Lukas 1
1
Netsho ntùm tshô
1Benntùn yàm lo to' nekite tshô nu ts'a na' mbumte netèt bag là, 2ndaṅndaṅ mba ben tse bo na' njen yen nu là fe mbwe, mbèn ntù' mba ghatshob ntshob Nsi na' nsoṅ yag là, 3mba me yàm, me lo lôte njoṅ nu fa kua' mebwô ndaṅndaṅ mb'a na' nto'te là, k'a mbwô ndù me kit'é wù, me Téofilo ze tanjoṅ, 4ndù o bèn ndèn ndù ju z'o na' nzi'te là, ta neshu.
Mba Angél tshob ndù bo nsi bwe Yohané là
5A #1 Kron. 24.10lo be ngelaṅ Hèrodé mfen Yudéa, mo' ngale'te Nsi be bwe, lén se Sakaria, num ntshufa' Abia: Nzwi i tum ntùm nzwit ngonngon Aron, lén se Elisabèt. 6Ntu tshob bàa fa na' mb'a ben netsin mbwe Nsi, mbèn nke nze ntshù' mba ntag Tshùaben ke fànte. 7Bo lo ke ghù mén, nummbe Elisabèt na' mb'a kebwe, ntu tshob bàa fa bèn njwène.
8A lo be num mo' lé'njù, Sakaria nke mfa' fa' nele'te Nsi, nummbe a lo kum num ze ntshufa', 9mb'a na' mbe matnu ntùm fa' le'te Nsi là, tô jù i netsho Ndà Nsi nton labinda. 10Njoṅ bwoṅ benntùn fa tswe njù nke nde'te Nsi, ngelaṅ labinda ke nkù là. 11Mo' Angél Tshùaben ṅwag yi, ntsin num bag tômbwôg ze zwim. 12Sakaria be yen i mvèle, bwôg tshùb i. 13Là Angél tshob yi ndù: Kà bwôg me Sakaria, nummbe Nsi ju' le't'o, nzwi o Elisabèt nsi bwe mén mandum wù, o tswi lén se ndù Yohané. 14O nsi tsiaṅte, bèn ṅwate, mba benntùn yàm nsi tsiaṅte num ze nebwe. 15Nummbe #Nes. 6.3a nsi se' b'a mèn ndùb mbwe Tshùaben, ke nu ndu' bo nka, Ywèt Nelàn nsi dun num i fe bam màab.
16A nsi bèn ghù tsemo' bon Israél yàm bèn njam ntèt Tshùaben Nsi yub. 17Tu wul i nsi bwôgmbwe zin mbwe Tshùaben, ntùm Ywèt mba neta Elia, ndù a ghù ntù ba tà bèn njam ntùm zenu ben netsine, ndù a nabte nzwit mènntùn z'a ku'ni là njab Tshùaben.
18Sakaria tshob Angél ndù: Me nsi lèn yen nu li à ndùke, nummbe me ywèn nzwi àm bèn njwèn à? 19Angél #Dan. 8.16; 9.21bùnte, ntshob yi ndù: Me b'a Gabrièl ze me num ntsin mbwe Nsi là, a bèn ntum àm ndù me se' ntshob wù, mbèn nsoṅ o yen nkùn mebwô li. 20Tshù, o nsi vù ketshob; o ke bèn nku' netshobe, tà nkum lé'njù ze tshen nu là nsi se' là, nummbe o ke' bam ntshob màm mi a nsi bumte num ngelaṅ i là.
21Bwoṅ benntùn lo ke mbéb Sakaria, nke ntshàm mb'a tswe ntùm Ndà Nsi neshu là. 22A be tum ke bèn ndèn netshob nu benntùn; bo lèn ndù a yen mo' ju ntùm Ndà Nsi; tu wul i ma'te mbu bo, ntswe ketshob. 23Tse lé'njù fa' nele'te Nsi lo be mi, a nèn la' i, 24tshen lé'njù li be tôge, nzwi i Elisabèt be jùm, ndem wul i ṅwù tàn, nke ntshob ndù: 25Tshù ju ze Tshùaben ghù num àm nà, ntùm tshen lé'njù li a lôt'àm nsô tuswe z'a na' mbe tu àm netèt benntùn nà.
Mba Angél tshob ndù bo nsi bwe Yésu là
(Mat. 1.18-23)
26A lo be kum maṅwù ntôge, Nsi tum Angél Gabrièl ntùm mo' ngô Galiléa, lén se Nazarèt, 27mbaṅ #Mat. 1.18mo' ménngon ze mo' mèn ntùm tunndà David, lén se Yosèf na' nka i là. Lén ménngon nà be Maria. 28Angél be kum mbaṅ i ntshob ndù: Me tsha't'o, wù ze Nsi fà kondèn i wù là; bin Tshùaben bèn mbe. 29A vèt num men ntshob là, mbètte ntùm ntù i ndù: Ke lèn ntsha'te li à? 30Angél tshob yi ndù: Kà bwôg me Maria, o b'a mènfen ntùm kondèn Nsi. 31Tshù, #Mat. 1.21o nsi be jùm, bwe mén mandum z'o nsi tswi lén se ndù Yésu là. 32A #2 Sam. 7.12,13,16; Es. 9.7nsi be mèn ndùb, bo nsi ke ntsiaṅ i ndù Mén Nsi mfe tù. Tshùaben Nsi nsi fà diaṅ tàab David yi. 33A nsi tô nzwit Yakob yoṅ ntshù', nufen se ke nsi mi. 34Là Maria tshob Angél ndù: Yen nu li nsi bumt'a ndùke, mba me ke' yoṅ ndèn mandum n'à? 35Angél bùnte, ntshob yi ndù: Ywèt Nelàn nsi se' num o, neta mfe tù kabt'o netshaṅ i. A nsi tshùa ndùlala, kà bo tsiaṅ mén nelàn nà z'o nsi bwe là ndù Mén Nsi. 36Tshù Elisabèt mèn ntùm tunndà o z'a b'a mba njwèn mènnzwi là, jùm mén mandum; a ndonni ṅwù ntôge, yi ze bo ke ntsiaṅ i kebwe là. 37Nummbe #Net. 18.14sàm nu mba ntshù' ke' be tshùa Nsi. 38Maria tshob ndù: Me b'a nkuan Tshùaben, a ghù num àm mb'o tshob là, Angél lo mbaṅ i nène.
39Be num tshen lé'njù li, Maria lo ndende, nèn ntùm ngô mbale, ntùm mo' ngô Yudéa; 40ntsho ndà Sakaria, ntsha'te Elisabèt. 41Tshù, ngelaṅ Elisabèt ju' tsha'te Maria là, mén nyi'te ntùm bam se, Ywèt Nelàn dun mba num Elisabèt. 42A kua' mfà nz'é tù ntshob ndù: O b'a ngambotni netèt bènnzwi, ntàm bam so b'a ntàm mbotni. 43Yen nu li fe m'a yà, kà mà Tshùaben àm nse' nelôt'àm à? 44Nummbe fe ngelaṅ nze ntshob tsha't'o lo njoṅ ntam ntùm ntoṅ màm nà, mén nyi'te, ntsiaṅte ntùm bam sàm. 45Ngafen b'a mènnzwi z'a bam ndù tshu tse Tshùaben tshob yi nsi bumte là. 46Maria #1 Sam. 2.1-10tshob ndù:
Ntù àm tshwèt ngamte Tshùaben,
47Ywèt tshàm tsiaṅte
num Nsi ngayôg àm.
48Nummbe #1 Sam. 1.11a te miag mi num
mbwoṅ nkuan i ze mènnzwi.
Tshù, lo sènni njoṅ nzwit benntùn fa
nsi ke tsiaṅ àm ndù mènfen.
49Nummbe a ghù tshu ndùbndùb num àm,
yi Nsi nganeta,
lén se b'a nelàne,
50kondèn i bèn nke ntswe ngu'ngu'
num ben tse bo num mbwôg i là.
51A la'te neta bu i,
nsate benntùn tse bo ke nkote wut
ntùm nkwatenu ntù tshob là,
52ntèn #Yob 5.11; 12.19fenfen num ndiaṅ mub ma'te nsi,
mbù' ghafà wut nsi tù,
53mfà tshu mebwô ghanziku'u,
nta' ghankàb bo nèn mbu mbu,
54nse' neywimte Israél ngafa' i
ntshùa njam kondèn i,
55ndaṅndaṅ #Net. 17.7mb'a na' ntshob ba tà be
Abraham mba nzwil i yoṅ ntshù' là.
56Maria tswe bo Elisabèt nguan ṅwù tat, mbèn mbèn njam ndà i.
Mba bo bwe Yohané là
57Ngelaṅ nebwe ku' Elisabèt, a bwe mén mandum. 58Ba ndùla' i boa ba tunndà i be ju' ndù Tshùaben ghù kondèn ze ndùb num i, ntsiaṅte bo à bo. 59A #Lev. 12.3be kum lé'njù fome, bo se' nesi ket mén nà, nke ntsiaṅ i Sakaria num lén tàab. 60Là màab bùnte, ntshob ndù: Nga, bo nsi ke ntsiaṅ i à ndù Yohané. 61Bo tshob yi ndù: Sàm mèn ke ntùm tunndà o ndù a ghù sen lén nà. 62Bo ma'te bu Sakaria, mbètt'é mb'a kô ndù bo tsiaṅ mén nà, 63Sakaria bètte tafèt nkite bwe ndù: Yohané b'a lén se. Njoṅ yub fa tshàm. 64Be ngelaṅ mbile, ntshu i gha', lém se ké'te, a bèn nto' netshobe, nke ngamte Nsi. 65Bwôg tshùb njoṅ ba ndùla' i fa, benntùn soṅ tshen nu là ntùm njoṅ ngô mbat Yudéa fa. 66Njoṅ benntùn fa tse bo ke nju' tshen nu li là, yab ntùm ntù tshobe, nke ntshob ndù: Yen mèn ni nsi b'a ndùke? Nummbe bu Tshùaben lo be bo yi.
Yobkwi Sakaria
67Tàab Sakaria dun Ywèt Nelàne, ntshob mba ngatshob ntshob Nsi là, ntshob ndù:
68Ghamte be Tshùaben Nsi ba Israél,
mb'a se' ndôte mbèn ntshu' ben tse,
69ngù ngayôg be ze neta tum ntùm tunndà David
ngafa' i,
70mb'a na' ntshob num ntshu
ghatshob ntshob Nsi tse tse nelàn fe mbwe là.
71A kwé be mbu ghakeban be,
mba mbu ben tse bo num mbàn be là.
72A ghù kondèn i num ba tà be,
mbèn nkwimte kàn se se nelàne,
73ntshùa njam nka'ni mi a na' mbam
Abraham tà be ndù:
74A nsi kwé be mbu ghakeban be
ndù be ke mfa' yi kebwôg,
75ntùm nelàne mba netsine, mbwe i,
ntùm njoṅ yôg be fa là.
76Wù #Mal. 3.1ménfi, bo nsi ke tsiaṅ o
ndù ngatshob ntshob Nsi mfe tù,
nummbe o nsi ke nzin mbwe Tshùaben,
num nenabte manze tse;
77ndù a ghù ben tse lèn yôg
ntshùa njam nelagte nukebwô.
78Yen nà b'a kua' kondèn Nsi,
a se' nelôte be mba lagnyam nkebnjù
z'a tum mfe tù là;
79ndù #Es. 9.1a ké' num ben tse bo tswe ntùm njam
mba netshaṅ vù là,
mbèn ntshagte nku be ntùm manze fite.
80Mén nà nke nku'u, nke nta ntùm Ywèle, nke ntswe mà kônga tà nkum lé'njù s'a bwô ndù a la'te wul i ba Israél là.
Currently Selected:
Lukas 1: BMa
Highlight
Share
Compare
Copy
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
