Rm 10
10
Nti Beyude a bikuu
(Rm 9:1-5; Ga 3:21-29)
1A bobejañ, nkômbane ya nleme wom a meye'elan, mfa'a Zambe bi ne na be nyiñ. 2Amu me ne ngaa na, ba dañe nye'e Zambe, ve nye'an wop ô nji bo éfufube ya ñyeman été. 3Amu na, éyoñe be nga dimi *zôsôô a so be Zambe, a jeñ éñwobe bebien, be nji suu bebiene si, e be *zôsôô a so be Zambe. 4Amu asu'ulane metiñ e ne Krist, nde *zôsôô a ye veban e be nyô ase a buni. 5Môze émien, a tili ajô *zôsôô a so metiñe na: E môt a ye tôñe nye a ye nyiñ a nye. 6Ve *zôsôô a so amu mbunan, a kobô na: Te jô nleme wôé été na za a ye bete yôp? Nalé a ye bo aval ane nge wo zuu Krist si. 7Nge jô na za a ye sis édo'o si? Da ye bo aval ane nge wo vaa Krist ézezañe miñwuan. 8Ve a jô aya? A jô na: Ajô te e ne wo bebé anyu dôé été a e nleme wôé été. Ajô te e ne ajô mbunan, nde te bia kañete. 9Nge wo mem anyu dôé na, Krist a ne Nti; a nge wo buni e nleme wôé été na, Zambe a nga wômôlô nye miñwuan, wo ye nyiñ. 10E ne na; mbunan ya buni e *nlem été, wo kee môt e *zôsôô été; a mmemane ya mem a anyu, wo kee môt ényiñ été. 11Amu ntilane wo jô na: Môt ase a buni, nye a ye bo te veban ôson nyô. 12Ajô te, nkandan ô nji bo zañe mone Beyude, a mone Grék. Bese be bili Nti wua, nyô a ne abui ésôs, e be ba bese ba loone nye. 13E ne na: Nyô ase a loone jôé Nti a ye nyiñ.
Bese be nji bo mewôk
(Mk 16:15-16; MM 13:45-49; Eza 49:5-6)
14Nde be nga ye loone nye aya, nge be nji buni nye? A be nga ye buni nye aya, nge be nji wô'ô ajô dé? A be nga ye wô'ô de aya, teke nkatefoé' 15A nkatefoé a nga ye kat aya, teke lômban. Amu Ntilan wo jô na: Ngo'o aka'a abeñe mebo ya ba ba kañete mbamba mefoé me né. 16Ve bese be nji buni Mbamba Foé. Amu Ezayi a jô na, a Nti, za a nga buni foé jangan' 17Ajô te mbunane wo so nkatane foé, a nkatane foé ô ne nkañetane ya ajô Krist. 18Ma sili na: Ye be nji wôk? Yaa, be nga wôk! Tyiñe jap é nga wô'é si ése, a mejô map me nga kui meku'u ya *si nyô. 19Nde ma sili na, ye Israél a nji wôk? Môze a tatéya jô na: Ma ye ve mia minlem mi ne *aban, e be bôte bese be nji bo ayoñ. Ma ye sômôlô mia mi yaa nsusu'u ayoñ. 20A Ezayi a bo ayo'o ya jô na: Me nga yené e be ba be nji jeñe ma. Me nga liti mamien e be ba be nji sili ma jôm. 21Ve mfa'a Israél a jô na: Ngume nté *môs, me nga sam ayoñ e ne melo a ékange kange mo.
Currently Selected:
Rm 10: BDCB
Highlight
Copy
Compare
Share
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.
