1 Rapajko 18
18
Eliạ ar Obediạ
1Inạ ḍher din tayom, bae dakʼetʼ tahẽkan tesarakʼ bochorre Probhu Isor do Eliại metadea, “Do Ahab sãote ńapamokʼme. Ar iń do disạmre dakʼ iń kola.” 2Onate Eliạ do Ahab sãote ńapamokʼ lạgitʼe senena.
Unre Samariạre do maraṅ akal hoyokʼkan tahẽkana. 3Ahab do Obediạye hoho ạgukedea. Nui Obediạ cetanrege raj dolan ńel todarot reakʼ bhar do tahẽkana. Probhu Isor cetanre Obediạ do ạḍi pạtiạu tahẽkantaea. 4Isebel do tinre Probhu Isorren nạbikoe gocʼetʼko tahẽkana unre Obediạ do mitʼsae nạbiko mõṛẽgel mõṛẽgelkate barea danderreye oko doholetʼkoa. Uni do onko lạgitʼ jomakʼ ar dakʼ hõe bebostayetʼ tahẽkana. 5Obediại hecʼen khan Ahab do uniye metadea, “Am do disạm reakʼ sanam dakʼ jharna ar soḍokʼko ṭhen calakʼme. Hoedaṛeakʼa sadomko ar khaccorkoakʼ jiwi bańcaotako lạgitʼ thoṛa ghãskom ńam botecʼke. Onate aboren janwarko do gocʼ giḍikako baṅ lagao abona.” 6Unkin do ńel ạcur lạgitʼ disạmkin hạṭińkeda. Ahab do mitʼ secʼe senena ar Obediạ do eṭakʼ secʼ.
7Obediạ do horteye calakʼkan tahẽkanre Eliạ sãoteye ńapamena. Obediạ do uniye ńel oromkede khan otre ombakʼkate joharadeteye menkeda, “E ińren mạlik Eliạ, sạrigem am kangea?”
8Uni doe roṛ ruạṛkeda, “Hẽ iń kangeạń. Am do senkate amren kisạ̃ṛ baḍae ocoyem, Eliạ do nonḍe menaea.”
9Obediạ doe menkeda, “Cetʼ iń ceka akatʼte, amren guti do gojeń lạgitʼ Ahabakʼ tirem jimạyediń kana?” 10Amren jiwetʼ Probhu Isor ńutumte kiriạkateń metamkana, nonkan jạtrenko se rajosṭiko bạnukʼa one okare ińren mạlik do am sendrame lạgitʼ hoṛ bae kol akatʼko. Onko jạtrenko se rajosṭire tinreko lạikeda onḍe do bạnuma unre uni do onkoe kiriạ ocoyetʼko tahẽkana, ar sạrige onko do bako sendra ńam daṛeakatʼmea. 11Ar ńitokʼ am do ińren mạlik ṭhen senkate memenem mitạń kana, Eliạ do nonḍe menaea mente. 12Ińiń bạgiyam khange Probhu Isorren Jiu do eṭakʼ jãhã secʼe idimea ar iń do bạń baḍae daṛeakʼa. Ar senkate Ahab iń lạiyae ar bae ńamme enḍekhan uni doe gocʼ giḍikạńạ. Menkhan huḍiń khonge amren guti do Probhu Isoriń botorae kana. 13Isebel do tinre Probhu Isorren nạbikoe gocʼ giḍiyetʼko tahẽkana unre ińiń ceka akatʼ reakʼ do cetʼ ińren mạlik bae ańjomakada? Probhu Isorren nạbiko modren mitʼsae hoṛ do mõṛẽgel mõṛẽgelkate barea danderreń oko doholetʼkoa ar onkoakʼ jomakʼ ar dakʼ hõń bebosta akokan tahẽkan. 14Am do ńitokʼ ińren kisạ̃ṛ ṭhen senkate memenem mitạń kana, Eliạ nonḍe menaea mente. Uni doe gocʼ giḍikạńạ.”
15Eliại menkeda, “Iń okoeyiń sewawae kan, metakʼme sanam daṛeanicʼ jiwetʼ Probhu Isorre kiriạkateń meneda, iń do khạṭige teheń do Ahab samaṅreń hạjirokʼa.”
Eliạ do Karmel burure
16Unre Obediạ do Ahab sãoteye ńapamente ona kathae lạiyadea ar Ahab do Eliạ sãote ńapamokʼe senena. 17Eliại ńelkede khan Ahabe menkeda, “Am kangeam, E Israelren jạnum?”
18Eliại menkeda, “Iń do jạnum doń baṅkana, menkhan am ar ạpum bõsren hoṛge Israelren jạnum kanape. Ape do Probhu Isorakʼ hukum bạgikate Bakʼal debotape sewawae kana. 19Ńitokʼ am do hoṛ kolkate Israelren sanamko Karmel burure iń ṭhen jarwakom. Ar Isebelakʼ ṭebilre Bakʼal debotaren okoe pon sae mõṛẽgel nạbi ar Aseraren pon sae nạbiko do jom ńu ocokom ar nonḍe ạgukom.”
20Unre Ahab do Israel reakʼ sanam jaegare khobore kolketʼte Karmel burure onko nạbikoe jarwaketʼkoa. 21Eliạ do hoṛko samaṅre senkateye menkeda, “Ar tinạkʼ din barea lạukạre lebetʼ akanpe tahena? Probhu doe Isorkan khan unige sewawaepe, ar Bakʼalgeye Isorkan khan enḍekhan unige sewawaepe.” Menkhan hoṛko do cetʼge bako roṛ ruạṛleda.
22Unre Eliạ do onkoe metatʼkoa, “Probhu Isorren nạbiko modre eken ińge sarecʼ minạńa, menkhan Bakʼal debotaren nạbiko do pon sae tala menakʼkoa. 23Ńitokʼ barea ḍaṅgrakin ạgu ocokʼma. Unkin modre onko mitʼṭenko bachao joṅma ar getʼ khanḍa khunḍikate sahan cetanreko dohoyema, menkhan onare seṅgel do aloko lagaoakʼma. Ar iń hõ eṭagicʼ ḍaṅgrań getʼ khanḍa khunḍiyea ar sahan cetanreń dohoyea ar seṅgel hõ bạń lagaoakʼa. 24Ona tayom onko do akoren debotako hohoaea ar iń hõ Probhu Isoriń hohoaea. Ar jãhãege seṅgelteye roṛ ruạṛ abon uni kangeae Isor do.”
Niạ katha ańjomkate sanamkoko menkeda, “Am do bhagegem menakada.”
25Eliạ do Bakʼal debotaren nạbikoe metatʼkoa, “Ape do mitʼṭen ḍaṅgra bachaokate getʼ khanḍa khunḍikate tear maṛaṅepe, ente ape do lekharepe ḍhergea. Ar ona tayom do aperen debota hohoaepe, menkhan seṅgel do alope lagaoakʼa.” 26Okoeṭakʼ ḍaṅgra onkoko hataoan uniko getʼ khanḍa khunḍikedete mońjteko tearkedea.
Ona tayom onko do setakʼ khon tikin hạbicʼ Bakʼal debotako hohoadea. Ar ãṭ aṛaṅte hohoaeko ehopʼena, “E Bakʼal debota, de roṛ ruạṛaleme baṛe.” Menkhan cetʼ roṛ ruạṛge bako ńamleda. Ar onko do pinḍko beṛahaete enejokʼko ehopʼena.
27Tikin okte Eliạ do siṛogate onkoe metatʼkoa, “Ãṭ aṛaṅte hohoaepe, uni doe debota kana. Pasecʼ uni doe ganḍonokʼ kana, hoedaṛeakʼa uni do icʼ joṅe sen akana, hoedaṛeakʼa uni do horre menaea. Hoedaṛeakʼa uni doe jạpitʼ akada, uni do berede hoyokʼtapea.” 28Onate onko do arhõ ãṭ aṛaṅte hohoate memenko ehopʼena ar onkoakʼ niạm lekate hoṛmo khon mãyãm ạuriko oḍok hạbicʼ churikote getʼ cirạkʼ ar jạnumkote akoakʼ hoṛmo ghạlko ehopʼena. 29Onko do tikin khon tarasiń okte reakʼ janwar samaṅokʼ okte hạbicʼ boktaokʼtegeko tahẽyena. Menkhan jãhãn aṛaṅge bako ńamleda, ar cele hõ bae roṛ ruạṛatʼkoa, ar mone hõ bae moneyatʼkoa.
30Unre Eliạ do sanam hoṛkoe metatʼkoa, “Iń ṭhen hijukʼpe.” Onko do uni ṭhenko senena. Eliạ do Probhu Isorakʼ rạputʼ akan pinḍe jut arokeda. 31#Gen 32.28; 35.10 Uni do Jakobren hoponkoakʼ mimitʼ gusṭi lạgitʼ mimitʼ goṭecʼkate gel bar goṭecʼ dhiriye hataoana. Nui Jakobge Probhu Isore metade tahẽkana, “Amakʼ ńutum do hoyokʼa Israel.” 32Ona dhirikote Eliạ do Probhu Isor ńutumte mitʼṭecʼ pinḍe benaokeda ar ona beṛhaeteye ghaḍlakʼ ạcurkeda one onare gelbar keji itạ reakʼ mitʼṭecʼ ṭhuli bạisạu daṛekokʼ. 33Ona tayom uni do pinḍ cetanre sahan sajaokate ḍaṅgrae getʼ khanḍa khunḍikedete sahan cetanreye dohokeda ar onkoe metatʼkoa, “Ponea kanḍate dakʼ ạguipe ar jeredokʼ samaṅokʼakʼ jel ar sahan cetanre dulpe.”
34Ona tayom uni doe metatʼkoa, “Arhõ dulpe.” Arko onkakeda.
Uni doe hukumkeda, “Tesar dhao arhõ onkaepe.” Onko do tesar dhao hõko onkakeda. 35Unre pinḍ cetan khon dakʼ do beṛhaete ạtuyente pinḍ beṛhaeteakʼ nala do perecʼena.
36Ado ạyubokʼ okte Eliạ nạbi doe hecʼena are koekeda, “E Probhu, Abraham, Isahak ar Israelren Isor, teheń am do baḍae ocokom, Israelkoren Isor dom am kangea ar iń do amren guti kạnạń, ar amakʼ hukumtege noako doń kạmikana. 37E Probhu Isor roṛ ruạṛạńme baṛe, jemon noko hoṛko baḍae daṛeakʼ, am kangeam Isor do ar amge onkoakʼ monem ạcur ruạṛ akatʼ takoa.”
38Unre coṭ khon Probhu Isorakʼ seṅgel do pheḍ hecʼente samaṅakʼ jelko, sahanko, dhiriko ar hasakoe jomkeda ar nala reakʼ dakʼ hõe jal ańjetʼkeda.
39Noa ńelte sanam hoṛ do otre taberente ãṭ aṛaṅte hohoateko menkeda, “Probhu kangeae Isor do, Probhu kangeae Isor do.”
40Unre Eliạ do noae hukumkeda, “Bakʼal debotaren nạbiko sapʼkope. Onkoren mitʼ hoṛ hõ alope paskao ocokoa.” Unre hoṛko do onkoko sapʼketʼkoa. Ar Eliạ do Kisạn soḍokʼte idikate onkoe gocʼketʼkoa.
41Ona tayom Eliạ do Ahabe metadea, “Am do senkate jom ńũiyme, ente dakʼ reakʼ saḍe do botorge ańjomokʼ kana.” 42#Jak 5.18 Onate Ahab do jom ńũi lạgitʼe senena, menkhan Eliạ do Karmel buruteye rakapʼena. Uni doe ikhṛumente banar gunṭhikinre mẽtʼãhãe dohoketʼtaea.
43Ona tayom acʼren gutiye metadea, “Am do senkate doreão secʼ beṅged me.”
Uni do senente ńelkateye menkeda, “Onḍe do cetʼge baṅ ńelokʼkana.” Nonkage Eliạ do eae dhao senkate ńeńele metadea.
44Eae dhaore guti do hecʼkateye menkeda, “Manwawakʼ ti leka mitʼṭecʼ huḍiń rimil do doreão khon rakapʼ hijukʼ kana.
Unre Eliạ do uniye metadea, “Am do senkate Ahab metaeme jemon acʼakʼ rãt gạḍiko joṛaokateye senjoṅ, ar baṅkhan dakʼ iạte bae sen daṛeakʼa.”
45Inạkʼtege rimil do dhundena, hoe hõ rakapʼ hecʼena ar ạḍi ãṭe dakʼkeda. Ahab do rãt gạḍite Jisreyelteye mohnḍayena. 46Unre Probhu Isorakʼ daṛe do Eliạ cetanre hecʼena. Uni do acʼakʼ kicricʼko ḍanḍareye rebetʼketʼte Ahab lahate Jesreyelteye ńir calaoena.
Currently Selected:
1 Rapajko 18: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
