Dosar Biboron 23
23
Baronakʼko reaṅ
1“Koṭecʼ cạkrạ akadeyicʼ se getʼ cạkrạ akadeyicʼ hoṛ do okoe hõ Probhu Isorakʼ manḍerre bako seletʼ daṛeakʼa.
2“Jãhãe bidhuạ hoṛ hõ Probhu Isorakʼ manḍerre bae seletʼ daṛeakʼa; gelpon piṛhi hạbicʼ uniren do cele hõ bako seletʼ daṛeakʼa.
3 #
Neh 13.1,2 “Jãhãe Amoni se Moabi hõ Probhu Isorakʼ manḍerre bae seletʼ daṛeakʼa; gelpon piṛhi hạbicʼ uniren cele hõ manḍerre bako bolo daṛeakʼa. 4#Num 22.1-6Ente Misor disạm khon oḍok hecʼkate apeakʼ dãṛãn horre onko do jomakʼ ar dakʼante bako daramletʼpea, bickom sarapape lạgitʼ Mesopoṭamia disạm reakʼ Pethor nagraha khon Beor hopon Biliam do ṭakateko ạguledea. 5#Num 23.7—24.9Menkhan aperen Probhu Isor do Biliamakʼ katha bae luturada; ar ape bako dulạṛletʼpe iạte uni do sarap bodolteye bhoratʼpea. 6Tinạkʼ din jiwetʼpe tahen unạkʼ din onko bhạlạiko reakʼ alope kurumuṭuiya.
7“Menkhan Edomrenko do alope hirkhạwakoa, ente onko do aperen boeha kanako. Misorrenko hõ alope hirkhạwakoa, ente onkoakʼ disạmre ape do porjạtrenko lekatepe tahekana. 8Onkoren tesar piṛhiren gidrạko do Probhu Isorakʼ manḍerreko seletʼ daṛeakʼa.
Lạṛhại phạdkoakʼ ḍera sapha dohoy reakʼ
9“Bạiriko upạrte lạṛhại senkate ḍera benao tayom sanam lekan besaphawakʼko khon pharak akaepe tahena. 10Ape talaren jãhãege ńindạ jokhecʼ jãhãnakʼ iạteye besapha len khan, uni do ḍera bahrete senokʼ hoyokʼtaea. 11Ar ạyubokʼ dela deli doe ḍạbrạ saphakʼa. Ar siń cando hạsur tayom do ḍerateye bolo daṛeakʼa.
12“Ṭạnḍite lạgitʼ metakʼme bahrete calakʼ lạgitʼ ḍera bahre mitʼṭecʼ jaegape ṭhik dohokakʼa. 13Apeakʼ khanḍa bhanḍako modre ot lae lạgitʼ mitʼṭecʼ khonta hõ dohoy hoyokʼtapea. Ar ṭạnḍite metakʼme bahre calakʼ lahare onatepe la ghạḍluga ar ṭạnḍite baṛakate hasatepe topa oṭokakʼa. 14Ape rukhiyạpe lạgitʼ ar aperen bạiriko apeakʼ tire soprotko lạgitʼ aperen Probhu Isor do apeakʼ ḍera talareye dãṛãna. Onate apeakʼ ḍera do sonotpe dohoya jemon ape talare hirkhạwakʼ jãhãnakʼ ńelte aloe dea giḍipe.
Emanteakʼ niạmko
15“Jãhãeren guti do ape ṭhen hecʼkate asraye hatao enḍekhan uniren kisạ̃ṛakʼ tire alope jimạ ruạṛkaea. 16Uni guti do ape talare okare tahene menjoṅ onḍege tahẽ ocoaea; ar alope santaoea.
17 #
Lev 19.29
“Jãhãe Israelren maejiu jemon mundilren kusmbi aloe hoyokʼ; ar jãhãe Israel herel hõ mundilren kusmbi metakʼme alo jemone jogna ocokʼ. 18Herelge cetʼ ar maejiu kusmbige cetʼ uniyakʼ rojgarakʼ ṭaka do mundilte manot purạu lạgitʼ aperen Probhu Isorakʼ oṛakʼte alope ạguiya, ente Probhu Isor do nonkan herel ar maejiue hirkhạwako kana.
19 #
Exo 22.25; Lev 25.36,37; Bib 15.7-11 “Jãhãe Israel boehako ṭhen khon sud alope hataoa, baṅ do ṭaka cetanre ar baṅ do jomakʼ jinis cetanre, baṅ do eṭakʼ jãhãn jinis cetanre ape do sudge alope hataoa. 20Menkhan eṭakʼ jạtren hoṛko ṭhen khon dope hatao daṛeakʼa eken Israel boehako chaḍa. Nonkape senakʼ khan okaṭakʼ disạm dokhol lạgitʼpe calakʼkan onḍe ape do jãhãnakʼrege hatpe calao onarege Probhu Isor doe bhorapea.
21 #
Num 30.1-16; Mat 5.33 “Aperen Probhu Isor ṭhen jãhãnakʼge manot lạgitʼpe dohoy enḍekhan ona purạu lạgitʼ do alope biloma, ente aperen Probhu Isor do tishõ ona khon bae khalaspea. Ar onate ape do kạirepe paṛaokʼa. 22Menkhan manotakʼ reakʼ jãhãnakʼ bape doholere kại do baṅ hoyokʼtapea. 23Mocate okaṭakʼ manotakʼ reakʼ kathape roṛ ona do purạutege hoyokʼtapea, ente amakʼ mocatege Probhu Isor samaṅre manotakʼ reakʼem roṛ akada.
24“Eṭakʼ jãhãeakʼ darkha khetre senkate apeakʼ kusi leka darkha jope jom daṛeakʼa, menkhan idiy lạgitʼ do bape gocha daṛeakʼa. 25Ape pheḍren hoṛakʼ teṅgo akan phosolrepe bololenre ona reakʼ gelepe hulecʼ daṛeakʼa, menkhan datromte do bape getʼ daṛeakʼa.
Currently Selected:
Dosar Biboron 23: SBT
Highlight
Copy
Compare
Share
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
