Lukas 3

Nu Yohané nganyu' benntùn ntse

(Mat. 3.1-12; Mark. 1.1-8; Yoha. 1.6-8,19-28)

1A lo be ngu'njù ntshob tàn gham, mba Kàsà Tibèrio jù fen nà, Pontio Pilato be ngomna Yudéa, Hèrodé be mfen Galiléa, Filibo mfèl i be mfen Ituria mba ngô Trakoniti, Lisania be mfen Abilèné, 2Ana mba Kaïfa be ghale'te Nsi tse ndùbndùb; num yen ngelaṅ nà, ntshob Nsi se' Yohané mén Sakaria, num kônkwa. 3Yohané nke nzin ntùm njoṅ ngô fa mbaṅ Yordan, ntshob nu nekwéntse ze nekaṅ ntù ndù Nsi lagte nukebwô benntùn. 4Mba #Es. 40.3-5bo kite ntùm ṅwa'ni ngatshob ntshob Nsi Esaya là ndù:

Nze mèn kua' num kônkwa ndù:

Bin nabte manze Tshùaben,

ndate bon manze tse ngù a tsine.

5Bo nsi zwiagte njoṅ tômbo' fa,

kôgte njoṅ mbat ndùbndùb boa tse nke'nke' fa,

tsiagte nze ts'a ṅu'te là, ngù a tsin.

6Njoṅ benntùn fa nsi yen yôg s'a fe Nsi là.

7Yohané #Mat. 12.34; 23.33lo ke ntshob bwoṅ benntùn bo ke nse' ndù a nyu' yub ntse là ndù: Nzwit ngamnyu, we bèn ntswite zin nekù yantù z'a nsi se' l'à? 8Bin #Yoha. 8.33yam kua' ntàm nekaṅ ntù mi a ku'ni là; kà bin ke ntshob ntùm ntù tsin ndù: Abraham b'a tà yag; nummbe me tshob bin ndù Nsi ku' nekaṅ men ndoṅ ni, ngù bon Abraham yi. 9Ne #Mat. 7.19mbe be, bo à yab njàm num ngatù. Bo nsi ke' njoṅ ntù fa mi a ke' be yam ntàm mebwô là, ma' ntùm mbwôge. 10Bwoṅ benntùn bètt'é ndù: Ke z'a bwô ndù bag ghù à? 11A bùnte ntshob bo ndù: Mènntùn z'a ghù nzwe bàa là, ghabte bo mèn z'a ke' ghù là; mènntùn z'a ghù jujù là bèn ngù be ndaṅndaṅ. 12Mba #Luk. 7.29ghakwéfé' se' yub ndù a nyu' yub ntse, ntshob yi ndù: Ngatswite, ke z'a bwô ndù bag ghù à? 13A tshob bo ndù: Kà bin kwé ju ntôg njoṅ i; 14mba ba soyé bètt'é yub ndù: Ke z'a bwô ndù bag ghù yag à? A tshob bo ndù: Kà bin ghùtni mènntùn nkwé ju i ntùm kubte, bin tsiaṅte num nkàbfa' zin.

15Mba njoṅ benntùn fa ke mbéb Kristô là, njoṅ yub fa kwate ntùm ntù tshob ndù mo' ndù Yohané b'a Kristô. 16Yohané bùnte ntshob njoṅ yub fa ndù: Yàm tu, me ke nyu' zin à ntse, là mo' mèn tshwèt nse' ndù a ta ntshùa àm; me ke' ku'ni neké'te nkù nketo' mi; tu wul i nsi nyu' zin à ntùm Ywèt Nelàne, mba mbwôge. 17A ghù ke'te i bu i num neke'te njoṅ nsa fa mi bo tsham nà yi. A nsi tse'te nsa ntùn, njab ntùm nta, là nton nga' mi ntùm mbwôg z'a ke' be bi là. 18A be fà men ntag yàm nà mba memo' mi a fute là, nsoṅ benntùn nkùn mebwô.

19Là #Mat. 14.3-4; Mark. 6.17-18mfen Hèrodé bèn nkwi'te nukebwô num tsemo'o, ngù bo ma' Yohané ndàtsha. 20Nummbe a lo kam i num tu Hèrodia nzwi mfèl i boa njoṅ nukebwô fa ts'a ke ngù là.

Mba Yohané nyu' Yésu ntse là

(Mat. 3.13-17; Mark. 1.9-11; Yoha. 1.32-34)

21Ngelaṅ Yohané nyu' njoṅ benntùn fa mba Yésu ntse, Yésu nke nde'te Nsi là, kamànyam gha'. 22Ywèt #Net. 22.2; Yobk. 2.7; Es. 42.1; Mat. 3.17; Mark. 1.11; Luk. 9.35Nelàn swe', nse' num i ndù a tswe mba wut là, mba bwoṅsaṅ nà. Mo' nze fe kamànyam ntshob ndù: O b'a Mén àm ze me num nkô o, mbèn njab ntù àm fa num o là.

Tunndà Yésu

(Mat. 1.1-17)

23Yésu lo be to' fa' se ndù a kum nguan ngu' ṅam ntat. Mba bo ke nkwate ndù a b'a mén Yosèf, mén Hèli, 24mén Matat, mén Lévi, mén Mèlki, mén Yanaï, mén Yosèf, 25mén Matatia, mén Amos, mén Nahum, mén Esli, mén Nagai, 26mén Maat, mén Matatia, mén Séméi, mén Yosèf, mén Yoda, 27mén Yohanan, mén Rèsa, mén Zorobabél, mén Salatiél, mèn Nèri, 28mén Mèlki, mén Adi, mén Kôsam, mén Elmadam, mén Hèr, 29mén Yésu, mén Eliézer, mén Yôrim, mén Matat, mén Lévi, 30mén Siméon, mén Yuda, mén Yosèf, mén Yônam, mén Eliakim, 31mén Mèdéa, mén Mèna, mén Matata, mén Natan, mén David, 32mén Isaï, mén Obèd, mén Boaze, mén Salomon, mén Nahason, 33mén Aminadab, mén Admin, mén Arni, mén Hesron, mén Pèrès, mén Yuda, 34mén Yakob, mén Isak, mén Abraham, mén Tara, mén Nackor, 35mén Sèruk, mén Rôgau, mén Falék, mén Héber, mén Sala, 36mén Kainam, mén Arfaksad, mén Sém, mén Noa, mén Lamék, 37mén Metusala, mén Hènok, mén Yaréd, mén Malélééd, mén Kainam, 38mén Enôs, mén Sèt, mén Adam, mén Nsi.

Currently Selected:

Lukas 3: BMa

Highlight

Compare

Copy