Lv. 1
1
Etyi'a ba di'i ngumba #1:1 Etyi'a ba di'i ngumba nge na *ôlôkôste.
(Met 8:20-21; Nlb 15:1-16, 28; Sam 51:18-21; Hé 10:1-14; Ef 5:2; Fil 2:8)
1Ane Nti a nga loone Môze a kobô nye, *tyiñ é so'o e *nda éndelé bendôba'an na: 2Kobô'ô bone b'Israél a jô be na:
Éyoñe môte wua ya be mia a kômbô ve Nti mvean éziñ, a ye ve wô ô so'o mbame benyak nge mbame mintômba a bikela été.
3Nge mveane wé ô ne étyi'a ja di'ibane ngumba ô so'o mbame benyak, a ye ve nnôm a ne *mvo'é ne selem; a ye ve nye anyiine *nda éndelé bendôba'an, nalé étyi'a te ja ye nyoñebane be Nti. 4Môt ate a ye beté wo wé e nlô étyi'a Nti a maneya kañese asu *njaman abé dé. 5A ye tyi'i étoñe nya'a *tyiñ asu Nti; betuni, bone b'Aron, ba ye ve metyi a miame me mbôma'an a ata'a metuna'a e ne anyiine *nda éndelé bendôba'an. 6A ye soé étyi'a ja di'ibane ngumba ékôp a ba je mefuse mefus. 7Bone b'Aron Ntuni ba ye futi nduan ata'a metuna'a a wua nja'a e nduan été. 8Betuni, bone b'Aron, ba ye bôé mefus, nlô a avoñ e nja'a é ne mfutane nduan ya ata'a metuna'a yôp. 9Ba ye sôbe *miñya a mimbiaé mi tit, a wua ya betuni a ye di'i biôm bite bise ata'a metuna'a yôp: étyi'a ja di'ibane ngumba e nduan nje le é too fe mbamba menyum e be Nti. 10Nge mvean ô n'étyi'a ja di'ibane ngumba wo so e mone mbame biyem, mintômba nge bikela, a ye ve nnôm a ne *mvo'é ne selem, 11a ye tyi'i nye *tyiñ asu Nti ata'a metuna'a akôé, a betuni, bone b? Aron, ba ye miame metyi mé mbôma'an a ata'a metuna'a. 12Ntuni a ye ba nye mefus, nlô a avoñ bi too f'été; éyoñe te a bôé biôme bite e nja'a a nduan ya ata'a metuna'a yôp. 13Miñya a mimbiaé bia ye sôban a mendim. Eyoñe te *ntuni a ye ve biôme bite bise a di'i bie ata'a metuna'a yôp. Etyi'a ja di'ibane nduan ngumba nje le é too mbamba menyum e be Nti.
14Nge mveane wé a ve Nti ô ne étyi'a ja di'ibane ngumba ô so'o anon, a ye ve adu nge bezum. 15Ntuni a ye ve ônon ata'a metuna'a yôp. A ye bok a té wô *tyiñ a jaé, a di'i wô ata'a metuna'a yôb a miate metyi y'été mbôma'ane ata'a metuna'a. 16A ye vaa ngok a mesaé a wua ônon ôbien bebé ata'a metuna'a mfa'a jôb da tôô e vôm ba kut asup. 17A ye nyabe vie mfa'a ya mefab ve teke té me, éyoñe te *ntuni a ye di'i ônon ata'a metuna'a yôp, e nja'a é ne nduane yôp. Etyi'a ja di'ibane ngumba e nduan nje le é too mbamba menyum e be Nti.
Currently Selected:
Lv. 1: BDCB
Highlight
Share
Copy
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.
