Rm 1
1
Mebatan
(Tt 1:1-4)
1Ma, Paul, mbo ésaé Yésus Krist, nloone ya bo *nlôman a ntelan étyi mfa'a ya kate Mbamba Foé Zambe. 2Mbamba Foé ate, Zambe a nga mane ka'a nye, anyu bekulu mejô bé, e mimfufube mintilan été, 3ajô Mone wé, nye ate, mfa'a minsôn, a nga bialé e mvoñe bôte David. 4Wôna mfa'a Nsisim, a nga litibane na, a ne mona Zambe, a ngule ya ñwômane wé aso miñwuan, e ne na, Yésus Krist, Nti wongan. 5Amu nye, bi nga nyoñe *mvam ya bo *nlôman, mfa'a ya kee meyoñe mese me ne te yeme Zambe e mewô'ô me mbunan été, amu duma dé. 6Mia fe mia lañeban été, amu nloone Yésus Krist a nga loone mia. 7Mvam a *mvo'é bi so'o e be Zambe Esaa wongan, a be Nti Yésus Krist, bi tabe'e be ba bese Zambe *a nye'e be nee Rôm a e be mimfufup amu nloone Zambe.
Paul A nye'e *bebuni ya Rôm
(Rm 15:23-32; 1Tés 1:2-3; 3:7-13)
8Ma taté ve Zambe wom akéva amu Yésus Krist, ajô mia bese. Nalé, amu foé ja katebane vôm ase *si nyô na, mia buni. 9Amu Zambe ma bo ésaé ya kate Mbamba Foé Mone wé, a ne me ngaa. Ma simesane mia biyoñ bise e meye'elane mam été, 10me sili'i nye te tek, aval ane nkômbane wé na, me bi éyoñe ya zu e be mia. 11E ne bebela na, me bili beta nkômbane ya yene mia, ane me ne kalane mia mvean éziñe ya Nsisim, mfa'a ya yeme ngul e mbunan été; 12nge na, ane mi ne volebane minlem, bia be mia, e vôme mi to a zene ya mbunan ô nga vebane be bia bese fufulu, éñwom a éñwônan mibaane. 13A bobejañ, ma yi mi yeme na, me jaéya vañe biyoñ abui na, me zu e be mia. Ve a zu kui e môse wu, teke ngule ya bo nalé. Me yi na, me bi bibuma ya Nsisim e zañe jenan, aval ane me tameya bi e be meyoñe bikuu. 14Amu me bili mvôla e be Begrék a e be bilobelobô, e be bedimi mam, a e be beyeme mam. 15Nalé ate nye ñhe a ne nkômbane wome na, me kate fe mia Mbamba Foé, mia mi too Rôm.
16Amu me nji wô'ô Mbamba Foé ôson, amu a ne ngule Zambe, mfa'a nyiane ya môt ase a buni, ôsusua Beyude, wôna Begrék. 17E be nye, *zôsôô éziñ ya Zambe a yené été, ataté e mbunan a su'ulane mbunan; ane e ne ntilane na: Nyô a ne *zôsôô amu mbunan, a ye nyiñ.
E bebela a bi bôte minkôm
(Sam 81:12-13; Eza 44:9-20; Ef 4:17-19; 1 Pi 4:3-5)
18E ne na: Zambe a liti ayaa dé e so'o yôp, e mfa'a ya *abé ese, a ékotekot ése ya bôt, mbe bete ba kame bebela na a yené. 19Amu e jame be ne yeme mfa'a Zambe, e ne be ne ngeññ, amu a nji ke be de solé. 20Amu aso ntéane ya *si nyô, miñyeman mi Zambe mia dañ, mis me ne te yen, e ngule jé ya nnôm éto a éto jé ane Zambe, bia yené e biôme a nga té été. Ajô te be nji bi éfia ya kaleban je. 21Amu zene nyôna na, be yeme Zambe, ve te ve nye akéva da yiane nye. Ve be nga viane jañ e mbia be asimesane bap été, a minleme miap ya *te fek mi nga ku dibi été. 22E ndu'ane bebiene na be ne fek, be nga viane su'ulane bo mekut. 23Be nga folan étôto'o Zambe a ne te tyendé a bive'ela bi môt a tyendé, bi anon, bi betit ba wulu a mebo menyin, a bi betite ba woñ. 24Ajô te Zambe a nga suu be e mezene me mbia minkômbane ya minleme miap, e mame ya mvin, mme mete ba ve menyôle map bebien ôson. 25Be nga folane benya mejôô me Zambe a minsos, a viane kañe mintéane mi biôm, ve te kañe nté biôm émien, e nyô a nee ébotane nnôm éto, *amén. 26Ajô te Zambe a nga li'i be e mboone mbia minkômbane mi ôson été. Avale ya na, binga bap be nga tyendé mboone ya abialé, ntabane befam a binga, a bo mboon ô ne te yian abialé bôt. 27Befame fe avale da, be li'i mfula'an ya fulane binga, be nga jaé ayôñe minleme ya kômbô fulane beebe, nsela'ane a abialé bôt, a bo mame me ne ôson e zañe jap a su'ulane nyoñe ma'ane me nkobane zene wop. 28A, mbôle be nga bo te yene mvaé ya ba'ale ñyemane wo so be Zambe, Zambe a nga li'i be e ñyemane ya *te fek été, amu ajô te be nga bo mam be nji yiane bo. 29Be ne njalan a ékotekot mevale mese, e ne na: Mbia be mam, mboon éngôngôt, mbia minlem, miñyamete, ñwôane bôt, ntañete, medu'an, asum, mfuk, 30besiñe Zambe, beté ntañete, mebun, ngunguan, atyeñ e mboon *abé, ébiasé e be bebiaé bap, 31mekut, betyame bilat, teke minlem, tee nkoon éngôngol. 32Akôsa bo na ba yeme ntyi'ane Zambe wo liti na, e ba ba bo avale mame te, ba yiane wu, be nji bo me ve mboon étam, ve ba kale ba ba bo me.
Currently Selected:
Rm 1: BDCB
Highlight
Copy
Compare
Share
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.
