1 Rapajko 15
15
Jihudạren Abiạm raj
(2 Bõsbudạ 13.1—14.1)
1Nobaṭren hopon Jerobiamakʼ rajokʼ gel irạlakʼ bochorre Abiạm do Jihudạren raje hoyena. 2Uni do Jerusalemre pe bochore rajlena. Uniren eṅgatakʼ ńutum do Maka; uni do Abisalomren hoponerae tahẽkana. 3Abiamren apattetʼ okakoe kạiletʼ uni hõ onako kạmigeye ehopʼena. Uniren hapṛam Dạud leka uniyakʼ ontor do Probhu Isor secʼ purạte do baṅ tahẽkantaea. 4#1 Raj 11.36 Enhõ Dạudakʼ katha disạite uniren Probhu Isor do Jerusalemre mitʼṭecʼ mạliye emena, metakʼme uniyakʼ siṅghạsonre duṛubokʼ lạgitʼ mitʼṭen hopone emena ar Jerusalem do ḍahao maraokʼ khone rukhiyạkeda, 5#2 Sam 11.1-27 ente Probhu Isorakʼ mẽtʼre okaṭakʼ ṭhikakʼ kan onage Dạud doe kạmiyetʼ tahẽkana. Eken Uriạ hitti hoṛakʼ ghoṭna chaḍa uniyakʼ goṭa jionre Probhu Isorakʼ oka hukumge bae bemanotleda. 6#2 Bõs 13.3-21 Rehobiam ar Jerobiam talare okaṭakʼ lạṛhại ehopʼlen ona do Abiamakʼ jiwetʼ bhor tahẽkana.
7Abiamakʼ eṭakʼ eṭakʼ kạmiko, metakʼme uni okaṭakʼe kạmiyetʼ tahẽkan ona do “Jihudạ rajakʼ Itihãs” ńutumanakʼ puthire ol menakʼa. Abiam ar Jerobiam talare do lạṛhại hoyokʼkan tahẽkana. 8Tayomte Abiạ do acʼren hapṛamko ṭhene senena, ar Dạudakʼ nagrahareko topakadea. Ar uniyakʼ jaegare do uniren hopon Asaye rajena.
Jihudạren Asa raj
(2 Bõsbudạ 14.1-5; 15.16—16.6,11-14)
9Israelkoren raj Jerobiamakʼ rajokʼ bargel bochor oktere Asa do Jihudạren raje hoyena. 10Uni do pongel mitʼ bochor hạbicʼ Jerusalemreye rajena. Uniren goṛomtetʼ buḍhiyakʼ ńutum do Maka tahẽkana. Uni do Abisalomren hoponerae tahẽkana.
11Uniren hapṛam Dạud leka Asa do Probhu Isorakʼ mẽtʼre okaṭakʼ bhageakʼ kan onageye kạmikan tahẽkana. 12#2 Bõs 15.8-15 Uni do disạm khon herel mundil kusumbikoe laga ńirketʼkoa ar hapṛamkoren benao sanam boṅga muṭhạnko hõe sạṅgiń giḍikatʼkoa. 13Uni do acʼren goṛomtetʼ buḍhi Maka hõ rạni hudạ khone ocokʼkedea, ente uni do hirkhạwạnicʼ Asera muṭhạne benaoleda. Ar Asa do ona muṭhạne makʼ rạputʼketʼte kedron soḍokʼre idikateye atar giḍikada. 14Uni do than boṭkocʼko bae marao utạrletʼre hõ jiwetʼ bhor Probhu Isorgeye botoradea. 15Uni ar acʼren apattetʼ okako sona-rupạ ar eṭakʼ eṭakʼ jinisko Isor ńutumtekin begar doholetʼ uni do onako Isorakʼ oṛakʼteye ạgukeda.
16Asa ar Israelren Basa raj do jiwetʼ bhor ạkin talarekin lạṛhại kan tahẽkana. 17Israelren Basa raj do Jihudạren hoṛko upạrte senkate Rama nagraha do gaṛ lekae benao rakapʼkeda jemon Jihudạren raj Asa ṭhen okoe hõ aloko sen hecʼ daṛeakʼ. 18Probhu Isorakʼ oṛakʼre ar apnarakʼ raj khajańci oṛakʼre okako sona ar rupạko tahẽkan onako sanamakʼe oḍokkeda. Onako do acʼren gutikoakʼ tite Aramren raj Benhadad ṭhene kolkeda. Benhadad do Tabrimonren hopon Hesbonren goṛomtetʼ koṛae tahẽkana. Uni do unre Damesekreye rajokʼkan tahẽkana. Asa do uni ṭhene roṛgotʼkada, 19“Ińren ạpuń ar amren ạpum leka dela, alaṅ hõ mitʼṭecʼ laṅ bondobos laṅ bandhaoma. Iń do noako sona ar rupạko dan lekateń kolatʼmea. Am do ńitokʼ Israelren raj Basa sãote okaṭakʼ bondobos menakʼ ona baṛe rạpudme, enḍekhan uni do iń ṭhen khone ruạṛ calakʼa.”
20Asa rajakʼ kathate Benhadad doe rạjiyena ar Israelkoakʼ ato ar nagrahako upạrte acʼren subedarkoe kolketʼkoa. Uni do Ison, Dan, Abel-Betmaka ar goṭa Kinerot ar ona sãoteakʼ Napthali ṭoṭhae hatkeda. 21Ado Basa niạ kathae ańjomketʼ khan Rama nagraha kajakte benao rakab reakʼ kạmiye bondketʼte Tirsateye ruạṛ calaoena. 22Ona tayom Asa raj do Jihudạren sanamko cetanre hukume emkeda, ar okoe hõ bae badletʼkoa. Onate hoṛko do Ramare Basae beohar akatʼ dhiri ar sanam kaṭko idikeda. Ar Asa raj do onakote Benjạmin reakʼ Geba ar Mispa gaṛ lekae benaokeda.
23Asakʼ eṭakʼ eṭakʼ kạmiko, lạṛhạire jitạukʼ reakʼ katha, ar uni cetʼkoe cekaletʼ ar okako ato nãwãteye benao aroletʼ ona do “Jihudạ rapajkoakʼ Itihãs” ńutumanakʼ puthire ol menakʼa. Haṛam umerre Asa do jaṅgare mitʼṭecʼ rog ńamkedea. 24Tayomte Asa do acʼren hapṛamko ṭhene calaoena ar acʼren hapṛam Dạudakʼ nagrahare acʼren hapṛamko sãoteko topakadea. Ar uni hopon Jehosaphet do uniyakʼ jaegareye rajena.
Israelren Nadab raj
25Jihudạren raj Asakʼ rajokʼ dosar bochorre Jerobiamren hopon Nadab do Israelren raje hoyena. Uni do Israelko cetanre bar bochore rajlena. 26Ar Probhu Isorakʼ mẽtʼre okaṭakʼ bạṛicʼakʼ kan onage uni doe kạmikan tahẽkana. Uni do acʼren apat lekae calakʼkan tahẽkana, metakʼme acʼren apat Israelko cetʼ lekae kại ocoletʼko onkage uni hõe kạmikeda.
27Isạkar gusṭiren Ạhiạren hopon Basa do Nadab upạrteye soṛojontrokeda. Nadab ar Israelko do tinre Philisṭikoakʼ Gibethonko gherao ạcurkeda unre Basa do Gibethonre Nadabe gocʼkedea. 28Jihudạren raj Asakʼ rajokʼ tesarakʼ bochorre Basa do Nadabe gocʼkedea ar uniyakʼ jaegareye rajena.
29 #
1 Raj 14.10
Uni do raj hoykate Jerobiam gharońjren sanamkoe gocʼ cabaketʼkoa. Probhu Isor do acʼren guti Siloren Ạhiạ nạbi hotete oka kathae roṛletʼ ona lekage Basa do Jerobiamakʼ gharońjren sanamkoe marao cabaketʼkoa. 30Niạ reakʼ karon do hoyena, Jerobiam do apnartetʼe kạileda ar Israelko hõe kại ocoletʼkoa ar onae onkaketʼte uni do Israelkoren Isorakʼ pite caṛhao ocoketʼtaea.
31Nadabakʼ eṭakʼ eṭakʼ kạmiko, metakʼme uni okakoe kạmiletʼ ona do “Israelkoren rapajkoakʼ Itihãs” ńutumanakʼ puthire ol akana. 32Asa ar Israelkoren raj Basa do rajokʼ bhor lạṛhạitege kin tahẽyena.
Israelren Basa raj
33Jihudạren raj Asakʼ rajokʼ tesarakʼ bochorre goṭa Israel disạm cetanre Ạhiạren hopon Basa do Tirsare rajokʼe ehopʼena. Uni do bargel pon bochore rajena. 34Uni do Probhu Isorakʼ mẽtʼre oka bạṛicʼakʼ kan onageye kạmiyetʼ tahẽkana. Uni do Jerobiam lekageye calakʼkan tahẽkana, metakʼme Jerobiam cetʼleka Israelkoe kại ocoletʼko uni hõ onkageye kạmikeda.
Currently Selected:
1 Rapajko 15: SBT
Highlight
Share
Compare
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
