Genesis 50
50
Jakob topaye lạgitʼko sapṛaoede
1Unre Joseph do acʼ babawakʼ mẽtʼãhãre giḍiyente rarakʼe dhurạuena are cokʼadea. 2Tayomte uni do acʼ taberen rarankoe hukumatʼkoa jemon apatakʼ hoṛmore mosolako ojokʼae. Ar onko do onkageko kạmikeda. 3Nonkate pongel din paromena. Ente noa kạmi do pongel din hạbicʼge lagaokʼkan tahẽkana. Ar Misorren hoṛ do Israel lạgitʼ eae gel din hạbicʼko homor halaṅkeda.
4Noa homor halaṅ din paromen khan Joseph do Pharaoren kạmiyạkoe metatʼkoa, “Ape nońjorre dayań ńamakatʼ khan enḍekhan Pharao ṭhen senkate noa katha baḍae ocoyepe, 5#Gen 47.29-31ạpuń gujukʼ oktere noae kiriạ ocoakadińa, Kanan disạmre acʼe ṭhik dohoakatʼ jaegare jemoniń topakae. Onate nehõraepe ona kạmi lạgitʼ jemone sen ocoạń. Ar lạiyaepe onań sạt lekhange arhõń ruạṛ hijukʼa.” 6Pharaoe roṛgotʼkada, “Uni okaṭakʼe kiriạ ocoakatʼme onkage senkate topayeme.”
7Unre Joseph do acʼren apat topaye lạgitʼe senena. Ar Pharaoren kạmiyạko hõ, metakʼme uniyakʼ bicạr duṛupʼakʼren ar Misorren sanam manotanko do Joseph sãoteko calaoena. 8Ona chaḍa Josephren ar acʼ babawakʼ gharońjren ar uniren boehako hõ uni sãoteko calaoena. Gosenre onko do eken akoren hopon ar hoponerako ar mĩhũ-meromko ar bhiḍikoko bạgi oṭowatʼkoa. 9Ạḍi utạr rãt gạḍiko ar aswarikoante onko do mitʼṭecʼ maraṅ phạdge Joseph sãoteko calaoena.
10Onko do jordan gaḍa aṛe reakʼ Atadkoakʼ khạrại hạbicʼko senena ar Joseph do apattetʼ lạgitʼ eae din hạbicʼe homor halaṅkeda. Ar uni sãote hoṛko hõko homor halaṅkeda. 11Atadkoakʼ khạrạire nonka rakʼ hokʼmorko ńelketʼ khan ona disạmren hoṛ do, metatʼme Kananren hoṛko menkeda, “Noa do Misorrenkoakʼ ãṭ homorkangea.” Onate jordan gaḍa eṭakʼ aṛe reakʼ noa jaega do Abel Misrayim ńutumko dohokeda (Metakʼme, “Misorrenkoakʼ rakʼ homor”).
12Israel do acʼren hoponko okaṭakʼe metatʼko tahẽkan onko do onageko kạmikeda. 13#Apos 7.16Onko do uniyakʼ mạ̃ṛĩ Kanan disạmteko idikeda ar Mamre ṭhenakʼ Makpela reakʼ dander ṭhen uniko topakadea. Topa ṭạnḍi benao iạte jumi sudhạ noa danderge Abraham do Hitti Ephron ṭhen khone kirińleda. 14Apattetʼe topakede khan Joseph, uniren boehako ar tinạkʼ do uni topaye lạgitʼko senlen onko sanamkoge Misorteko ruạṛ calaoena.
Joseph do boehako jiwi raṛecʼe emakokan
15Babae gocʼen khan Josephren boehako do ako akoreko mepenena, “Josephre oka bon cekaletʼ ar ona reakʼe hala ruạṛ abon khan unre cetʼ bon cekaea?”
16-17Onko do Joseph ṭhen katha roṛgotʼkateko menkeda, “Gujukʼ lahare babae menleda, amre okaṭakʼle behok akatʼ ona aleakʼ kại baṛe ikạitaleme. Onate aleakʼ nehõr do amren golamkoakʼ behokakʼ baṛe ikạitaleme.” Ar Joseph do onkoakʼ katha ańjomkateye rakʼkeda.
18Inạ tayom uniren dadattetʼtako do uni samaṅre hecʼkate unire giḍiyenteko menkeda, “Ale do amren golam kanale.”
19Menkhan Josephe menkeda, “Alope botorokʼa. Isorakʼ ṭhạ̃ire teṅgon lạgitʼ iń doń cele kana? 20Ape do ińre bạṛicʼpe hudisleda, menkhan Isor do ona talate bhạlại reakʼe monsubạ akada jemon ḍher hoṛakʼ jiwi rukhyiạkʼtako; ar teheń do onage hoyakana. 21Onate ape do alope botorokʼa. Iń do ape ar aperen hopon ar hoponerako lạgitʼ jomakʼ iń jogaoapea.” Noako as reakʼ kathate uni do jiwi raṛecʼe ematʼkoa.
Josephakʼ gujukʼ
22Joseph ar acʼ apatakʼ gharońjren hoṛ do Misorrege girobas akanko tahẽyena. Joseph do mitʼsae gel bochor hạbicʼ jiwetʼe tahẽkana. 23Uni do Ephrayemren hoponko pe piṛhi hạbicʼe ńel oṭokatʼkoa. Ona chaḍa Makirren hoponko hõ janam tayom Josephakʼ hoborreko doho ocolena. Makir do Manaseren hopone tahẽkana.
24Joseph do acʼren boehakoe metatʼkoa, “Ińakʼ gujukʼ okte do seṭer akana, ar noa do khạṭi kana je, Isor do apeye ạsulpea. Uni do Abraham, Isahak ar Jakob okaṭakʼ disạm emako lạgitʼe gokʼatʼko tahẽkan ona disạmge nonḍe khone idipea.” 25#Exo 13.19; Josu 24.32; Ibr 11.22Ona tayom Joseph do Israelkoe kiriạ ocoketʼkoteye metatʼkoa, “Isor do khạṭige apeye jotonpea. Nonḍe khonpe calakʼre ińakʼ jaṅko hõ iditoraetińpe.” 26Ar Joseph do mitʼsae gel bochor umer tahẽkanreye gocʼena. Ar uniyakʼ mạ̃ṛĩre jokʼgao mosolako ojokʼakʼte mitʼṭecʼ baksare dohokate Misorreko baekadea.
Currently Selected:
Genesis 50: SBT
Highlight
Copy
Compare
Share
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
