Exodus 11
11
Misor cetanre gelakʼ duk-Pạhil hoponkoakʼ gujukʼ
1Unre Probhu Isor do Moseye metadea, “Iń do Pharao ar Misor disạmre ar mitʼṭecʼ duk iń kola. Ar ona tayom Pharao do nonḍe khone sen ocoapea. Menkhan tinreye sen ocoape unre uni do nonḍe khone laga oḍokpea. 2Am do Israelkom metakoa, mimitʼ herel hoponko ar mimitʼ maejiuko sanamkoge jemon ako aḍepaseren hoṛko ṭhen khon sona ar rupạko koejoṅ.” 3Ar Probhu Isor do Israelko cetanre Misrikoakʼ monre dayae rakapʼ ocoketʼtakoa. Ona chaḍa Mose hõ Pharaoren kạmiyạko ar Misorren hoṛkoakʼ mẽtʼãhã samaṅre mitʼṭen maraṅ hoṛe hoyena.
4Mose do Pharaoe metadea, “Probhu Isore meneda, tala ńindạ okte iń do Misor disạm talateń parom calakʼa. 5Onate Misor disạm reakʼ sanam gharońjren pạhil hoponko gujukʼa. Siṅghạson ạidạriyicʼ Pharaoren pạhilicʼ hopon khon ehopʼkate janteye riritʼ kạ̃ṛmĩren pạhilicʼ hopon hạbicʼ okoehõ sarecʼ do bako tahena. Ona chaḍa mĩhũ meromkoren hõ pạhil janam akan hoponko gujukʼa. 6Goṭa Misor disạmre nonka homor halaṅ hoyokʼa one onka do tishõ baṅ hoyakan ar tishõ baṅ hoyokʼa. 7Menkhan Israelko modren jãhãe upạrte mitʼṭen setawakʼ bhokʼ hõ baṅ ańjomokʼa, baṅ do manwa ńelte ar baṅ do janwar upạrte. Jemonpe baḍae daṛeakʼ, Probhu Isor do Misriko ar Israelko talareye bekʼgarkana mente. 8Amren kạmiyạko hecʼkate iń samaṅre ikhṛumkateko mena, ‘amren sanam hoṛkoante oḍok calakʼme!’ Ar ona tayom doń oḍok calakʼa.” Noa katha menkate Mose do Pharao ṭhen khon raṅgaokateye oḍok hecʼena.
9Probhu Isor do Moseye metadea, “Misor disạmre ińakʼ hahaṛa kạmiko jemon ḍherokʼ onate Pharao do amakʼ katha bae ańjoma.” 10Noako hahaṛa kạmi Mose ar Aron do Pharao samaṅre kin kạmikeda, menkhan Probhu Isor do Pharaoakʼ mone keṭecʼketʼte disạm khon Israelko bae sen ocoatʼkoa.
Currently Selected:
Exodus 11: SBT
Highlight
Copy
Compare
Share
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
