Dosar Biboron 22
22
1 #
Exo 23.4,5 “Aperen Israel boeharen ḍaṅgra se uniren bhiḍi se merome sen atʼakanpe ńellekore hape akae alope tahena. Ape do uni ṭhenpe ruạṛ idikaea. 2Uni boeha do ape aḍepaserene baṅkanre hõ se bape baḍae akade khan, enḍekhan uni atʼicʼ do ape ṭhenpe ạguiyea ar uni boeha sendra ạuriye hijukʼ hạbicʼ apeakʼ oṛakʼregepe doho hataṛkaea. Ar uniye hecʼlen khanpe em ruạṛkaea. 3Aperen boeharen gadha se oyonakʼ se uniye atʼakatʼ eṭakʼ jãhãnakʼgepe ńelle khan hõpe onkaea, ar alope duṛupʼ hapekokʼa.
4“Aperen boeharen gadha se ḍaṅgra horre bhindạṛ akanpe ńellere hape akae alope tahena. Uni jemone beretʼ daṛeakʼ ona lạgitʼpe kurumuṭuiya.
5“Jãhãe maejiuge herelakʼ sajte jemon aloe sajokʼma se jãhãe herel hoṛ hõ maejiuakʼ horokʼakʼte aloe sajokʼma. Ente Probhu Isor do onka kạmiyicʼ doe hirkhạwaea.
6“Hortepe calakʼ jokhecʼ darere se ot cetanre jãhãn cẽṛẽyakʼ tukạpe ńamlere ar onḍe eṅgattetʼ do hoponkoe hạmbutʼ akatʼko se belekoe obor akatʼtae, enḍekhan hopon sudhạ eṅgattetʼ do alope idiyea. 7Hopon dope idi daṛeakoa menkhan eṅgattetʼ do aṛakʼkae hoyokʼtapea. Nonkate ape do bhạlại hoyokʼtapea ar ḍher din jiwetʼpe tahena.
8“Oṛakʼ benao jokhecʼ chad reakʼ beṛhaetepe kãt ạcurkakʼa, jemon jãhãe chad khon ńurhạkateye gocʼlen khan oṛakʼren hoṛko uniyakʼ gujukʼ iạte dạyi aloko hoyokʼ.
9 #
Lev 19.19
“Darkha khetre bar lekan itạ do alope rohoea; entepe rohoe lekhan ona itạ reakʼ phosol ar khet reakʼ darkha jo banarge ape lạgitʼ do barongea.
10“Ḍaṅgra ar gadha mitʼ sãote siyokʼ lạgitʼ alope joṛao mitʼkinạ.
11“Bar jạt sutạm metakʼme bhiḍi upʼ ar musnạ sutạm mesalkate benaoakʼ kicricʼ hõ alope horoga.
12 #
Num 15.37-41
“Ar apeakʼ oyonakʼ reakʼ ponon ańcarre ḍuriạpe tolakʼa.
Bapla niạm rạpud reaṅ
13-14“Jãhãe hoṛ baplakate bạhuttetʼ sãoteye giticʼmidokʼ tayom ar bae kusiyae khan ar uniyakʼ bodnam pasnaoteye men, ‘iń do nui kuṛiń baplaledea, menkhan unire kũạritetʼ reakʼ porman bạń ńamleda,’ 15-16unre kuṛiren gogo-baba do kũạritetʼ proman lạgitʼ ato se nagraha reakʼ phaṭok duạrre murubbiko ṭhen ạkinren kuṛi idikate apattetʼe mena, ‘nui hoṛ sãote ińren hoponerań baplaledea menkhan ar bae kusiyae kana, 17ar ńitokʼ do bodname pasnaoetʼtaea, baṅma kũạritetʼ reakʼ proman unire bae ńamleda. Menkhan nõkʼõe ńelpe ińren hoponerańakʼ kũạri reakʼ porman.’ Ar noa menkate uni do murubbiko samaṅre uniye beoharletʼ reakʼ kicricʼe ḍhala. 18Unre murubbiko do uniren jãwãeko sạjạiyea. 19Onko do juri banalekate uni ṭhen khon mitʼ keji rupạko ạdạiyea ar kuṛiren apattetʼko emaea, ente uni do Israelren mitʼṭen kũạri kuṛi ńutumte bodname pasnao akada. Ar kuṛi do uni hoṛren bạhu mentegeye tahena ar uniren jãwãe do tisge bae bạgi daṛeaea.
20“Menkhan sạrikan khan ar kuṛi do kũạ̃ritetʼ mente bae pormanlen khan, 21tobe kuṛi do acʼ apattetʼakʼ oṛakʼ reakʼ duạr ṭhen idiye hoyokʼa. Ar onḍe herel hoṛko do dhirite uniko tiń gojea. Kuṛi do apattetʼakʼ oṛakʼre tahen jokhecʼe laṭghaṭletʼ iạte Israelko talare mitʼṭecʼ hirkhạwakʼe kạmiakada. Ar ape tala khon nonkan bạṛicʼan hoṛ dope marao utạrkoa.
22“Jãhãe hoṛ jãhãe eṭakʼ hoṛren bạhu sãoteye giticʼmidokʼkane ńel len khan tobe uni herel ar maejiu bana hoṛge gocʼ giḍikin hoyokʼa. Israelko tala khon nonkan bạṛicʼ hoṛ dope marao utạrkoa.
23“Bapla ṭhik akantae nonkan jãhãe kũạri kuṛi atore se nagrahare ńamkate jãhãe uni sãoteye giticʼmidokʼ, 24enḍekhan unkin banarge onḍenakʼ phaṭok duạr ṭhen idikate dhirite tiń gocʼkin hoyokʼa. Kuṛi do noa iạtege goje hoyokʼa uni do ato se nagrahare tahẽkate hõ goṛo ńam lạgitʼ bae kikiạuleda, ar herel do eṭakʼ hoṛren bạhui nosṭokede iạte. Ape talare nonkan bạricʼ hoṛ dope marao utạrkoa.
25“Bapla ṭhik doho akantae nonkan jãhãe kuṛi nisun jaegare ńamkate jãhãe jorkate uni tulucʼe giticʼmidokʼ enḍekhan okoe hoṛe kạmi akatʼ eken uni motogeye gocʼ ocokʼa. 26Kuṛi do jãhãnakʼ alope cekaea; gujukʼ sạjại ńam lek uni do jãhãnakʼ bae ceka akada. Noa do mitʼ hoṛ acʼ pheḍren hoṛ upạrte jhãp emkate khunkede lekanakʼ kana, 27ente uni hoṛ eskarge kuṛi do maṭreye ńamledea are kikiạuletʼre hõ uni bańcaoe lạgitʼ onḍe celege bako tahẽkana.
28 #
Exo 22.16,17 “Menkhan bapla baṅ ṭhik akantae nonkan kũạri kuṛi ńamkate jãhãe jorkate uni sãoteye giticʼ midokʼ arkin sapʼ ńamokʼ, 29enḍekhan uni hoṛ do kuṛiren apattetʼ adha keji rupại emaea. Ar kuṛiye nosṭokedete uni do baplaye hoyokʼtaea. Ar tisge bae bạgi daṛeaea.
30 #
Lev 18.8; 20.11; Bib 27.20 “Kạki eṅgattetʼ baplako do baṅ ganokʼa; onate uni do apattetʼren bạhu sãoteye laṭghaṭte apattetʼe bemanotea.
Currently Selected:
Dosar Biboron 22: SBT
Highlight
Copy
Compare
Share
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
