Exodus 12
12
Bańcaokʼ porob
1 #
Lev 23.5; Num 9.1-5; 28.16; Bib 16.1,2 Probhu Isor do Misor disạmre Mose ar Arone metatʼkinạ, 2“Noa candoge hoyokʼa apeakʼ pạhil cando, apeakʼ bochor reakʼ pạhil cando. 3Aben do sanam Israelko jarwakate ben metakoa niạ cando reakʼ gel tạrik hilokʼ mimitʼ gharońjren mukhiyạko do akoakʼ gharońj lạgitʼ mitʼṭen bheḍa hoponko bachao joṅa. Ente mimitʼ oṛakʼ lạgitʼ mitʼṭenkate bheḍa hopon hataoe hoyokʼa. 4Ar jãhã gharońj lạgitʼ mitʼṭen bheḍa hopone huḍińge khan enḍekhan sor oṛakʼ hoṛren bheḍakoakʼ lekha lekate mitʼṭen bheḍa hoponko hataojoṅa. Banar gharońjren hoṛkoakʼ lekha lekate mimitʼ hoṛ tinạkʼko jom daṛeakʼ ona baḍaekate bheḍa hopon hataoko hoyokʼa. 5Uni hopon do merom boda se bhiḍi pal khon bachao akade mitʼ bochorren mitʼṭen bheḍa hoponge. Uniyakʼ hoṛmore jãhãn khũt alo baṛe tahentae ma. 6Ar niạ cando reakʼ pongel tạrik hạbicʼ uni do dohoye hoyokʼa. Ona tayom enhilokʼ cando hạsur tayom goṭa Israel somaj reakʼ mimitʼ gharońjrenko do apan ạpin bheḍa hoponko gurkoa. 7Ona tayom okako oṛakʼre bheḍa hoponakʼ jelko jom onako oṛakʼ reakʼ duạr cạukaṭ banarsa aṛere ar cetanre hõ thoṛa mãyãmpe potaokakʼa. 8Enhilokʼ ńindạge onko do ona jel seṅgelreko rapagma ar begor khạmiyanakʼ piṭhạ ar haṛhatʼ aṛakʼ sãoteko jom ma. 9Ona jel do berelte se dakʼte isinkate do alope joma, menkhan bohokʼ, jaṅga ar bhitri reakʼ hạṭińko sudhạ seṅgelre rapakʼ katepe joma. 10Ar setakʼ hạbicʼ do cetʼge alope sarecʼ dohokakʼa. Ar thoṛa sarecʼlen khan ona dope atar giḍikakʼa. 11Ona do nonka tahẽkatepe joma; apeakʼ kicricʼ do ḍanḍare paṭhe akae tahenma, jaṅgare panahi ar tire hõ ṭheṅga tahentape ma. Ona do usạrate onape joma. Ar noage Probhu Isor ńutumte bańcaokʼ porob reakʼ bhoj do hoyokʼa. 12Iń do ona ńindạge Misor disạm talateń parom calakʼa ar manwakoren pạhil hoponko ar janwarkoren pạhil hoponkoń gocʼkoa. Iń do Misorren sanam deb-debotakoń sạjạikoa; ar ińkangeạń Probhu Isor do. 13Menkhan apeakʼ oṛakʼre oka mãyãm potao akae tahen onage apeakʼ nisana do hoyokʼa. Ar ona mãyãm ńelte ape doń bad oṭokapea ariń parom calakʼa. Onate ape do Misor disạm reakʼ duk khon rukhiyạpe ńama. 14#Exo 23.15; 34.18; Lev 23.6-8; Num 28.17-25; Bib 16.3-8Ape lạgitʼ ona do mitʼṭecʼ disạ dokʼho dinge hoyokʼa. Probhu Isor ńutumte noa porob do mitʼṭecʼ jaejug reakʼ niạm lekate piṛhike piṛhipe porobokʼa.
15“Ape do eae din hạbicʼ bin khạmiyanakʼ piṭhạpe joma. Apeakʼ oṛakʼre oka khạmi tahen ona do pạhil dinregepe ocokʼ giḍikakʼa. Noa eae din bhitrire okoe khạmiyanakʼ piṭhại jom uni do Israelko tala khone marao ocokʼa. 16Pạhil ar eae mãhã hilokʼ do mitʼṭecʼ sonot jarwakʼpe hoeocoya. Niạ bar din do apnarakʼ jomakʼko benao chaḍa jãhãnakʼ cetʼge alope kạmiya. 17Bin khạmiyanakʼ piṭhạ porob do jaejug reakʼ niạm lekate piṛhike piṛhipe porobokʼa, ente niạ dinge ape do lạṛhại phạdko leka Misor disạm khoniń oḍok ạgupea. 18Ape do pạhil cando reakʼ gelponakʼ tạrik reakʼ ạyupʼ khon ehopʼkate ona cando reakʼ bargel mitʼ ńindạ hạbicʼ bin khạmiyanakʼ piṭhạpe joma. 19Noa eae din hạbicʼ apeakʼ oṛakʼkore khạmi do alope dohokakʼa. 20Jãhãregepe tahen niạ eae din do khạmiyanakʼ jãhãnakʼ cetʼge alope joma; menkhan bin khạmiyanakʼ piṭhạ baṛe jompe.”
21Unre Mose do Israelkoren sanam murubbiko hohoatʼkoteye metatʼkoa, “Apeakʼ gharońj lạgitʼ bheḍa hopon bachaokote bańcaokʼ porob ńutumte gocʼkope. 22Ona tayom mitʼ ạṭi busupʼ hataokate bạṭire dohoakan mãyãmrepe topoya ar banarsa cạukaṭ ar cetan kaṭre hõpe jotʼakʼa; ar ạuri setagokʼ hạbicʼ okoehõ oṛakʼ bahrete alope oḍokokʼa. 23#Ibr 11.28Misriko ńẽtʼko jokhecʼ Probhu Isor do tinre Misor disạm talateye parom calakʼa ar unre apeakʼ duạr cạukạṭ reakʼ mãyãme ńelle khan uni do ona oṛakʼe bạgi oṭowakʼ are laha calakʼa. Ar okoe noa ḍahao marao reakʼ kạmiye kạmi uni do apeakʼ oṛakʼre bae bolo ocoaea.
24“Noa porob do jao okte ape ar aperen bõsko mitʼṭecʼ niạm menkatepe manaoa. 25Probhu Isor okaṭakʼ disạm emape reakʼe gokʼ akatʼpe ona disạmre senkate hõ noa porobpe porobokʼa. 26Aperen hopon ar hoponerako tinreko kulipea, ‘noa reakʼ mane do cetʼkana mente?’ 27Unrepe lạiyakoa, ‘noa do hoyokʼ kana Probhu Isor ńutumte bańcaokʼ porob reakʼ dãṛẽ, ente Misor disạmre tahen jokhecʼ uni do Israelkoakʼ oṛakʼko bad oṭokateye parom senlena. Uni do misrikoe gocʼketʼkoa menkhan ale doe rukhiyạketʼlea.’ ” Inạ tayom Israelko do ombakʼkate Probhu Isorko sewawadea. 28Mose ar Aron Probhu Isor okaṭakʼ hukume ematʼkin tahẽkan onkage Israel hoponko do ruạṛ senkateko kạmikeda.
29 #
Exo 4.22,23 Ona tayom pon gel tạrik reakʼ tala ńindạ okte Probhu Isor do Misor disạmren mitʼke mitʼ pạhil hoponkoe gocʼketʼkoa. Nonkate raj siṅghạsonren ạidạriyicʼ Pharaoren pạhilicʼ hopon khon ehopʼkate hajot oṛakʼre menayicʼren pạhilicʼ hopon hạbicʼ, ar janwarkoren hõ pạhil hoponko gocʼena. 30Ona ńindạ Pharao ar acʼren sanam kạmiyạko ar Misor disạmren mitʼke mitʼ hoṛ do jạpitʼ khonko ebhenena; ar goṭa Misor disạmre maraṅ rakʼjoṅ ar hae haeyokʼ hoyena, ente mitʼṭecʼ oṛakʼ hõ baṅ badlena onḍe celege bako gocʼakan.
Misor khonko oḍok calakʼkan
31Pharao do enhilokʼ ńindạge Mose ar Arone hoho ạgu ocoketʼkinteye metatʼkinạ, “Aben do Israelko soṅgekate ińren hoṛko tala khon oḍokokʼ ben. Ar cetʼleka ben menetʼkan onkage senkate aperen Probhu Isor sewawaepe. 32Abenakʼ katha lekage calakʼ jokhecʼ aperen ḍaṅgrako-bhiḍiko hõ iditorakope, ar iń hõ bhor oṭoạńpe.”
33Misriko hõko botorena, ente hoedaṛeakʼa onko hõko gujukʼa. Onate onko do Israelko usạrae lạgitʼko metatʼkoa jemon usạra disạm khonko oḍok calakʼ. 34Nonkate Israelko do khạmi ạuriko mesalrege sipiyakʼ holoṅ ḍhimbạ do gamla sudhạ kicricʼreko moṭraketʼte tarenreko ladekeda. 35#Exo 3.21,22Israelko do Moseyakʼ katha leka misriko sona-rupạ ar kicricʼko koeketʼkoa. 36Ar onko okaṭakʼko khojketʼ onage emokʼ lạgitʼ Probhu Isor do misrikoakʼ monre Israelko cetanre dayae janam ocoketʼtakoa. Nonkate onko do misrikoakʼ aema jinisko ạidạriana.
37Ona tayom Israelko do Rameses khon Sukot secʼko mohnḍayena. Jotote turui lakh herel hoṛko taṛam idikeda. Onko sãote maejiuko ar gidrạko hõko tahẽkana. 38Israelko chaḍa arhõ aema hoṛ ar ḍaṅgrako-bhiḍiko sudhạ mitʼṭen maraṅ mĩhũ-merom palko hõ onko sãoteko tahẽkana. 39Oka bin khạmiyanakʼ sipiyakʼ holoṅ ḍhimbạ Misor disạm khonko ạgu daraletʼ onate horre piṭhạko benaokeda. Ar nunạkʼ usạra Misor khonko oḍok ocoyena, onko do holoṅ sãote khạmi mesal reakʼ somoe hõ bako ńamleda ar horre jom lạgitʼ jãhãnakʼ hõ bako benao daṛeada.
40 #
Gen 15.13; Gal 3.17 Misor disạmre Israel hoponko do jotote pon sae pegel bochorko tahẽkana. 41Ar pon sae pegel bochor mucạtʼen hilokʼge Probhu Isor do sanam hoṛko lạṛhại phạdko leka Misor disạm khone oḍok ạguketʼkoa. 42Probhu Isor do inạ ńindạge pahrakate Misor disạm khone oḍok ạguletʼkote piṛhike piṛhi Israelko do Probhu Isorakʼ katha disạite ona ńindạ do jagwargeko tahenkana.
Bańcaokʼ porob palon reakʼ niạm
43Tayomte Probhu Isor do Mose ar Arone metatʼkinạ, “Bańcaokʼ porobre bheḍa hopon reaṅ iń do thoṛa niạm iń emaben kana. Eṭakʼ jãhãe jạtren hoṛ noa reakʼ jel do bako jom daṛeakʼa. 44Ṭakate kiriń akade golam do khatna tayom ona reakʼ jele jom daṛeakʼa. 45Ape talareko tahenkan seko hecʼakan se ṭakateko khaṭao ocokʼkan nonkan jãhãe jạtren hoṛ hõ ona do bako jom daṛeakʼa. 46#Num 9.12; Jhn 19.36Oka oṛakʼre bheḍa hoponpe gurko ona oṛakʼrege ona do jom hoyokʼa. Oṛakʼ bahrete do alope idiya ar uni bheḍawakʼ mitʼṭen jaṅ hõ alope rạpudtaea.
47“Sanam Israelkoge noa porob do manao hoyokʼtakoa. 48Ape talareko tahenkan eṭakʼ jạtren jãhãege Probhu Isor ńutumteakʼ noa bańcaokʼ porobe manao enḍekhan lahare uniyakʼ gharońjren sanam herel hoṛ do khatnakʼ hoyokʼtakoa. Ona tayom do Israelko lekako manao daṛeakʼa. Menkhan bin khatna akan hoṛ do noa porob reakʼ jel do bako jom daṛeakʼa. 49Israelko lạgitʼ ar ape talareko tahenkan eṭakʼ jạtren hoṛko lạgitʼ hõ inạ mitʼ hukumge tahẽyena.”
50Probhu Isor do Mose ar Aron okaṭakʼe hukumatʼkin onkage Israelko doko kạmikeda. 51Ar Probhu Isor do ona dinge lạṛhại phạdko leka Misor disạm khon Israelkoe oḍok ạguketʼkoa.
Currently Selected:
Exodus 12: SBT
Highlight
Copy
Compare
Share
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
