Yililu 18

KuKorinda

1Kulondela hayumiyi, Pawulu hakufuma kuAtenisi, hakushika kuKorinda.

2Kwenoku hakuwanaku kaYudeya wumu, ijina dindi #Rom 16:3; 1 Kor 16:19Akwila, wavwalikili muPontu, yena mwomukufuma kuItaliya naŋodindi Prisila; muloŋa Kaludusa naleji dehi aYudeya ejima, nindi afumi muRoma. Dichi yena Pawulu hakuya kudi wena;

3hakushakama nawu muloŋa mudimu wawu wowumu nayena. #1 Kor 4:12; 1 Tes 2:9; 2 Tes 3:8Hiyakukalakela hamu, muloŋa mudimu wawu wowu wakuchima matenti.

4Hakudihujola nikutadikaŋa nawantu mushikola Sabata jejima; hakushinjilaŋa aYudeya nawaGriki.

5Cheliluwu aSilasi naTimotewu anafumi dehi kuMasidoniya, Pawulu hakutiya iyena muspiritu. Hakushimwina aYudeya nindi Yesu diyi Kristu.

6Chanadikaŋuwu nakuhosha chatama, hakutotomona mahinindi, hakuyila nindi, #Ezek 33:4, 6, 8; Mat 27:25Mashi enu ayikumini enu aweni, ami kwami hinikweti muloŋaku. Kufumisha kulelu nukuya kwami kudi aJentili.

7Hakufumaku, hakwiŋila mwitala damuntu wumu, ijina dindi Titusa Yusitu, mukwakuhameka Nzambi, wukweti itala dindi dadikuma nashikola.

8Nyuuli yashikoloyu #1 Kor 1:14Kirisipu hakumukuhwelela Mwanta nawakwetala dindi ejima. AKorinda amavulu niwena chanatiyuwu, akuhwelela nikukuhwelela, hiyakuyijimika.

9Mwanta hakumwila Pawulu muchimwenu nawufuku nindi, #27:24Bayi wutiyaŋa womaku, hoshaŋa kweyi, bayi wumwenaŋaku;

10muloŋa ami nidi naneyi, hikukwikala muntu wakukuzuŋisha hela kukukatishaku; nikweti antu amavulu muŋanda yinu.

11Hakushakama kwenoku mwaka wumu natukweji tutanu nakamu, nakutaŋisha izu daNzambi mukachi kawu ho-o.

12Hadiŋiyi Galiyo mwanta wamukala wamuAkaya, aYudeya hiyakumunyamukila Pawulu namuchima wawu wumu, hiyakumutwala kwitanda dakusompela.

13Nawu, Iwu iyala wudi nakushinjila antu kudifukula kudi Nzambi mwacheŋi, mwabula kuya nshimbi.

14Heliliyi Pawulu nindi akwati kuhosha, Galiyo hakuyila aYudeya nindi, Enu aYudeya, iyi nsaŋu neyi yadiŋi yakwila chatama, hela yakubajama, nadi kwiteja tuhu kunkabisha kudenu;

15kwinzichi chiyineli nsaŋu yamazu namajina nanshimbi jenwenu aweni, yiketulenu enu aweni; ami naleki kusompesha nsaŋu iyi.

16Hakuyihaŋa kwitanda dakusompela.

17Wena ejima amukwata ninyuuli yashikola Soseteni, amwetela nikwenoku kwitanda dakusompela. Ilaŋa Galiyo kubaŋaku nehi.

Prisila, Akwila naApolosi

18Kufumisha henaha heliluwu yumiyi, Pawulu hakulabilaku mafuku amakwawu amavulu. Nkumininaku hakushalisha anakwindi, hakuya kuSiriya muwatu, wudi nawaPrisila naAkwila; #21:24; Kuch 6:18watewula dehi mutu windi muKenikiri, muloŋa wadiŋi nansaŋu yadikaniniyi.

19Chanashikuwu #Chim 1:11; 2:1kuEfwesesa, hakushiya akwawu kwenoku, ilaŋa yena yomweni hakwiŋila mushikola, hakudihujola nikutadika nawaYudeya.

20Chanamulombuwu nawu ashakamuku mafuku amakwawu, yena kwiteja nehi.

21Hakuyishalisha nindi, #Rom 1:10; 15:32; 1 Kor 4:19; 16:7; Heb 6:3; Yak 4:15Neyi Nzambi neteji, nakafunta kunu kudenu. Hakufuma kuEfwesesa muwatu.

22Chanashikiyi kuKesareya, chanafumiyi muwatu owu, hakukanduka kuYerusalema nakwimusha chipompelu; hakukunkumuka kuAntiyoki.

23Chanashakamuku mafuku, hakufumaku, hakuhita mwituŋa daŊalija nidaFwirijiya, nakukolesha atumbanji ejima hamukala hamukala.

24KuEfwesesa hikukwinza kaYudeya wumu, ijina dindi #19:1; 1 Kor 1:12; 3:5, 6, 22; 4:6; 16:12; Tit 3:13Apolosi, wavwalikili kuAlesanderiya; muntu wasweja maana nankashi, wasweja ŋovu jakwiluka mwalumbulukila nyikanda yajila.

25Yena amutaŋisha dehi mwaya njila yaMwanta; wekala neyena muspiritu yindi. Hakuhosha nakutaŋisha nsaŋu yaYesu chakashinshi, weluka #19:3; Luk 7:29kwachijimikilu chaYowanu hohu.

26Hakutachika kuhosha mushikola chakadi woma. Chanamutiyuwu aPrisila naAkwila, hiyakumutwala kwitala dawu, hiyakumulumbulwila mwaya njila yaNzambi, chakashinshi hanashali hanashali.

27Chakeŋeliyi kuya muAkaya, anakwindi hiyakumukwashaku nakumusonekela mukanda wakuleja atumbanji nawu mutambulenu. Chanashikiyi hakuyikwashaku nankashi antu anakuhweleli naluwi lwaNzambi.

28Muloŋa waswejeli kuyibayisha aYudeya naŋovu hatooka, nakuyileja munyikanda yajila nindi Yesu diyi Kristu.

Currently Selected:

Yililu 18: MWW04

Highlight

Copy

Compare