TLEHHMA'AÁ YA/ABUUSE 14
14
Paulo nee Barnaba ta baraá Ikonio
1Paulo nee Barnaba tawa Ikoníór i hardáh, tari dáh baraá doó saaliingw oo múk Yahudi, adoodá' taa tleéhh baraá Antiokiaro. Axweesantá Mungú kawa alki/iít, múk yaariír iri haratlintií', múk Yahudi nee oo Yunaniro. 2Ala múk Yahudi kudaá haratlinti'iiká múk xoordu guri dukún as hhae kiwa aahhi. 3Inooín tari amoodá' wa hoót deelór yaariire. Kángw Aako kuri axweés ar pihh'uuma. Aako aleesleemu guri dir'íní haniís oo layu nee muruú waa/oo/amo kuwa tlehhiiti, Aako axweesantadár daanduú gurtleemuuwós gari laqán adór tar ló'. 4Múk baraá gixsadá' tiri partliít, bahh'alé ta bartá múk Yahudi, nee bahh'alé bartá ya/abuuse.
5Múk xoordu nee múk Yahudi nee geeraharuuser'ín adór ya/abuuse kar slahh'eemisi nee kar tlaquuti ar tlaa/e kari al'axweés. 6Ya/abuuse kaangwí guri axás, tari goów ay Listra nee Derbe, gixsadaá yaamaá Likaonia, nee yaamuudaá iisaapaydá'. 7Ya/abtór hho' kari alki/iít amoodae.
Paulo nee Barnaba i baraá Listra nee Derbe
8Baraá Listraro heeko wák i deer oo diqoó ya'aawós wananaá'. Heewí a taqoormo iimír kuwa laqwaali, inós digir gwa baloó tu/iiká. 9Heewí Paulo guna iiárií qamín qoomár iwa axweesi. Paulo heedaádá' guri ilií duxún, guri tsaáhh adór haratlintaaór gu hungu/uus ngir kón. 10Paulo iri tseé' ar afór ur, guri báy «Sihhiita hhe'eés ar ya'aawók.» Heedaádá' iri sihhiít ar gaanslaay, iri hi'iimiít. 11Boo/aydá' adoodá' Paulo aa tleéhh ngiwa ár, tari tseeamín ar afór ur, tari oó' ar tsifrír Likaonia, «Mungui taa hara aweeriyé' ar slaqsa'aá muu.» 12Barnaba kuri báy Seu, nee Paulo kuri báy Herme, asma inós an heé aa ak axwees. 13Kaahamusmoó Seu, kudá' do'ós geeraá gixsár i dirií', awe ngiri huúw, nee slamángw /ayo, ay dír afkú gixsa, asma inós nee muko ilahhooár muruú ta tsu/i kana haniisár wa slaá'.
14Qoomár Barnaba nee Paulo kaangwí kuwa axaás, inqwaruuín kuri feehhamiís, tari ta'aaín, tari dáh baraá tla/ángw boo/aydá', ta tsimahhuus, ta kaahi, 15«Múlqe, kuungá' gár adoorí kas tlehhita' a milá? Atén a múk adór kuungá'. Atén kuungá' nuna Ya/abtór hhó' ií huwaán, as kuungá' tawa warqeera' baraá muruuwí tlakwe, Munguúdá' slaáf kuwa i warqeera', kudá' doori nee yaamu nee tlawi gaa tleehh, nee muruudá' baraadií diriia sleémeero. 16Inós aáng baraá qartá aa waarahhi, xoordu sleémeero gina máy as lohuduuín kiwa eehari. 17Ala muu gwa tawó mayká, ala adór muu inós ngur tsaahhi i deer. Inós hhooeemaawós gaa dirhúngí laqán ar tluwaydá' ni gawaá doorí wa hanmamisi, nee bu'uungw nguwa hanmamisi ar qoomaarós. Slám gur'erhúng ga aaxamiis muruú /aymaro, nee munerhúng ga qwal/atimis.» 18Ala /aymi'iiká' tam kaa axweesi, boo/aydá' kwaa lak ilaa/iiká as mikiwa ilahhooárií tsuú/.
19Mukko Yahudi niri hardáh, i Antiokiár daahh nee Ikonio. Mukwí boo/aay guri harakeemiís. Aluuwo inooín Paulo kuri tlaquút ar tlaa/e, kuri duuruxún ar yaamu ay tsee/aá gixsa. Inooín geeraawo ka xui aa qaroó gwaá'. 20Ala eeharuuse Paulo nguwa harwét bihhe sleémeero, iri sihhiít, iri dáh baraá gixsa. Nee bál tsár iri tláy baraadá' wa ale dinkwa nee Barnaba ay Derbe.
Tari kií/ Antiokiár yaamaá Siria
21Alaá Paulo nee Barnaba Ya/abtór hho' kawa baraá gixsadá' wa alki/iít, eeharuusér yaariir kari sláy. Tari kií/ ay Listra, nee Ikonio nee Antiokia. 22Inooín eeharuuse kari gurkwa/amís nee /uuru nguwa sleer baraá haratlintaaooro. Nee tari oó', «Atén gár tiwa hariím an dahaán baraá waawuti'iimár Mungú ar slahha'amaayér yaariir.» 23Dír umuúqo kríshaanáy iwa deero bariise kari qamín. Tari firín nee tari gwaawín. Inooín kiri geexáy baraá dabaá Aako, kudá' taa haratlintií'.
24Tari waaraáhh ar tla/ángw Pisidia tari hardáh ay Pamfilia. 25Qoomár axweesantá Mungú kawa Pergár wa alki/iít, tari aweér ay Atalia. 26Tawa didá' wa tláy tari waaraáhh baraá tláwtár alé ay Antiokia. Diirí an didár múk kríshaanáy inooín ngiwa aleefirín /uuruú Mungú ku slay as gadiyeérí kawa tleehhi, tí hám taa hhe'eés.
27Qoomár tawa hardáh Antiokia, múk kríshaanáy kuri dinkwárí ateét, muruudá' sleémeero Mungú aa tleéhh ar inooín, kuri dir'íní alki/iít. Kiri ádbáy adór Mungú pa/aangw ngura haniís as múk xoordaá hatlá' sleeme iwa haratlintii'i. 28Tari didá' wa hoót nee eeharuuse deelór yaariire.
Currently Selected:
TLEHHMA'AÁ YA/ABUUSE 14: IRQW
Highlight
Share
Compare
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
