1 Rapajko 16
16
1Unre Basa upạrte Hananiren hopon Jehu ṭhen Probhu Isorakʼ niạ katha sodorena, 2“E Basa, am do dhuṛi khoniń halaṅ rakapʼketʼmea ar Israelkoren mukhiyạń hoyoco akatʼmea. Menkhan am do Jerobiamakʼ hortegem taṛameda ar ińren Israel hoṛkom kại ocoyetʼkoa ar onkoakʼ kại gunạkʼte ińem bekusi ocoakadińạ. 3Onate am ar am bõsrenkoń maraopea. Ar am bõsrenko do Nabatren hopon Jerobiamren bõs lekań hoyocoya. 4Amren okoeko hoṛ nagrahareko gujukʼ onko do setakoko jomkoa ar ṭanḍire okoeko gujukʼ onko do cẽṛẽko jomkoa.”
5Basawakʼ eṭakʼ eṭakʼ kạmiko reakʼ, uniyakʼ lạṛhạire jitạukʼ reakʼ ar uni okakoe ceka akatʼ ona do “Israelkoren rapajkoakʼ Itihãs” ńutumanakʼ puthire ol akana. 6Tayomte Basa do acʼren hapṛamko ṭhene calaoena ar Tirsareko topakadea. Ar uniyakʼ jaegare uniren hopon Ela do raje hoyena.
7Hananren hopon Jehu nạbi hotete Basa ar uniyakʼ bõsko upạrte Probhu Isorakʼ katha do sodorlena, ente Jerobiamakʼ bõsrenko leka uni do Probhu Isorakʼ mẽtʼre oka bạṛicʼakʼ kan ona kạmikote Probhu Isore bekusi ocokedea ar Jerobiamakʼ bõskoe marao giḍikada.
Israelren Ela raj
8Jihudạren raj Asakʼ rajokʼ bargel turui bochor oktere Basaren hopon Ela do Israelren raje hoyena. Uni do Tirsare bar bochore rajlena. 9Simri ńutuman uniren mitʼṭen senaputi do uni upạrteye soṛojontroyetʼ tahẽkana. Elawakʼ tinạkʼ rãt gạḍiko tahẽkan onako reakʼ adha do Simri cetanre bhar tahẽkana. Ela do un jokhecʼ Arsawakʼ oṛakʼre bulokʼ lạgitʼ bubulakʼe ńuńukan tahẽkana. Arsa cetanre do Tirsa reakʼ raj dolanko ńel todarot reakʼ bhar tahẽkana. 10Jihudạren raj Asawakʼ rajokʼ bargel eaeyakʼ bochorre Simri do ona oṛakʼre bolokate Elae gocʼkedea. Ar ona tayom uni do Ela bodolte raje hoyena.
11Raj lekate siṅghạsonre duṛubokʼ etohopʼrege Simri do Basa bõsren sanamkoe gocʼketʼkoa. Uniren gateko peṛako modre cele herel hoṛge jiwetʼ do bae doholetʼkoa. 12Jehu nạbi hotete Probhu Isor do Basa upạrte okae roṛletʼ onkage Simri do Basawakʼ bõsren sanamkoe marao giḍikatʼkoa. 13Inạ reakʼ karon do hoyokʼkana, Basa ar uniren hopon Ela do ạḍitetʼkin ghạṭleda, unkin do Israelko hõkin kại ocoletʼkoa. Unkin do boṅga murhutʼkote Israelren Probhu Isorkin khĩs ocoledea. 14Elawakʼ eṭakʼ eṭakʼ kạmiko, metakʼme uni okakoe kạmiletʼ ona do “Israelren rapajkoakʼ Itihãs” ńutumanakʼ puthire ol menakʼa.
Israelren Simri raj
15Jihudạren raj Asakʼ rajokʼ bargel eaeyakʼ bohcorre Simri do Tirsare eae din raje calaokeda. Ona jokhecʼ Israelren lạṛhại phạdko do Philisṭikoakʼ Gibethonko gherao akatʼ tahẽkana. 16Israelko do ḍerare tinreko ańjomkeda, Simri do raj upạrte soṛojontrokate uniye gocʼ akadea unre onko do enhilokʼge ḍerare maraṅ senaputi Omri do Israelren rajko bahalkedea. 17Unre Omri ar uni sãoten sanam Israelko do Gibethon khonko rakapʼ calaoente Tirsako gheraokeda. 18Simri do nagraha hatena menteye ńelketʼ khan raj doṅgolteye boloyena ar seṅgele lagaoada. Ar unre acʼ hõe lo gocʼena. 19Acʼakʼ kại iạtege uni doe gocʼena, ente Probhu Isorakʼ mẽtʼre oka bạṛicʼakʼ kan onageye kạmikan tahẽkana. Uni do Jerobiam lekae senokʼkan tahẽkana, metakʼme Jerobiam Israelko cetʼ lekae kại ocoyetʼko tahẽkan uni hõ onkageye kạmikeda. 20Simriyakʼ eṭakʼ eṭakʼ kạmiko ar uniyakʼ hul reakʼ katha do “Israelkoren rapajkoakʼ Itihãs” ńutumanakʼ puthire ol menakʼa.
Israelren Omri raj
21Inạ tayom Israelko do bar hạṭińteko hạṭińena. Onko modren adha do Ginetren hopon Tibni rajeko khojkeda ar eṭakʼ adhako do Omri rajeko khojkeda. 22Menkhan Omri secʼren hoṛ do Ginetren hopon Tibni secʼren hoṛko bhagaoketʼkoa. Ar onate Tibniye gocʼen khan Omrigeye rajena.
23Jihudạren raj Asakʼ rajokʼ pegel mitʼ bochorre Omri do Israelkoren raje hoyena. Uni do gelbar bochor raje tahẽkana, ona modre turui bochor do Tirsareye rajena. 24Uni do eaegel irạl keji rupạte Semer ṭhen khon Samariạ buruye kirińkeda ar buru coṭre mitʼṭecʼ nagrahae benaokeda ar bururen lahaten mạlik Semerakʼ ńutum lekage nagraha reakʼ ńutume dohokeda.
25Omri do Probhu Isorakʼ mẽtʼre oka bạṛicʼakʼ kan onageye kạmikan tahẽkana ar uni lahate okoe rajko tahẽkan onko sanamko khon hõ uni do ḍhere kạiyetʼ tahẽkana. 26Uni do Nabatren hopon Jerobiam lekageye senokʼkan tahẽkana, metakʼme Jerobiam cetʼ leka Israelkoe kại ocoyetʼko tahẽkan Omri hõ onkageye kạmiyetʼ tahẽkana. Onate Israelko do boṅga murhutʼ hotete akoren Probhu Isorko edre ocokedea.
27Omriyakʼ eṭakʼ eṭakʼ kạmiko reakʼ katha ar lạṛhạire uniyakʼ jitạukʼ reakʼ katha do “Israelren rapajkoakʼ Itihãs” ńutumanakʼ puthire ol menakʼa. 28Tayomte Omri do acʼren hapṛamko ṭhene calaoena ar uni do Samariạreko topakadea. Ar uniyakʼ jaegare do uniren hopon Ahabe rajena.
Israelren Ahab raj
29Jihudạren raj Asawakʼ rajokʼ pegel irạl bochorre Omriren hopon Ahab do Israelkoren raje hoyena. Uni do bargel bar bochor Samariạ khon Israelko cetanreye rajokʼkan tahẽkana. 30Omri hopon Ahab hõ Probhu Isorakʼ mẽtʼre oka bạricʼakʼ kan onageye kạmiyetʼ tahẽkana, uni lahare okoeko rajko tahẽkan onko sanamko khon hõ ḍher bạṛicʼakʼkoe kạmikan tahẽkana. 31Nabatren hopon Jerobiam okakoe kạiletʼ onako do thoṛawakʼgeye metakʼkan tahẽkana. Eken ona do baṅa, uni do Sidonkoren raj Et-bakʼalren hoponera Esebele baplakedea ar Bakʼ-al debota sewawaye ehopʼena. 32Uni do Samariạre Bakʼal debota lạgitʼ oka mundile benaoletʼ onḍe uni lạgitʼ mitʼṭecʼ pinḍe benaokeda. 33Uni do mitʼṭecʼ Asera muṭhạn hoe benaokeda ar ona lahare Israelren sanam rapajko Israelren Probhu Isor tinạkʼko bekusi ocolede uni do acʼakʼ kạmi hotete ona khon hõ bạ̃ṛtiye bekusi ocokedea.
34 #
Josu 6.26
Ahabakʼ oktere Bethelren Hiel do Jerikho nagraha arhõe benao ruạṛkeda. Nunren hopon Josuạ hotete Probhu Isorakʼ katha leka ona nagraha reakʼ rehetʼ gathao lạgitʼ Hielren maraṅicʼ hopon Abiramakʼ jiwi alae hoyentaea ar ona reakʼ phaṭok silpiń lagao lạgitʼ do uniren huḍińicʼ hopon Segub hõ jiwi emokʼ hoyentaea.
Currently Selected:
1 Rapajko 16: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
