Dosar Biboron 21
21
Bae baḍaekan khũniạhi reaṅ
1“Aperen Probhu Isor okaṭakʼ disạm dokhol lạgitʼe emape lạgidokʼkan onḍe ṭạnḍire jãhãe khun akanpe ńelle khan, ar okoe uniye khunkede ona reakʼ jãhãnakʼ bape baḍae daṛeakʼ. 2Enḍekhan aperen murubbiko ar bikʼcạrko do bahrete senkate ona mạ̃ṛĩ khon sor reakʼ ato se nagrahako soṅa tinạkʼ sạṅgińre menakʼa mente. 3Ar mạ̃ṛĩ khon okaṭakʼ nagraha do joto khon sorre menakʼ nagraharen murubbiko do nonkan mitʼṭen phẽṭaṛko hataoea okoe do kạmire baṅ lagaoakade ar tarenre tishõ arãṛ baṅ lade akawade. 4Ar okare tishõ bako casakatʼ se itạ hõ bako erakatʼ ar onḍe mitʼṭecʼ ạtukʼ soḍokʼ menakʼ, nonkan mitʼṭecʼ sokṛa soḍokʼte uniko idiyea. Ar ona soḍokʼre uni phẽṭaṛakʼ hoṭokʼko rạpudtaea. 5Ona tayom naekeko, metakʼme Liwi gusṭiren hoṛko do sapʼsosor kạmi lạgitʼko hecʼ sorokʼa, onko do Probhu Isor ńutumte hoṛko bhorakoa ar reṭepeṭe, dapal tapamre hoṛkoakʼko bicạr chinḍạutakoa ente aperen Probhu Isor do onkoe bachao akatʼkoa. 6Ona tayom onko sor ato se nagraharen murubbiko do hoṭokʼ rạputʼ akatʼtae phẽṭaṛ cetanre akoakʼ tiko ạrupʼ saphaetakoa. 7Ar inạ tayomko mena, ‘aleakʼ ti do niạ mãyãm bae joroakada ar ona hoyokʼ hõ bale ńelakada. 8E Probhu Isor, amem chaḍao akatʼko Israelko baṛe ikạkako me. Nui hoṛakʼ mãyãm iạte amren hoṛko alom dusikoa.’ Ar onate mãyãm reakʼ dos khon ikạpe ńama. 9Nonkate ape tala khon bin dusạn hoṛakʼ mãyãm reakʼ dospe meṭao daṛeakʼa, ente unre Probhu Isorakʼ mẽtʼre oka bhageakʼkan onage hoyokʼa.
Lạṛhạire hat akan maejiuko reaṅ
10“Bạiriko sãote lạṛhại senkate tinre aperen Probhu Isor apeakʼ tire onkoe jimạkoa ar ape do onkope bondikoa, 11unre onkoren mońje ńelokʼ maejiu ńelte jãhãeye kusi emanlen khan uni do bạhuttetʼ menteye doho daṛeaea. 12Ar maejiu do acʼakʼ oṛakʼteye idiyea. Ona tayom uni maejiu do hoyo munḍrikʼ hoyokʼtaea ar ramakoe getʼ giḍiytaea, 13ar bondikate ạguiye jokhecʼ acʼakʼ hoṛmore okako kicricʼ tahẽkantae onakoe giḍikataea. Inạ tayom uniyakʼ oṛakʼre tahẽkate maejiu do mitʼ cando hạbicʼ acʼren go-baba lạgitʼe rakʼ homora. Ar ona tayom uni hoṛ do maejiue baplayete uniren jãwãeye hoyokʼa ar maejiu hõ uniren bạhui hoyokʼa. 14Menkhan tayomte maejiu bae kusiyae khan uni okare calakʼe men onḍege sen ocowae hoyokʼa. Uni do bae ạkhriń daṛeaea se kạ̃ṛmĩ lekate hõ bae doho daṛeaea, ente uni doe bemanot akadea.
Pạhilicʼ hoponakʼ ạidạri
15“Nonka hoedaṛeakʼa, mitʼ hoṛren do barea bạhu menakʼkintaea, unkin modre mitʼṭene dulạṛea ar eṭakʼicʼ do baṅa. Ar unkin bana hoṛren koṛa hoponkin janamokʼ ar bae dulạṛedekan bạhuren pạhil koṛa hopone janamokʼ, 16enḍekhan sompotti emokʼ jokhecʼ okoeṭakʼ bạhu bae dulạṛede tahẽkan uniren hopon badkate eṭakʼ bạhuren pạhilicʼ koṛa ạidạri emae do baṅ ganokʼtaea, ente okoeṭakʼ bạhu bae dulạṛede tahẽkan uniren hoponge pạhilreye janam akana. 17Ar bạhu bae dulạṛedekanren hoponge acʼakʼ sompotti reakʼ eṭakʼ hopon khon bar doboṛ emkate unige pạhilicʼ hopon mente aṅgoce hoyokʼtaea. Ente uni hoponkangeae apattetʼakʼ daṛe reakʼ pạhilicʼ jo do. Ar pạhil hopon reakʼ ạidạri do unigeye ńama.
Bebatao koṛa hopon reaṅ
18“Jãhãeren koṛa hopon ḍhiṭ ar ṭhokicʼe hoyokʼ, ar go-babawakʼ katha bae ańjom ar unkinakʼ ḍanṭao bae manao, 19enḍekhan uniren go-baba do ạkinakʼ ato se nagraha reakʼ phaṭok duạrre murubbiko ṭhenkin idiyea. 20Unkin do murubbiko kin metakoa, ‘ạlińren nui hopon do ạḍitetʼ ḍhiṭicʼ kanae are ṭhokgea; uni do bae hetawạliń kana. Uni doe ńũ bulokʼkana ar ṭaka poesae tahas nahas cabayetʼa.’ 21Unre ona ṭhạ̃iren sanam herel hoṛ do dhirite uniko tiń gojea. Ar nonkate ape tala khon uni bạṛicʼ hoṛ doe caba utạrokʼa. Ar Israelko do noa katha ańjomkate botor caṛhaoakoa.
Eṭakʼ eṭakʼ niạmko
22“Jãhãe hoṛ gujukʼ sạjại ńam lek kanae menteye dos akatʼ khan ar gocʼkate darereko ṭaṅgao dohoakade khan, 23#Gal 3.13enḍekhan setakʼ hạbicʼ mạ̃ṛĩ do darere aka dohokakʼ baṅ ganokʼa. Enhilokʼge uni do topakae hoyokʼa, ente onkanko hoṛ do Probhu Isorren sarapan hoṛkanako. Ar Probhu Isor do sompotti lekate okaṭakʼ disạme emape lạgidokʼkan ona do alope besapha ocoya.
Currently Selected:
Dosar Biboron 21: SBT
Highlight
Copy
Compare
Share
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
