Lukas 2

Mba bo bwe Yésu là

(Mat. 1.18-25)

1A lo be num yen ngelaṅ nà, Kàsà Augusto fà ntshù' ndù bo siaṅ njoṅ benntùn fa ntùm njù. 2Yen mbwe nesiaṅ benntùn nà na' mb'a ngelaṅ Kirinia na' mbe ngomna mà Siria là.

3Njoṅ benntùn fa nèn ndù bo kite lén sube, mba we lo ntùm ko' ngô i. 4Mba Yosèf lo ze Galiléa ntùm ngô Nazarèt, nko' nèn Yudéa ntùm ngô David ze lén se be Bétléhém nà; nummbe a na' mb'a mèn ntùm tunndà David. 5A nèn ndù bo kite lén se bo se Maria nzwi i z'a be jùm nà. 6Ngelaṅ bo be Bétléhém nà, lé'njù nebwe ku' Maria. 7A bwe tuswe i ze mandum, ndam i kam nzwe njab i ntùm let jujù ba nyàm, nummbe dù' lo ke be bo ntùm ndà ba ghùn.

8Tsemo' ghakwé mbwe lo be yen dù' là, nke ntswe tshwèt, mbéb mbwe tshob tèttswe'. 9Tshù, mo' Angél Tshùaben ṅwag ntsin mbaṅ bo, nkuni Tshùaben ziag num miag mube, bo bwôg kua' neshu. 10Angél tshob bo ndù: Kà bin bwôg, nummbe me se' soṅ zin à nkùn mebwô ze tsiaṅte ndùb z'a nsi be ze njoṅ benntùn fa là. 11Tshô là b'a ndù: Bo bwe ngayôg benntùn sènni ntùm ngô David mfà bin; a b'a Kristô, mbe Tshùaben. 12Lèn ze bin nsi lo' lèn i yi là b'a ndù: Bin nsi yen ménfi ndù bo lam i kam nzwe, njab ntùm let jujù ba nyàm. 13Be ngelaṅ mbile, mo' bwoṅ Angél fe kamànyam ntamte num yen Angél là, nyàmte Nsi, ntshob ndù:

14Ghamte be Nsi tà mfe kamànyam,

fite bèn mbe num nsitsha' netèt ben

tse bo bwô Nsi là.

15Ngelaṅ ba Angél faṅ yub mbèn njam kamànyam nà, ghabéb mbwe tshob bo bo ndù: Bin ghù be nèn tà nkum Bétléhém, neyen ju z'a tume, Tshùaben soṅ be là. 16Bo nànte nèn bwe; njen Maria, Yosèf mba ménfi ndù a nô ntùm let jujù ba nyàm. 17Bo be yen i, nsoṅ nu ze bo tshob bo mfà num yen mén nà là. 18Njoṅ benntùn fa bo ju' tshô ghabéb mbwe là, tshàm neshu num nu ze bo ke ntshob bo là. 19Maria lé' njoṅ tshen nu là fa ntùm ntù i nke nkwimte. 20Ghabéb mbwe be bèn njam, nke ngamte Nsi, nyàmt'é num njoṅ nu fa bo ju' mbèn njen be ndaṅndaṅ mba bo lo nsoṅ yub là. 21A #Lev. 12.3; Luk. 1.31lo be kum lé'njù fome, z'a bwô ndù bo si ket mén nà, bo tswi lén se ndù Yésu, lén se Angél na' mfà kà màab ndél i là.

Mba bo la'te Yésu Tshùaben nà

22Lé'njù #Lev. 12.6-8nelànte wut tshob mb'a be ntùm ntshù' Mosé là lo be bumte, bo lo' mén nèn yi Yérusalém num nela't'é Tshùaben, 23mba #Netu. 12.2,12bo kite ntùm ntshù' Tshùaben nà ndù: Bo nsi ke mfà mbwe bon bandum fa Tshùaben. 24A bwô ndù bo bèn mfà bon mbwoṅsaṅ ke fôgtab ngab bàa lo mba ju nele'te Nsi là, mba bo tshob ntùm ntshù' Tshùaben nà.

Yobkwi Siméon

25Tshù, mo' mèn lo be Yérusalém, lén se Siméon z'a na' mbe mèn netsine, nke mbwôg Nsi, nke mbéb ngafite ntù ba Israél, Ywèt Nelàn be num i là. 26Ywèt Nelàn lo bwôgmbwe nsoṅ i ndù a ke nsi yoṅ kwù, ke be ndù a yen ngayo' mfèt Tshùaben. 27Ywèt lo tènt'é ndù a nèn nkum Ndà Nsi ngelaṅ tà Yésu mba màab lo' i nse' yi neghù ndù ju ze ntshù' ke ntshob là bumte num i là; 28Siméon kwé i mum mbu mi, ngamte Nsi ntshob ndù: 29Ndonni mba ntshob mu bumte là me Tshùaben, faṅ nkuan o ndù a nèn ntùm fite mb'o na' ntshob là. 30Nummbe miag màm yen ngayôg benntùn z'a fe wù là, 31z'o nabte mbwe njoṅ ngô fa là. 32A #Es. 42.6; 49.6; 52.10b'a nka' z'a nsi lànte miag ghakelèn Nsi, mbe nkuni ben tsho ba Israél là.

33Tà Yésu mba màab tshàm neshu num nu tse bo ke ntshob num i là. 34Siméon naṅ mbotni num bo, ntshob Maria ndù: Tshù, bo yab yen mén ni a ndù benntùn yàm netèt ba Israél tshùa num i ngwù nsi, tsemo' bèn ndo tù. A bèn mb'a lèn ze bo nsi tshabte là. 35Bi nsi sob ntù o, ndùlala ndù nkwate nu benntùn tum dù' tàyage.

Ngatshob ntshob Nsi Ana

36Mba mo' ngatshob ntshob Nsi ze mènnzwi lo be bwe lén se Ana, ngon Fanuèl ntùm tunndà Aser. A lo ywèn neshu, ngu'njù tse bèn njàme. A lo be tswe ntùm ze nandà ngon ngu'njù sammbàa, 37ntù' mfôg mènnzwi, nèn nkum num ngu' ntshob kuà ṅam fome, ke be tum Ndà Nsi, nke mfa' Nsi tèttswe' mba mbwôgtshù, ntswe nziku'u, nke nde'te Nsi. 38Mba yi lo se' num yen ngelaṅ nà, ngamte Nsi, ntshob nu njoṅ benntùn fa tse bo ke mbéb netshu' Yérusalém nà, mfà num i.

39Bo #Mat. 2.23lo be miagte neghù njoṅ tshu fa mb'a be ntùm ntshù' Tshùaben nà, mbèn njam Galiléa, mà Nazarèt ngô yube; 40mén nà nke nku'u, nta, ndun zenu, kondèn Nsi be num i.

Yésu ngu' ntshob bàa gham ntùm Ndà Nsi

41Tàab #Netu. 12.1-27; Neb. 16.1-8mba màab lo ke nèn Yérusalém njoṅ ngu'ngu' fa mum lé' jùa Pasa. 42Ngelaṅ Yésu kum ngu' ntshob bàa gham nà, bo ko' nèn mfe Yérusalém mb'a be matnu mum lé'njù jùa là. 43Lé'njù jùa lo be mi, bo bèn njam, metsit Yésu tù' Yérusalém bo ke lèn. 44Bo nke nkwate ndù a b'a netèt ben tse bo à bo se' là, nzin ta' lé'njù nke ndiag i netèt nzwit yub boa ben tse bo à bo lènte là. 45Mba bo be ke yen i là, bo bèn njam Yérusalém ndiag i. 46A be tshùa lé'njù tat, bo yen i ntùm Ndà Nsi ndù a tswe nsi netèt ghatswite, nke nju' yube, mbèn nke mbètte yub ba nu. 47Njoṅ benntùn fa tse bo ke nju' nu ts'a tshwèt ntshob là, tshàm zenu i boa mi mbùnte nu neshu. 48Tàab mba màab be yen i, nu tshùa yube, màab tshob yi ndù: Mén àm, o ghù ndùlala num bag numke? Tàan mba me, bag yen nge' neshu nediag o. 49A tshob bo ndù: Bin lo nke ndiag àm numke? Bin ke' lèn ndù a bwô me be be num nu Tàa ké? 50Là bo ke ju' ju z'a tshob bo là. 51A swe' bo à bo nkum Nazarèt, nke nju'ni yube, màab lé' njoṅ tshen nu là fa ntù i. 52Yésu #1 Sam. 2.26; Tànk. 3.4nke nku' ntùm zenu, ntùm ntsemèn, ntùm kondèn mbwe Nsi mba mbwe benntùn.

Currently Selected:

Lukas 2: BMa

Highlight

Compare

Copy