1 Rapajko 17
17
Bhonḍa kạhũ hotete Eliạ do jomakʼe ńamketʼ
1 #
Jak 5.17
Gilead reakʼ Tisbe atoren Eliạ do Ahabe metadea, “Iń okoeyiń sewawaekan Israelren uni jiwetʼ Probhu Isorre kiriạkateń meneda, iń ạuriń men hạbicʼ darakan bochorkore sisir hõ baṅ ńurokʼa, ar dakʼ hõ bae daga.”
2Tayomte Probhu Isor do Eliạ metadea, 3“Niạ jaega bạgikate am do purub secʼ calakʼme ar jordan purub reakʼ Kirit soḍokʼ ṭhen oko hataṛkokʼme. 4Ar ona soḍokʼ reakʼ dakʼem ńũiya ar onḍe jomakʼ idiyam lạgitʼ iń do mitʼṭecʼ bhonḍa kạhũń ṭhik doho akadea.”
5Onate Probhu Isor do Eliạ okae metade tahẽkan onageye kạmikeda. Uni do Jordan purub reakʼ Kirit soḍokʼte senkateye tahẽyena. 6Ar bhonḍa kạhũ do setakʼ ar ạyupʼ jokhecʼ piṭhạ ar jele idiaekan tahẽkana ar uni do ona soḍokʼ reakʼ dakʼe ńũiyetʼ tahẽkana.
Sarephatren rạnḍi maejiu
7Disạmre bae dakʼetʼ tahẽkante ona soḍokʼ reakʼ dakʼ hõ ańjetʼena. 8#Luk 4.25,26 Unre Probhu Isorakʼ niạ katha Eliạ ṭhen sodorena, 9“Ńitokʼ do Sidonren Sarephat ṭhen senkate tahenme. Onḍe iń do jomakʼ jogaṛam lạgitʼ mitʼṭen rạnḍi maejiu iń ṭhik doho akadea.” 10Ona iạte uni do Sarephatteye calaoena. Ar atote bolokʼ horreye seṭeren khan mitʼṭen rạnḍi maejiu sahan ńańam kane ńelkedea. Ar uni hohoadeteye metadea, “Ńũi lạgitʼ thoṛa dakʼem ạgu daṛekińạ?” 11Maejiu do tinreye calakʼkan tahẽkana unre arhõ hohoadeteye metadea, “Dayakate iń lạgitʼ mitʼ kecakʼ piṭhạ hõ ạgu daraeme.”
12Uni maejiue roṛ ruạṛkeda, “Amren jiwetʼ Probhu Isor ńutumte kiriạkateń meneda, iń ṭhen do mitʼṭecʼ piṭhạ hõ bạnukʼa. Hanḍhare eken mitʼ muṭ holoṅ ar cukạkʼre thoṛa sunum menakʼa. Iń do oṛakʼte idi lạgitʼ thoṛagan sahaniń halaṅeda; onate iń ar ińren hoponiń lạgitʼ thoṛa jomakʼ iń benaoa. Ar ona tayom do jom kateliń gujukʼa.”
13Eliạ do uniye metadea, “Alom botorokʼa. Am okam menketʼ oṛakʼte senkate onage onkaeme. Menkhan amakʼ oka menakʼtam ona khon pạhilte iń lạgitʼ mitʼṭecʼ ḍetʼḍetʼ piṭhạ benaokate nonḍe ạguạńme. Ar ona tayom do am ar amren hopon lạgitʼ benaome. 14Israelren Probhu Isor do niạ kathae meneda, dakʼ ạuriye emokʼ hạbicʼ holoṅ reakʼ hanḍha ar sunum reakʼ cukạkʼ hõ baṅ khạlikʼa.”
15Unre senkate uni do Eliạ lạgitʼ okae men ocolen onae tearkeda. Onate Eliạ ar uni maejiu ar uniren hopon do ḍher din hạbicʼko jomkeda. 16Eliạ hotete Probhu Isor oka kathae men ocolen onkage holoṅ reakʼ hanḍha ar sunum reakʼ cukakʼ do baṅ khạlilena.
17Thoṛa din tayom uni maejiuren hopon doe ruạyena. Ar ruạ kạhilte uni doe gocʼena. 18Maejiu do unre Eliại metadea, “E Isorren hoṛ, iń do cetʼ iń khuti akatʼtama? Am do cetʼ ińakʼ kại reakʼ katham disạ ocoyińte ińren hopon goje lạgitʼem hecʼakana?”
19Eliại roṛ ruạṛkeda, “Dini amren hopon iń ṭhen ạguiyem.” Uni do maejiuakʼ hobor khon uni hopontetʼe hataokedete oka oṛakʼre acʼe tahẽkan onḍeye idikedea ar acʼakʼ aṭetʼreye giticʼkedea. 20Ona tayom Probhu Isor hohoadeteye metadea, “E Probhu, ińren Isor, iń okoeṭakʼ rạnḍi maejiuakʼ oṛakʼren tahenkan uniren hoponem gocʼ ocoakadete cedakʼ unire noa duk dom paṛao ocoyeda?”
21 #
2 Raj 4.34,35 Ona tayom uni do pe dhao gidrại taber loṭomkedete Probhu Isore hohowadea, “E Probhu ińren Isor, gidrạwakʼ jiwi baṛe ruạṛ kataeme.”
22Probhu Isor do Eliạwakʼ kathae ańjomkeda ar ar uniren hopon do jiwiye ńam ruạṛkeda are jiwetʼ ruạṛena. 23Unre Eliạ do gidrại hoborkedete latar kandhateye pheḍkedea. Ona tayom uniren eṅgattetʼ ṭhene jimạkedeteye metadea, “Nũkʼũe ńeleme, amren hopon do jiwetʼge menaea.”
24Uni maejiu do unre Eliại metadea, “Iń do ńitokʼ iń bujhạu daṛeakʼ kana am dom Isorren hoṛ kana, ar Probhu Isor am hotete okae men ona do sạrigea.”
Currently Selected:
1 Rapajko 17: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
