TLEHHMA'AÁ YA/ABUUSE 16
16
Timoteo tiwa alkoné' nee Paulo nee Sila
1Paulo iri hardáh dír gixsár Derbe nee Listra, nee didaádane eeharusmoó wák i deer, umuuwós ku bay Timoteo. Inós a garmoó /ameenirkar Yahudi ar Mungú gwa haratlinti'. Ala baabuúwós a heé Yunani. 2Heewí kwa lamabu'úngw hhó' i káh nee mukdaá haratlintii' oo baraá Listra nee Ikonio. 3Paulo Timoteo guna slaá' tiwa alkona'. Gurir tláy, guri al/uútl, as múk Yahudi oo amoodí dirií', asma sleémeero ka xuu' adór baabuúwós tar heé Yunani. 4Inooín gixsadu kina alhi'iimiít, hhae kiri ádbabáy adoodá' kira hara'ayín nee ya/abuuse nee bariise, tidá' Yerusalemúr i dirii' ngiwa harmagaahhiya'. 5Gawaá adoorihe kríshaanáy umuúqo diiro /uuru guri sláy baraá haratlintaaoodae, faaror'ín iri doogigiín umuúqo baalaaro.
Paulo iigu'utu nguwa baraá Troár wa ár
6Tari waaraáhh ar baraá yaamaá Frigia nee Galatia. Qeeruú hhoohhoó' oo Mungú gaa aleeya/aniká axweesantá Mungú kawa alki/iiti baraá yaamaá Asiaro. 7Qoomár yaamaá Misia kiwa i qón, daqeemuú Bitinia kuri iiár, ala Qeeruú Yesu aa ya/aniká. 8Tari waaraáhh ar yaamaá Misia, tari aweér ay Troa. 9Paulo xweeraawo iigu'utu guri ár. Heé yaamaá Makedonia guna ár, i sihhimiit, i Paúló babay, «Waaraahháng amór yaamaá Makedonia, atén ti alee/isár eer.» 10Paulo iigu'utudá' arto nguwa hhe'eés, hamtidár kilae tleemuú Makedonia kuri sla'aán, asma aga tsaahhaán ar ló' Mungú atén taa ateét, as Ya/abtór hho' kawa dir'íní alki/ituú awaan.
Hhu'u'úngw Lidia baraá Filipi
11Tari tlawaán ar miringamo Troár wa ale, tari waarahhaán ay Samotrake, ala aga sihhiitaniiká. Nee bál tsár tari hardahaán ay Neapoli. 12Nee niwa didá' wa tlawaán, tari hardahaán ay gixsár Makedonia ar ta bay Filipi, an gixsár ur baraá ayaadae, slám an dír boómár múk Roma i diri'. Tari hootaán baraá gixsadá' wa ale deelór hhaawaakahe. 13Bál deelór Sabaátoro ana tlawaán nay ti'iitaán tsee/áy alé afkú gixsaro, tari tlawaán afaá yaae. Asma atén ka xuaan dír tawa firarin i deer. Tari iwiitaán tari axweesaán nee /ameenarka aa didií burumburit. 14/Ameenirka ta bay Lidia didae i deer. Inós inqwaruú sirda/atén gun weermaamís. Inós ar baraá yaamaá Tiatira. Inós i Munguú ilaiwaawá/. Atén tiri iiárií qás, nee Aako muunaáwós guri gweér, axweesantadá' Paulo aa axweés gari ót. 15Inós baatisaro kawa hhe'eés nee múk do'ose, tiri harhheehhe'és iri ó', «Kuungá' bar aga aandé' aníng Aako ugwa haratlintií', qwalaasé', hooté' baraá dooeé' wa ale.» Tiri harakés.
Paulo nee Sila kiwa tsegiít baraá Filipi
16Looarka wake tawa didár saalíngw kawaan, nee lawaalo'orka tina doogaán ar neetlaamér aaru'uumár koom. Inós daqaareerós gan daqaari'iimár yaariírí slaasleér ar loohír aaru'uuma. 17Paulo guri eehát, nee atene, i aluurén wa tseeamiín i kat, «Mukwí a sagadiyuusér Munguú Gáwtí dirií'. Inooín kángw loohír ba/ama kun alki/iit.» 18Adoorí gari tlehhít deelór yaariire. Ala Paulo iri gurhaamuút, iri alií warqáy, neetlangwdá' guri báy, «Aníng kuúng u báw ar umuú Yesu Kristo, ti'iít baraá lawaalo'oorihe.» Neetlangwdá' iri ti'iít siiwadár kilae.
19Ala daqaareerós adór haraxu'utír daqaari'iimar'ín ira qwát ngiwa aán, Paulo nee Sila kiri uhín, kiri duuruxún ay dír boo/oó muu baraá gixsa, dír doó kwasleema. 20Kiri huúw ay dír geeraá bariisér uren ar kwasleema, tari oó', «Mukwí i tlaahhír qamín ló'wa aleeró baraá gixsarén tihe. Slám inooín a múk Yahudi. 21Inooín uunuú atén wa hariima'aaká ilaooharo tam eeharto ngin intsaahhatimisiyá', asma atén a múk Roma.» 22Boo/aay sleémeero iri bartá wák áy, Paulo nee Sila kiri inqwar duxún nee bariisér kwasleema.
Nee bariiseedár kwasleema hara'aya gari ó', kiwa muxi ar hhara. 23Nee kiwa hhe'eés muxtár yaariire, kiri kwaáhh baraá doó tseegamo. Xuumusmooduú doó tseegamór ga/áw kuri báy, «Mukwí ló'wa xuumeek.» 24Inós tí kwaa báy ngiwa axaás, giri kwahha hhe'eés baraá qul/ír baraá do', giri ya'a' tsegiít ar peehhoó iló'.
25Ala Paulo nee Sila qoomár amsiwo Mungú kuri firín, nee nguri i daaiyé' ar daa'ángw ilahhooa. Nee mukduú hatlá' taa tseegiít ta axamiis. 26Hamtidár kilae kunseelír ur niri hardát, tam koo/ír do'duú tseegamo iri dingít. Nee afér do' iri adaá gweerít, nee qutúruudá' muu sleémeero kura tsegiít iri slakwekwe'eét. 27Xuumusmooduú doó tseegamo iri daarkiít, adór afér doó tseegamo ira gweerít ngiwa ár, paánga gari taataáhh, ti gaasár wa slaa'. Asma inós ngi xui mukdá' taa tsegiít aa /akumiít. 28Ala Paulo iri tseé' ar afór ur, iri oó', «Miti gaasaar, asma atén sleémeero a diirí diriiaán.»
29Xuumusmoodá' tsaa'asi gari firín kawa huwi. Iri dáh ay baraá do', i hara daaraax as dae. Iri tumbarara'aát dír Paulo nee Sila. 30Paulo nee Sila ngirirar ti'iít tsee/áy alé, iri oó', «Bariíse, aníng adór ni laaq a adoomá ar nir ba/am?»
31Kuri báy, «Aako Yesu na haratlintieek. Daqaní kuúng a ba/aán nee múk do'oge.» 32Axweesantá Aako kari dirós i alki/iít, inós nee múk do'ós sleémeerowo. 33Xuumusmoodá' Paulo nee Sila giri ar tláy siiwadár kilár xweeraawo, inkahhi'ii'ín giri hamaátl. Inós nee múk do'ós sleémeero kiri baatiís siiwadár kilae. 34Xuumusmoodá' Paulo nee Sila giri ar waátl amór do'ós i alé, giri muruú /aymár i tleéhh. Inós nee múk do'ós sleémeero tari qwalalaá/, asma Mungú kwaa haratlintií'.
35Qoomár looa niwa tleér, bariiseedár kwasleema mukdá' urén oo askaári kuri ya/aáw, tari oó', «Mukdá' geemawaak, i tlay amor'ín ar ta slai.»
36Xuumusmooduú doó tseegamo axweesantadá' gari dír Paulo i oó', «Bariiseedár kwasleema muu ngwa ya/áp kuungá' tunduwa gweeri. Ala daxta ti'iité' tsee/a, tlawsé' ar wayda.»
37Paulo giri báy, «Atén tina muúx dír geeraá múk wa aleeró, ala atén taa sakwasleemuutiiká. Nee atén a múk Roma. Slám atén tina kwahhiyé' baraá doó tseegamo. Nee hám qaytsiít, ti qawtí duuxár wa slaiyá'. Adoorí i ya/aandaaká. Inooíná kilá' ni hardihiye', atén ti duuxár aye'.»
38Askaáridá' kaangwí guri húp amór bariiseedár kwasleema. Nee bariiseedár kwasleema adoorí ngiwa axás, adór inooín tar múk Roma, tari ló'wa da'ayuút. 39Bariiseedár kwasleema niri hardát, Paulo nee Sila kiri harhheehhe'eemiís. Nee kiwa hhe'eés tsee/áy duuxaro, kiri harhheehhe'eés tawa ti'iiti baraá gixsarihe. 40Paulo nee Sila tindiwa ti'iít baraá doó tseegamooro, tari dáh baraá doó Lidia. Tiri doogiyé' nee hhae. Hhae kiri gurkwa/amís. Paulo nee Sila tari tláy.
Currently Selected:
TLEHHMA'AÁ YA/ABUUSE 16: IRQW
Highlight
Share
Compare
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
