Yililu 22

Pawulu hakuhosha nezaza

1Nindi, Enu anakwetu, ninenu atata, tiyenu munukudihakwila kudenu.

2Chanatiyuwu wudi nakuhosha nawu mwidimi daHeberu, asweja nikumwena.

3Hakuhosha nindi, Ami #Fwi 3:5-6nikaYudeya, navwalikilili kuTarusa muSilisiya, ilaŋa nadizilili muŋanda yinu kunyendu #5:34yaGamaleli; amfumbilaŋa mwaloŋela nshimbi yawankakulula jetu chikupu; nadiŋi nakumukalakela Nzambi naŋovu neyena kumuchima, neyi chimudi nakwila wejima wenu lelu.

4 # Ŋal 1:13-14 Nakabishilaŋa akwaNjila yinu hela kuyijaha; nadiŋi nakukasakasa amayala nawambanda nakuyisha mutuleya.

5Hela kapristu muneni hichinsahu wukushimuna tuhu, niakulumpi ejima. Wowu anyinkeli nyikanda yakudi akwetu aYudeya, kulonda nakayi mulwendu lwakuDamakasa, nakayileti akwakukuhwelela munyonji kuYerusalema, kulonda akayibabeshi.

6Chinadiŋi nakuya munjila yami, hinukushika kwakwihi naDamakasa, itaŋwa mwiwulu; kukasumuka chejeji cheneni chakufuma mwiwulu hichikuntoŋekelami kwi-ndo.

7Hinukudimbuka hamaseki, nitiya niizu hidikuŋila nindi, Eyi Sawulu, Sawulu, wankabishilaŋadi?

8Hinukwakula nami, Yeyinyi Mwanta? Yena hakuŋila nindi, Yami Yesu wakuNazareta, yami wakabishaŋa.

9Akwetu twadiŋi nawu, chalala chejeji achimweni, hakwila izu danowu wadiŋi nakuhosha nanami hiyaditiyiluku.

10Hinukwila nami, Nukwila ŋahi, Mwanta? Mwanta hakuŋila nindi, Nyamukaku, wuyi muDamakasa, diku kwakakulejelawu mudimu wejima wanakukunjikuwu.

11Chinakaŋenyi kumona hansaŋu yakusweja kwachejeji chalubanji lwakulema, akwetu nadiŋi nawu hiyakunkwata kuchikasa, hinukwiŋila muDamakasa.

12Muntu wumu ijina dindi Ananiya, iyala wukweti kalemesha kakulemesha nshimbi, amuhamekelaŋa kudi aYudeya ejima ashakamini muDamakasa;

13hakwinza kudami, hakwimana kwakwihi, hakuŋila nindi, Eyi manakwami Sawulu, tonaku. Hohenohu hinukutona, hinukumumona.

14Yena hakwila nindi, Nzambi #3:13yawankakulula jetu nakukunjiki kukwiluka muchima windi, #1 Kor 9:1; 15:8wumoni Mukwakuloŋa, wutiyi izu dakukanwa kindi.

15Muloŋa wakekala chinsahu chindi chakushimuna kudi antu ejima yuma yiwunamoni nikutiya.

16Wukulabiladi dinu? Nyamukaku, akujimiki, wutooki kunshidi jeyi chiwukutambika ijina dindi.

17Chineli nafunti dehi kuYerusalema, hinadiŋi nakulombela muTembeli, hinukwila neyi nayi mutulu.

18Hinukumumona Yesu, hakuŋila nindi, Nyakalaku, wufumi swayi muYerusalema, muloŋa hiyakwiteja wunsahu weyi wakunshimunaku.

19Hinukwila nami, Mwanta, awenawu aneluki chinashilaŋa akwakukukuhwelela amumashikola ejima mukaleya, nikuyeta chikupu.

20Chamwaŋiluwu mashi achinsahu cheyi Stefwanu, ami kwoku nemeni, hinukwitejamu, hinukuhemba mahina anawa adiŋi nakumujaha.

21Hakuŋila nindi, Yaku tuhu, muloŋa ami nakakutemesha kudi aJentili kwakulehi.

Pawulu hikaRoma

22Hiyakumutiya kushika nihezu odu; henohu hiyakuvwakuka nawu, Muntu wudi ichi hadi kwikala hamasekuku. Hanateli kuhandaku.

23Iku adi nakubideka naŋovu, nakutabola mahinawu, nakunata lunkuŋu kwiwulu,

24mukulumpi muneni wamashidika hakuyila mashidika nindi mwiŋijenu mwitala denu, nindi muvupulenu nachikoti kulonda niluki nsaŋu yakumubidekawu.

25Chanamukasuwu nanyisulu, Pawulu hakumwila mukulumpi wamashidika wadiŋi nakwimana kwakwihi, nindi, Kuvupula kaRoma chakadi kumuhisha, hichinjilaku?

26Chanachitiyiyi, owu mukulumpi hakuya kudi mukulumpi muneni wamashidika, hakumuleja nindi, Keŋa wili chumanyi? Yeniwu muntu hikaRoma.

27Mukulumpi muneni wamashidika hakwinza, hakumwila nindi, Nleji, eyi wukaRoma? Yena nindi, Eŋa.

28Mukulumpi muneni wamashidika hakwakula nindi, WuRomiwu ami nawulandili namali amavulu nankashi. Pawulu nindi, Hakwila ami kwami dimu munavwalikila.

29Henohu wena akeŋeli kumuvupula amufuma nikumufuma. Mukulumpi muneni wamashidika niyena, chanelukiyi nindi Pawulu hikaRoma hakutiya woma, nanochu chanamukasiyi.

Pawulu muchota chawaYudeya

30Chikunachi, hakukeŋa kwiluka chakashinshi nsaŋu janamumonuwu naju kudi aYudeya; hakumwidisha, hakuleja akulumpi jawatupristu nichota chejima nindi akapompi hamu; hakumutwala nakumwimika Pawulu kumesu awu.

Currently Selected:

Yililu 22: MWW04

Highlight

Copy

Compare