 34Ala Sila iri amoodá' i meét, adoodá' inós ngira slaá'.]
35Paulo nee Barnaba tari hoót Antiokiár wa ale. Ya/abtór hho' ar Aako kari intsaahhatimís nee kari alki/iít dinkwa nee múk hatlá' oo yaariír.
Paulo nee Barnaba tiwa partliitiyé'
36Deelór niina iwa waaráhh, Paulo iri oó' dír Barnaba, «Qwaláng, daxta a ki/aán amór gixsaduudá' sleémeero awa axweesantá Aako kawa alki/iitaán. Xáda xáy, hhaeedá' adór i dirii'iya' a adoomá.» 37Barnaba gana slaá' tiwa kona' nee Yohane, kudá' ta babay Marko. 38Ala Paulo gaa slaiiká kuwa huwi, asma adoodá' aáng ngiwa geexáy Pamfiliár i aleeró, baraá gadiyeé. 39Gawaá adoorihe Paulo nee Barnaba tari ló'wa kaa/uús, tam tiri paraatliyé'. Barnaba Marko gurir tláy, tari waaraáhh ar baraá tlawi ay Kipro. 40Ala Paulo Sila guri tsawaár, kuri aleefirín nee hhae as tsuuqaá Aako ngiwa slay, iri tláy. 41Iri waaraáhh ar baraá yaamaá Siria nee Kilikia, múk kríshaanáy guri alee/imiís /uuru nguwa slaya' baraá haratlintaaooro.
Currently Selected:
TLEHHMA'AÁ YA/ABUUSE 15: IRQW
Highlight
Share
Compare
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
